Read Hmong Njua Phoo Ntawv Nkauj 102 Bible Online

Phoo Ntawv Nkauj 102 - Hmong Njua bible

Phoo Ntawv Nkauj 102

¹Tug TSWV, thov koj noog kuv tej lug thov, hab noog kuv lub suab kws thov koj paab!

²Thaus kuv raug kev txomnyem, thov koj tsi xob tsiv nraim kuv! Thov koj tig ntsej noog kuv tej lug hab teb kuv thaus kuv thov koj!

³Kuv txujsa taabtom yuav pluj moog ib yaam le cov paa nchu; hab kuv lub cev taabtom kub cuag suavtawg hlawv.

⁴Kuv raug luas tsuj qaug ib yaam le tej nroj qhuav; kuv txhaj tsi qaab lus noj kuv cov mov lawm.

⁵Kuv ntsaaj quas lawg; kuv lub cev tshuav tawv qhwv pobtxhaa lawm xwb.

⁶Kuv zoo le tug noog kws nyob tom taj suabpuam, zoo ib yaam le tug plaas kws nyob huv lub zog kws dlo quas cuas.

⁷Kuv pw tsi tsaug zug le; kuv zoo ib yaam le tug noog kws nyob khua sab khuav sau ruv tsev.

⁸Kuv tej yeebncuab tuaj txobthuam kuv taag nub; cov tuabneeg kws tuam mom kuv siv kuv lub npe foom tsi zoo.

⁹Vim koj chim hab npautawg, kuv txhaj noj tshauv ib yaam le noj mov, hab haus dlej los haus tau kuv cov kua muag. Koj muab kuv nqaa hab laim povtseg.

¹¹Kuv txujsa zoo ib yaam le tug dluab ntxoov ntxoo thaus yuav tsaus ntuj; kuv zoo ib yaam le tej nroj kws qhuav lawm.

¹²Tabsis tug TSWV, koj nyob sau koj lub zwmtxwv moog ibtxhis; Txhua tam tuabneeg yuav ncu ntsoov koj.

¹³Koj yuav sawv tseeg lug hlub Xi-oos; rua qhov tub txug lub sijhawm kws taabncuab Xi-oos lawm; lub sijhawm kws teem ca lug txug lawm lauj!

¹⁴Koj cov tubkhai nyam Xi-oos kawg le, txawm yog Xi-oos raug rhuav puamtsuaj ua tej pawg pobzeb lawm los puab tseem tshua nwg kawg le.

¹⁵Txhua tsaav tuabneeg yuav ntshai tug TSWV; txhua tug vaajntxwv kws nyob huv nplajteb nuav yuav ntshai nwg lub fwjchim.

¹⁶Thaus tug TSWV rov txhim khu lub nroog Xi-oos dlua tshab, nwg lub fwjchim yuav tshwm lug rua suavdlawg pum.

¹⁷Nwg yuav noog nwg tsaav tuabneeg kws tsi muaj leejtwg mob sab rua tej lug thov.

¹⁸Ca le muab tej kws tug TSWV tau ua taag lug lawm sau ca rua tej xeebntxwv yaav tom ntej tau nyeem, kuas cov tuabneeg kws tseem yuav yug lug txhaj tau qhuas Vaajtswv.

¹⁹Tug TSWV saib sau nwg lub chaw dlawbhuv sau ntuj tuaj, nwg nyob sau ntuj saib tuaj rua huv nplajteb.

²⁰Nwg nov cov tuabneeg kws raug txim tej suab quaj, hab nwg tso cov tuabneeg kws raug luas rau txim kuas dlim kev tuag.

²¹Hab tuabneeg yuav pav nwg lub npe huv Xi-oos, hab tuabneeg yuav qhuas nwg nyob huv lub nroog Yeluxalees

²²rua thaus kws ntau tsaav tuabneeg hab ntau lub tebchaws tuaj sis sau ua ke pehawm tug TSWV.

²³Tug TSWV txu kuv tug zug rua thaus kuv tseem hluas; nwg txav kuv txujsa kuas kuv ua neej nyob tsi ntev.

²⁴Vaajtswv, thov koj tsi xob coj kuv moog thaus kuv tseem yog ib nraab neej. Tug TSWV, koj yog tug nyob moog ibtxhis;

²⁵Thaus chivkeeb koj txhais teg tsim lub nplajteb hab tsim lub ntuj.

²⁶Tej ntawd yuav pluj moog taag, tabsis koj yuav nyob moog ibtxhis; tej ntawd yuav txawj qub hab ndluag ib yaam le tej tsoog tsho. Koj yuav muab tej ntawd hloov ib yaam le luas hloov rig tsho, ces tej ntawd yuav pluj moog.

²⁷Tabsis koj zoo le qub hab koj yuav nyob moog ibtxhis tsi txawj kawg le.

²⁸Peb tej tubki yuav nyob kaaj sab lug, vim koj yog tug tiv thaiv, mas puab cov xeebntxwv yuav nyob tso sab plhuav.