Read Hmong Njua Yauj 41 Bible Online

Yauj 41 - Hmong Njua bible

Yauj 41

¹“Koj muaj cuabkaav muab nuv ntseg nuv tau Levi-athas lossis muab hlua khi tau nwg tug nplaig los?

²Koj puas muab hlua chaws tau nwg qhovntswg? Lossis muab nuv ntseg nqai tau nwg puabtsaig?

³Nwg puas yuav thov kuas koj tso nwg moog? Nwg puas yuav ua tuab zoo thov kuas koj hlub nwg?

⁴Nwg puas kaam leeg hab coglug rua koj has tas, nwg yuav ua koj qhev moog ibtxhis?

⁵Koj puas yuav khi tau nwg ib yaam le khi noog rua koj tej ntxhais ua si?

⁶Cov tuabneeg ntaus ntseg puas tuaj kheev nqe yuav nwg? Tej tub laag tub luam puas yuav muab nwg coj moog txhoov muag?

⁷Koj puas yuav muab muv nkaug tau nwg dlaim tawv, lossis muab muv hlau nkaug tau nwg taubhau tshaab?

⁸Yog koj nrug nwg sis ntsuag zug ib zag, koj yuav zeem kag tsi kov ntxiv le lawm;

⁹“Yog leejtwg pum zaaj, nwg yuav ntshai ua ib ce tuag taag hab qaug rua huv aav.

¹⁰Thaus muaj tuabneeg moog thaab nwg, nwg yuav ua nyaum kawg nkaus, tsi muaj leejtwg tiv tau le.

¹¹Leejtwg tawmtsaam nwg taag hab tseem muaj sa nyob? Nyob huv nplajteb nuav yeej tsi muaj leejtwg ua tau le ntawd.

¹²“Ca kuv qha zaaj tej teg taw rua koj paub, hab qha rua koj saib nwg luj hab muaj zug npaum le caag.

¹³Tsi muaj leejtwg laws tau nwg dlaim tawv, lossis nkaug tshaab nwg tej khum.

¹⁴Leejtwg muaj cuabkaav rua tau nwg lub qhovncauj kws nav zuag plag hab txaus ntshai ntawd?

¹⁵Nwg lub nrausqaum ua nplai quas reeg ua tej nreej tawv cuag pobzeb.

¹⁶Nwg tej nplai sis dlhos ntum nti, txawm yog cua los tub txeem tsi tau.

¹⁷Tej nplai ntawd sis dlhos ua nreej quas reeg, tsi muaj ib yaam dlaabtsi ua tau rua cov nplai ntawd nti le.

¹⁸Thaus nwg txhub muaj dluab ci laim lab vog, hab nwg ob lub qhovmuag ci le thaus lub nub tawm tuaj.

¹⁹Muaj nplaim tawg cig laim lag huv nwg qhovncauj hab yaa lab vog tuaj.

²⁰Muaj paa nchu tawm huv nwg qhovntswg tuaj, ib yaam le tej paa quavnyaab nchu huv qaab laujkaub.

²¹Nwg tej paa ua tau suavtawg; muaj suavtawg tawm lab vog huv nwg qhovncauj tuaj.

²²Nwg lub cejdlaab muaj zug heev; txhua tug kws pum nwg ntshai kawg le.

²³Nwg dlaim tawv tawv cuag hlau txag, tsi muaj ib qhov zooj le.

²⁴Nwg sab tawv ib yaam le pobzeb, hab tawv ib yaam le txhib zeb tsi ntshai dlaabtsi le.

²⁵Thaus nwg tawm plawg tuaj, txawm yog tej tuabneeg kws muaj zug heev los yeej ntshai ua ib ce tuag taag tsi paub ua zaaj twg.

²⁶Tsi muaj ib raab ntaaj kws yuav txav tau nwg le; txawm yog muab ntaaj, muab muv lossis muab xub vug tua los yeej tsi to le.

²⁷Muab muv hlau nkaug, ces ib yaam le muab quavnyaab nkaug hab muab muv tooj nkaug nwg ces ib yaam le muab ntoo lwj nkaug xwb.

²⁸Tsi muaj ib xibxub vug yuav ua tau rua nwg tsiv le; muab pobzeb ntaus nwg, ces ib yaam le muab quavnyaab ntaus xwb.

²⁹Muab qws ntaus nwg, ces ib yaam le muab ib tug quav nplej ntaus; hab thaus tuabneeg muab muv nkaug nwg, nwg tseem luag hab.

³⁰Nwg tej nplai qaab plaab ntse cuag txhais laamfwj; thaus nwg moog, nwg tshav aav tawg pis rhe ib yaam le khais laij lag.

³¹Nwg ua rua havtxwv npau ib yaam le dlej kub npau, hab ua rua havtxwv ua npuag ib yaam le laujkaub roj.

³²Nwg moog kev mas ua rua dlej txaws dlawb vog rov tom qaab; hab nwg ua rua havtxwv ua npuag dlawb paug.

³³Tsi muaj ib yaam huv nplajteb nuav yuav pev tau nwg; nwg yog tug tsaj kws tsi paub ntshai dlaabtsi le.

³⁴Txawm yog tej tsaj kws ua tau heev los nwg tsi ntshai le; nwg yog tug vaajntxwv kws kaav taagnrho txhua yaam tsaj nruab nraag.”