Read Hmong Njua Yauj 40 Bible Online

Yauj 40 - Hmong Njua bible

Yauj 40

¹Tug TSWV has rua Yauj has tas, “Yauj, koj pheej nrug Vaajtswv tug kws muaj Fwjchim Luj kawg nkaus sis caav? Nwgnuav koj yuav tso tseg lossis tseem yuav caav hab?”

³Yauj teb tug TSWV has tas,

⁴“Tug TSWV, kuv yog tuabneeg ruag heev, kuv yuav ua le caag teb tau koj tej lug? Kuv yuav tsi has ib lus ntxiv le lawm.

⁵Kuv tub has tshaaj qhov kws tsimnyog kuv has lawm.”

⁶Tom qaab ntawd tug TSWV rov has huv nthwv cua dlaaj cua dlub tuaj rua Yauj ib zag ntxiv.

⁷Tug TSWV has rua Yauj has tas, “Koj ca le sawv khov kho ib yaam le tug txivneej yawg, hab teb kuv tej lug.

⁸Koj has rua kuv tas, kuv ua tsi ncaaj, hab has tas kuv yog tug txhum, koj yog tug tsi txhum nua los?

⁹Koj muaj zug npaum le kuv los? Koj ua tau koj lub suab nrov qeeg nkawg ib yaam le kuv lub los?

¹⁰Yog koj ua tau, koj ca le sawv khaav txiv ntxhas ib yaam le tug muaj fwjchim, muab koj lub meejmom hab tug tshwjchim lug naav kag saib.

¹¹Koj ca le saib tej tuabneeg khaavtheeb; ca le nthe tawg ntho kuas puab txu fwjchim.

¹²Koj ca le saib cov tuabneeg khaavtheeb hab txu puab lub fwjchim kuas qeg; muab cov tuabneeg sab phem tsuj nthi rua ntawm puab qhov chaw.

¹³Muab puab log kag rua nruab aa; muab puab khi kag rua huv tubtuag teb.

¹⁴Yog koj ua tau, kuv yog thawj tug kws yuav qhuas koj, hab leeg has tas, koj yog tug kws kovyeej lawm.

¹⁵“Koj ca le saib tug tsaj Npehemaus, kuv tsim nwg hab tsim koj huv tuabsi; nwg noj zaub le tug nyuj,

¹⁶tabsis yog dlaabtsi ua rua tug tsaj ntawd lub cev muaj zug heev? Hab yog lub fwjchim dlaabtsi ua rua nwg tej nqaj puv nruj nreeg!

¹⁷Nwg tug kutwv tsaa ntshuas ib yaam le tsob ntoo cab, hab nwg ncej puab ntug ntoob muaj zug heev.

¹⁸Nwg tej pobtxhaa khov cuag tooj, hab nwg tej teg taw tawv cuag hlau.

¹⁹“Tug tsaj kws muaj fwvxyeej tshaaj tej tsaj kws kuv tsim; tsuas yog tug TSWV kws tsim nwg txhaj kovyeej nwg xwb.

²⁰Nwg noj zaub sau tej roob kws yog tej tsaj nruab nraag tej chaw ncig.

²¹Nwg pw huv qaab tej xyov xuavpaug, hab pw tsau hawv tsawv huv qaab tej lojkov.

²²Tej ntoo xuavpaug hab tej lwgzaaj kws tuaj rua ntawm ntug dlej ua ntxoov ntxoo rua nwg nkaum.

²³Nwg tsi ntshai tug dlej kws ndlwg ceev; thaus tug dlej Yauladees ntsawj nwg taubhau los nwg tseem nreg khov kho.

²⁴Leejtwg muaj cuabkaav ua rua nwg dligmuag hab nteg tau nwg? Lossis leejtwg muaj cuabkaav muab hlua chaws tau nwg qhovntswg?