Read Hmong Njua Yauj 4 Bible Online

Yauj 4 - Hmong Njua bible

Yauj 4

¹Tom qaab ntawd Elifas kws yog tuabneeg Temas has rua Yauj has tas, “Yog kuv has ob peb lu lug koj puas chim? Kuv npu tsi taug kuv tej lug lawm.

³Koj tub ntuag tej tuabneeg ntau leej lug lawm, hab txhawb cov tuabneeg kws qaug zug kuas muaj zug tuaj.

⁴Thaus muaj tuabneeg qaug zug hab dlawm qaug lawd, koj tej lug txhawb tau puab tug zug.

⁵Nwgnuav kev txomnyem lug raug koj lawm koj yuav tsi muaj zug tiv taug tej kev txomnyem ntawd.

⁶Koj fwm Vaajtswv hab ua koj lub neej zoo tsi muaj leejtwg thuam tau; tsimnyog koj muab sab npuab hab ca sab rua tug TSWV.

⁷Koj ua tuab zoo xaav saib tej tuabneeg ncaaj nceeg yeej tsi muaj ib tug raug kev puamtsuaj le.

⁸Lawv le kuv pum mas tej tuabneeg kws ua kev txhum, hab ua kev phem kev qas yeej yuav tau sau tej kws puab ua ntawd.

⁹Vaajtswv ua rua puab raug kev puamtsuaj, ib yaam le nthwv cua dlaaj cua dlub lug nplawm puab tej vaaj tse qaug taag.

¹⁰Cov tuabneeg sab phem nthe nrov ib yaam le tsuv ntxhuav nyooj, tabsis Vaajtswv kaw puab qhovncauj hab tsoo puab tej nav luv.

¹¹Puab yuav tuag ib yaam le tej tsuv ntxhuav tuag tshaib kws tum tsi tau tsaj noj, hab puab tej mivnyuas yuav tsiv ua saab ua sua taag.

¹²“Muaj ib lub suab has rua kuv, lub suab ntawd has yau heev, kuv tub yuav laug tsi nov.

¹³Lub suab ntawd zoo ib yaam le zaaj npau suav phem kws ua rua kuv tsim dlheev nruab dlaab ndlub lug.

¹⁴Kuv ntshai ua ib ce tshee nyo; hab ua rua kuv lub cev tshee ndluas quas txag.

¹⁵Muaj ib nthwv cua ntsawj quas ntxog rua kuv lub plhu, ua rua kuv poob sab nthaav ib ce xub taagnrho.

¹⁶Kuv pum ib yaam sawv ntawm kuv hauv ntej; kuv tsaa qhovmuag saib, tabsis kuv tsi paub has tas, yog dlaabtsi. Kuv txawm nov ib lub suab has ntawm qhov chaw kws ntsag tu tuaj has tas:

¹⁷‘Puas muaj ib tug tuabneeg ncaaj nceeg tshaaj Vaajtswv lossis puas muaj ib tug tuabneeg dlawbhuv tshaaj tug TSWV kws tsim nwg?

¹⁸Vaajtswv tsi ntseeg nwg cov timtswv sau ntuj sab; txawm yog nwg cov timtswv los ua txhum hab.

¹⁹Koj puas xaav has tas, Vaajtswv yuav ca sab rua tug kws nwg muab aav nplaum puab? Tej kws nwg muab aav puab ntawd tsi ruaj tsi khov, ib yaam le tug kaab npauj kws luas muab zuaj ces mog taag.

²⁰Thaus sawv ntxuv tej tuabneeg ua neej nyob, tabsis thaus tsi tau tsaus ntuj puab tub tuag lawm, tsi muaj leejtwg paub.

²¹Luas yuav txeeb txhua yaam kws puab muaj moog taag; thaus puab tseem tsi tau muaj kev txawj ntse puab tub tuag lawm.’ ”