Read Hmong Njua Yauj 9 Bible Online

Yauj 9 - Hmong Njua bible

Yauj 9

¹Yauj has tas, “Kuv tub nov dlua tej ko lug lawm. Tabsis tuabneeg yuav ua le caag ua plaub yeej Vaajtswv?

³Leejtwg yuav ua le caag caav yeej Vaajtswv? Vaajtswv ib txheeb lu lug nug tsi muaj leejtwg teb tau ib lus le.

⁴Vaajtswv muaj fwjchim hab ntse heev; tsi muaj leejtwg tawmtsaam yeej nwg.

⁵Nwg tshem tej roob los roob yeej tsi paub le, hab nwg txujkev chim rhuav tej roob puamtsuaj taag.

⁶Vaajtswv ua kuas aav qeeg hab cu kuas nplajteb ua zug koog; nwg dlaj tej ncej kws txheem lub nplajteb.

⁷Nwg txwv tau tsi pub kuas lub nub tawm tuaj, hab txwv tau tsi pub kuas tej nubqub ci mo ntuj.

⁸Yeej tsi muaj leejtwg paab Vaajtswv nthuav lub ntuj, lossis muab tug zaaj huv havtxwv tsuj nthi tseg.

⁹Vaajtswv muab tej nubqub: lub nubqub Ntsauv, lub nubqub Puj Sua Kwv Ntaas, cov nubqub Txhaj Txiv Mim, hab tej nubqub saab qaabteb teeb rua sau nruab ntug:

¹⁰Peb tsi totaub tej txujci tseemceeb kws nwg ua, hab tej txujci kws nwg ua yeej suav tsi txheeb le.

¹¹“Vaajtswv hlaa ntawm kuv hauv ntej, tabsis kuv tsi pum nwg, nwg lug ntawm kuv ib saab tabsis kuv tsi nov.

¹²Nwg muab tej kws nwg xaav yuav, tsi muaj leejtwg txwv tau; tsi muaj leejtwg muaj cuabkaav nug has tas, ‘Koj ua dlaabtsi?’

¹³Vaajtswv yuav tsi tshem nwg txujkev chim. Nwg yuav tsuj nwg cov yeebncuab kws paab tug Zaaj huv havtxwv kws tawmtsaam Vaajtswv.

¹⁴Yog le ntawd, kuv yuav ua le caag nrhav tau lug teb Vaajtswv?

¹⁵Txawm yog kuv tsi tau ua txhum le los kuv yeej tsi muaj cuabkaav teb nwg, kuv tsuas thov kuas Vaajtswv kws yog tug txav txim taabncuab kuv xwb.

¹⁶Txawm yog nwg pub kuv has los sov nwg puas yuav noog kuv tej lug.

¹⁷Txawm yog kuv tsi tau ua txhum los nwg tso naag xub naag cua lug ntsawj hab ntaus kuv nqaj dloog taag.

¹⁸Nwg tsi pub kuv hloov paa le, nwg ua rua kuv lub neej ab sab kawg le.

¹⁹Yog has txug qhov muaj zug, Vaajtswv yog tug muaj zug dlua! Yog has txug kev ncaaj nceeg, leejtwg txhaj yuav pev tau nwg?

²⁰Txawm yog kuv tsi tau ua txhum los tej lug kws kuv has rov rau txim rua kuv, txawm yog kuv ua zoo los Vaajtswv has tas kuv ua txhum.

²¹Kuv tsi tau ua txhum los tsi muaj leejtwg quavntsej kuv. Kuv dlhuav tsi xaav ua neej nyob lawm, tsi muaj dlaabtsi zoo rua kuv le. Txawm yog peb txhum hab tsi txhum los Vaajtswv yuav rhuav kuas puamtsuaj taag huv tuabsi.

²³Thaus ib tug tuabneeg tsi muaj txim ca le tuag, Vaajtswv khaws luag xwb.

²⁴Vaajtswv muab lub nplajteb nuav cob rua cov tuabneeg sab phem. Vaajtswv ua rua cov txav txim dligmuag taag. Yog tsi yog Vaajtswv ua, leejtwg yog tug ua?

²⁵“Kuv lub caij lub nyoog dlhau moog ceev tshaaj tej tuabneeg sis tw dlha, tabsis tsi muaj ib nub zoo le.

²⁶Kuv lub neej dlhau moog ceev ib yaam le lub nkoj kws dlha huv dlej, hab ceev ib yaam le tug dlaav kws yaa rwg si lug muab qab.

²⁷Yog kuv ua ntsejmuag luag ntxhi hab ua txuj nov qaab kuv tej mob, ces kuv tej kev txomnyem sab txawm rov lug tsimtxom kuv ntaag; kuv paub has tas, Vaajtswv tseem has tas kuv muaj txim.

²⁹Yog has tas kuv muaj txim, tseem yuav nkim kuv tug zug ua dlaabtsi?

³⁰Tsi muaj ib yaam tshuaj kws ntxuav tau kuv tej kev txhum le.

³¹Vaajtswv muab kuv pov rua huv paag aav nkus, txawm yog kuv tej rig tsho los tub tsi nyam kuv.

³²Kheev laam Vaajtswv yog tuabneeg, kuv yuav muaj cuabkaav teb nwg; wb yuav moog huv tsev tu plaub kuas luas txav txim rua wb tej lug sis caav.

³³Tabsis tsi muaj leejtwg nyob nruab nraab txav txim rua kuv hab Vaajtswv.

³⁴Vaajtswv, thov koj tsi xob rau txim rua kuv! Thov tshem koj tej kev nruj kev tsiv moog!

³⁵Kuv yeej tsi ntshai le. Kuv yuavtsum has xwb, rua qhov kuv yeej paub kuv lub sab.”