Read Hmong Njua Yauj 6 Bible Online

Yauj 6 - Hmong Njua bible

Yauj 6

¹Yauj has tas, “Yog muab kuv tej kev txomnyem hab kev nyuaj sab lug luj rua sau teev,

³tseem nyaav dlua tej xuabzeb ntawm ntug havtxwv, yog le ntawd, kuv tej lug yuav tsi nyaav rua koj ua luaj twg.

⁴Vaajtswv tug kws muaj fwjchim luj kawg nkaus muab xub vug tua kuv, mas tej taug fuam thoob plawg kuv lub cev. Vaajtswv tso nwg tej kev nruj tsiv tuaj tawmtsaam kuv.

⁵“Tug neeg luav qus txaus sab heev thaus nwg tau zaub noj, hab thaus nyuj tau zaub noj, nyuj nyob ntsag tu.

⁶Leejtwg txhaj noj taug tej nqaj kws tsi rau ntsev? Lub qai txheej dlawb puas qaab dlaabtsi?

⁷Kuv tsi nqhes tej zaub mov kws zoo le ntawd, hab txhua yaam kws kuv noj ua rua kuv mob.

⁸“Vim le caag Vaajtswv tsi muab tej kws kuv thov rua kuv? Vim le caag nwg tsi teb kuv tej lug thov?

⁹Kheev laam Vaajtswv muab kuv tua kuas tuag!

¹⁰Yog kuv paub has tas Vaajtswv yuav muab kuv tua, txawm yog mob npaum le caag los kuv yeej zoo sab, kuv paub has tas, Vaajtswv yog tug dlawbhuv; kuv tsi tau tawmtsaam nwg tej lug saamfwm le.

¹¹Kuv yuav ua le caag cuab tau zug ua kuv lub neej moog ntxiv? Thaus kuv tsi muaj kev ca sab lawd, yuav ua le caag xaav ua neej nyob?

¹²Kuv lub cev puas yog pobzeb? Kuv tej txhaa puas yog tooj?

¹³Kuv tug zug ntaug taag paab tsi tau kuv lawm; tsi muaj ib qhov chaw kws kuv yuav vaamkhom le.

¹⁴“Thaus raug kev txomnyem nyuaj sab le nuav, kuv xaav tau kev paab ntawm tej phoojywg kws sab dlawb sab zoo, tsi has thaus kuv tso Vaajtswv tseg lossis tsi tso.

¹⁵Tabsis mej cov kws yog kuv phoojywg, mej dlaag ntxag kuv ib yaam le lub haav qhuav kws tsi muaj dlej thaus lub caij tsi lug naag.

¹⁶Yog lug dlaus hab dlej nkoog yuav ua rua dlej ndlwg tsi taug,

¹⁷Tabsis thaus tshaav ntuj tuaj zab tej dlej nkoog yuav yaaj taag, hab tshuav lub kwj haa qhuav qhawv ca lawm xwb.

¹⁸Tej tuabneeg kws taug kev moog nrhav dlej haus yuam kev taag; puab moog moog lug lug hab tuag taag rua tom taj suabpuam.

¹⁹Tej tuabneeg taug kev huv lub nroog Senpas hab lub nroog Temas tuaj nrhav dlej haus,

²⁰tabsis puab tej kev ca sab yuav pluj taag rua ntawm lub kwj haa qhuav ntawd.

²¹Mej zoo ib yaam le tej kwj haa qhuav rua kuv xwb, Mej tuaj pum kuv raug kev txomnyem le nuav, ua rua mej ntshai hab tsiv rov qaab.

²²kuv puas tau thov kuas mej muab ib yaam dlaabtsi rua kuv, lossis muab nyaj xab lwm tug kuas tuaj tso kuv,

²³Lossis cawm kuas kuv dlim ntawm kuv cov yeebncuab lossis cov tuabneeg kws tsimtxom kuv?

²⁴“Mej ca le qha kuv, kuv yuav nyob tuabywv noog; qha saib kuv ua txhum dlaabtsi.

²⁵Tej lug tseeb hloov tau lwm tug lub sab, tabsis mej tej lug tsi muaj qaabhau le.

²⁶Mej xaav has tas, tej lug kws kuv has tsi muaj qaabhau ib yaam le cua ntsawj xwb los; tabsis ua le caag mej tsua teb kuv tej lug kws taag kev ca sab hab?

²⁷Txawm yog tej mivnyuas ntsuag los mej muab rhu ntawv coj moog ua qhev, hab ua tsi ncaaj rua mej tej phoojywg zoo kuas mej npluanuj!

²⁸Mej saib kuv lub ntsejmuag kuv yeej tsi dlaag.

²⁹Mej has ntau dlhau hwv lawm, ca le tseg tej kws mej has tsi tseeb. Tsi xob lam has tas kuv ua txhum, rua qhov kuv yeej ua yog lawm.

³⁰Tabsis mej xaav has tas, kuv yog tuabneeg dlaag, mej xaav has tas, kuv tsi paub qhov yog hab qhov tsi yog.”