Read Hmong Njua Phoo Ntawv Nkauj 10 Bible Online

Phoo Ntawv Nkauj 10 - Hmong Njua bible

Phoo Ntawv Nkauj 10

¹Tug TSWV, vim le caag koj yuav nyob dleb ua luaj le? Vim le caag koj tsiv moog nkaum thaus peb raug kev txomnyem?

²Cov tuabneeg sab phem khaavtheeb hab tsimtxom cov tuabneeg pluag; puab nteg tau cov tuabneeg pluag, thaus cov tuabneeg pluag poob qhov.

³Cov tuabneeg sab phem khaavtheeb rua txujkev kws puab ntshaw ua phem ua qas. Cov tuabneeg sab hlub tsawm foom tug TSWV hab tsi leeg yuav nwg.

⁴Cov tuabneeg sab phem yeej tsi quavntsej txug tug TSWV, vim puab txujkev khaavtheeb, puab txhaj xaav has tas “Tsi muaj Vaajtswv”.

⁵Cov tuabneeg sab phem yeej vaammeej txhua yaam, tabsis puab tsi paub txug Vaajtswv txujkev txav txim, puab tsuas taab haaj luag puab cov yeebncuab plig xwb.

⁶Puab rov has rua puab tas, “Peb yuav tsi qaug ib zag le; hab peb yuav tsi raug kev txomnyem hlo le.”

⁷Puab has lug twm luas, dlaag luas hab has lug chob luas sab, puab has tej lug txaus ntxub hab tej lug phem lug qas xwb.

⁸Puab moog nkaum huv tej zog hab tog tua tej tuabneeg tsi muaj txim. Puab nyaag nrhw tua cov tuabneeg txomnyem kws tsi muaj leejtwg paab,

⁹Puab nkaum zuv tog luas ib yaam le tug tsuv ntxhuav. Puab zuv nteg cov tuabneeg pluag; puab nteg tau cov tuabneeg pluag thaus maag puab tej vuj hlua, hab muab hai moog povtseg.

¹⁰Cov tuabneeg tsi muaj tug paab raug luas caij tsuj, cov tuabneeg txomnyem qaug vim cov tuabneeg sab phem tug zug.

¹¹Cov tuabneeg sab phem xaav has tas, “Vaajtswv yeej tsi quavntsej peb. Nwg tub qe qhovmuag lawm, nwg yeej tsi pum kuv le!”

¹²Tug TSWV, ca le rau txim rua tug tuabneeg sab phem! Thov koj ncu ntsoov cov tuabneeg kws raug kev txomnyem!

¹³Yog le caag tug tuabneeg sab phem txhaj thuam Vaajtswv, hab xaav has tas, “Vaajtswv yeej tsi rau txim rua kuv le.”

¹⁴Tabsis koj yeej muaj qhovmuag pum, koj yeej mob sab txug kuv tej teebmeem hab tej kev txomnyem ntawd. Koj yeej npaaj rawv yuav paab. Cov tuabneeg kws tsi muaj leejtwg paab yuav lug cuag koj, koj yeej ibtxwm paab cov tuab- neeg kws raug txomnyem.

¹⁵Ca le rhuav cov tuabneeg sab phem hab ua phem ua qas lub fwjchim; rau txim rua puab vim tej kev txhum kws puab ua moog txug thaus puab tso tseg.

¹⁶Tug TSWV yog tug vaajntxwv kws nyob moog ibtxhis. Cov tuabneeg kws pe lwm tsaav tuabneeg tej vaajtswv, tug TSWV yuav muab ntab tawm huv nwg lub tebchaws moog.

¹⁷Tug TSWV, koj yeej noog cov tuabneeg kws tsi muab hlub tej lug thov, koj yuav txhawb puab tug zug, kuas puab ua tau lub sab ntev.

¹⁸Koj nov cov tuabneeg kws raug luas tsimtxom hab cov mivnyuas ntsuag tej suab quaj; nyaj koj yuav tuaj puab tog hab txav txim ncaaj rua puab, koj yuav txav txim ncaaj rua puab, kuas tuabneeg nplajteb tsi xob ua phem ntxiv lawm.