Read Hmong Njua Yauj 42 Bible Online

Yauj 42 - Hmong Njua bible

Yauj 42

¹Yauj teb tug TSWV has tas, “Tug TSWV, kuv paub has tas koj yog tug kws muaj Fwjchim Luj heev; koj xaav ua dlaabtsi, koj yeej ua tau huv tuabsi.

³Koj nug has tas, ua le caag kuv txhaj muaj sab tawv nrug koj sis caav; kuv yog tuabneeg ruag, kuv has txug tej kws kuv tsi totaub, hab tej yaam xaav tsi thoob kws kuv tsi tau paub dlua le xwb.

⁴Koj kuas kuv noog koj has; hab teb koj tej lug.

⁵Yaav taag lug, kuv tsuas paub lawv le luas qha kuv xwb, tabsis nwgnuav kuv qhovmuag pum koj lawm tag.

⁶Yog le ntawd, kuv txaajmuag kawg nkaus rua tej lug kws kuv has, kuv txhaj moog nyob ntawm cub tshau hab huv aav ris sab hlo tsi ua ntxiv le lawm.”

⁷Tom qaab kws tug TSWV has rua Yauj taag lawd, tug TSWV has rua Elifas has tas, “Kuv chim heev rua koj hab koj ob tug phoojywg, rua qhov thaus mej pav txug kuv zaaj, mej has tsi tseeb lawv le Yauj kws yog kuv tug tubkhai has.

⁸Nwgnuav mej ca le moog nteg xyaa tug txiv nyuj hab xyaa tug laug yaaj tuaj rua Yauj tua hlawv fij dlaws mej lub txim. Yauj yuav thov kuv zaam txim rua mej, kuv yuav teb Yauj tej lug thov, hab kuv yuav tsi rau txim rua mej, lawv le mej tau ua txhum lawm. Thaus mej pav txug kuv zaaj, mej tsi has lug tseeb lawv le Yauj has.”

⁹Ces Elifas, Npiledas hab Xaufas txawm ua lawv le tug TSWV has, hab tug TSWV teb Yauj tej lug thov.

¹⁰Tom qaab Yauj thov Vaajtswv rua nwg peb tug phoojywg taag, tug TSWV tau foom koob moov rua Yauj rov tau zoo neej dlua hab pub Yauj muaj txhua yaam le qub hab ib npaug ntxiv.

¹¹Yauj cov kwvtij, cov nkauj muam hab tej phoojywg thaus u tuaj saib Yauj hab nrug Yauj noj haus huv nwg tsev. Puab nplig Yauj sab hab txhawb nwg zug txug tej kev txomnyem kws tug TSWV tso lug rua Yauj. Puab suavdlawg muab nyaj hab ib leeg muab ib nti nplhaib kub rua Yauj.

¹²Tug TSWV foom koob moov rua Yauj lub neej zoo heev dlua thaus chivthawj. Yauj muaj kaum plaub txheeb tug yaaj, rau txheeb tug ntxhuav, ob txheeb tug nyuj hab ib txheeb tug neeg luav.

¹³Yauj muaj xyaa leej tub hab peb leeg ntxhais.

¹⁴Yauj muab tug ntxhais hlub tis npe hu ua Yemimas, tug ntxhais nraab hu ua Kexiyas, hab tug ntxhais yau hu ua Keles Hapus.

¹⁵Tej quaspuj kws nyob huv lub nplajteb nuav, tsi muaj ib tug zoo nkauj npaum le Yauj cov ntxhais. Yauj faib nwg tej qubtxeeg qubteg rua nwg cov ntxhais ib yaam le faib rua nwg cov tub.

¹⁶Tom qaab ntawd, Yauj ua neej nyob tau ib puas plaub caug xyoo ntxiv, nwg pum nwg cov tub cov ntxhais tej xeebntxwv huv tuabsi.

¹⁷Ces thaus Yauj laug heev lawd, nwg maam le tuag.