Read Hmong Njua Yauj 5 Bible Online

Yauj 5 - Hmong Njua bible

Yauj 5

¹Yauj, koj ca le tsaa suab hu saib puas muaj leejtwg teb koj. Puas muaj ib tug timtswv nyob qhov twg kws koj yuav moog cuag tau?

²Tug tuabneeg ruag tuag vim nwg txujkev chim, tug tuabneeg tsi paub qaabhau tuag vim nwg txujkev khib.

³Kuv pum cov tuabneeg nyob tso sab lug, tabsis tsi nwm kuv txawm foom tsi zoo rua puab tej vaaj tse lawm.

⁴Puab tej mivnyuas yuav tsiv tsi dlim kev txomnyem le; tsi muaj leejtwg yuav paab txheem puab huv tsev tu plaub.

⁵Cov tuabneeg tshaib plaab yuav tau noj cov tuabneeg ruag tej qoobloo, txawm yog tej qoobloo kws tuaj xyaw tej xuavpaug los puab yuav sau kuas taag moog hab cov tuabneeg ntshaw nyaj yuav txeeb puab tej nyaj tej kub kuas taag.

⁶Kev phem kev qas yeej tsi tawm huv aav tuaj, lossis teebmeem yeej tsi tshwm huv nruab aa tuaj.

⁷Tabsis tuabneeg lob teebmeem lug rua tuabneeg, ib yaam le txaim tawg yaa huv qhovcub tuaj.

⁸Kheev kuv laam yog koj, kuv tub moog cuag Vaajtswv hab pav kuv tej kev txomnyem rua nwg lawm.

⁹Peb tsi totaub tej num tseemceeb kws Vaajtswv ua, hab nwg tej txujci tseemceeb muaj ntau heev suav tsi txheeb le.

¹⁰Nwg tso naag lug rua lub nplajteb hab nwg ua kuas muaj dlej yug tej qoobloo huv tej laj tej teb.

¹¹Vaajtswv tsaa cov tuabneeg kws txu fwjchim lub neej rua qhov sab, hab paab cov tuabneeg kws muaj kev txhawjxeeb quaj ntsuag kuas muaj kev zoo sab.

¹²Nwg tawmtsaam cov tuabneeg dlaag ntxag tej tswvyim, hab muab cov tuabneeg txawj ntse tej tswvyim cuab puab kev, kuas puab ua tsi tau puab tej num tav.

¹⁴Txawm yog nruab nub nrig loa puab maub ib yaam le tsaus ntuj nti.

¹⁵Tabsis Vaajtswv paab cov tuabneeg pluag dlim kev pluj kev tuag; hab nwg paab cov tuabneeg txomnyem dlim kev tsimtxom.

¹⁶Vaajtswv pub cov tuabneeg txomnyem muaj chaw ca sab, tabsis nwg kaw cov tuabneeg ua phem ua qas qhovncauj.

¹⁷Tug kws Vaajtswv qhuab qha, tug ntawd tau koob moov! thaus Vaajtswv qhuab ntuag koj, koj tsi xob tu sab.

¹⁸Vaajtswv ua rua koj nqaj to, tabsis nwg yuav qhwv koj tej qhov txhaab; nwg txhais teg nplawm koj, tabsis nwg txhais teg yuav khu koj.

¹⁹Nwg naj nub yuav cawm kuas koj dlim kev puamtsuaj.

²⁰Thaus muaj kev tshaib nqhes, nwg yuav cawm tsi pub koj tuag, hab thaus muaj kev tsuv kev rog, nwg yuav tsomkwm tsi pub koj tuag.

²¹Vaajtswv yuav paab kuas koj tsi xob raug xaiv raug lug; hab thaus muaj kev puamtsuaj tuaj nwg yuav cawm koj.

²²Thaus muaj kev puamtsuaj hab muaj kev tshaib nqhes koj yuav luag, hab koj yuav tsi ntshai tej tsaj qus.

²³Tej laj tej teb kws koj laij yuav tsi muaj pobzeb, hab tej tsaj qus yuav tsi tum koj.

²⁴Koj yuav nyob kaaj sab lug huv koj lub tsevntaub; thaus koj tsaa qhovmuag saib koj tej yaaj, koj yuav pum txhua tug nyob txhij.

²⁵Koj yuav muaj xeebntxwv coob ib yaam le tej nroj tsuag huv taj nraag.

²⁶Koj yuav ua neej nyob laug quas nkoog ib yaam le naab nplej kws sav kug rua lub caij sau qoobloo.

²⁷Yauj, peb tub pum hab paub has tas tej nuav yog lug tseeb tag, yog le ntawd koj ca le khaws nkaus tej nuav rua nruab sab.