Read Hmong Njua Phoo Ntawv Nkauj 103 Bible Online

Phoo Ntawv Nkauj 103 - Hmong Njua bible

Phoo Ntawv Nkauj 103

¹Kuv lub sab, ca le qhuas tug TSWV! Taagnrho kuv lub cev ca le qhuas nwg lub npe kws dlawbhuv!

²Kuv lub sab, ca le qhuas tug TSWV, hab ncu ntsoov nwg txaj ntsig.

³Nwg zaam kuv tej kev txhum huv tuabsi, hab khu kuv tej mob zoo hlo.

⁴Nwg paab kuv dlim kev pluj kev tuag nwg hlub kuv hab taabncuab kuv, nwg foom koob moov rua kuv.

⁵Nwg pub txhua yaam zoo rua kuv lub neej, yog le ntawd kuv txhaj tseem hluas hab muaj zug khov kho ib yaam le tug dlaav.

⁶Tug TSWV paab cov kws raug luas tsimtxom hab nwg tuaj puab tog paab kuas puab yeej.

⁷Tug TSWV qha nwg teg num rua Mauxes hab pub rua cov Yixalayees pum nwg tej txujci kws tseemceeb.

⁸Tug TSWV yog tug muaj sab dlawb sab zoo hab muaj kev hlub, nwg tsi chim sai hab nwg hlub moog ibtxhis.

⁹Nwg tsi tshev hab nwg tsi chim moog ibtxhis.

¹⁰Nwg tsi rau txim rua peb lawv le tej kev txhum kws tsimnyog peb raug lossis tsi ua pauj peb lub txim hab tej kev txhum kws peb ua.

¹¹Lub ntuj nyob sab dlhau lub nplajteb npaum le caag, tug TSWV hlub cov kws fwm nwg heev npaum le ntawd.

¹²Nubtuaj dleb nubpoob npaum le caag, tug TSWV muab peb tej kev txhum moog povtseg dleb npaum le ntawd.

¹³Leej txiv hlub nwg cov mivnyuas npaum le caag, tug TSWV hlub cov kws fwm nwg npaum le ntawd.

¹⁴Tug TSWV paub has tas, nwg muab dlaabtsi lug tsim peb; nwg ncu ntsoov has tas, peb yog moov aav xwb.

¹⁵Peb txujsa zoo ib yaam le tej nroj tsuag; peb luj hlub mog nyoos ib yaam le lub paaj nroj;

¹⁶thaus cua ntsawj lub paaj ntawd txawm zeeg lawm, hab tsi muaj leejtwg rov pum lub paaj ntawd dlua.

¹⁷Tabsis tug TSWV hlub cov tuabneeg kws fwm nwg moog ibtxhis, hab nwg muaj sab dlawb sab zoo rua txhua tam tuabneeg.

¹⁸Yog pub rua cov tuabneeg kws coj lawv le nwg tej lug cog tseg; hab noog nwg tej lug qhuab qha kawg sab kawg ntsws.

¹⁹Tug TSWV muab nwg lub zwmtxwv txawb rua sau ntuj; nwg yog tug kws kaav ib puas tsaav yaam huv tuabsi.

²⁰Cov timtswv ceebtsheej kws muaj zug hab muaj fwjchim ua lawv le tug TSWV tej lug qhuab qha, hab noog tej lug kws nwg has, mej ca le qhuas tug TSWV!

²¹Txhua yaam kws muaj fwjchim nyob sau qaum ntuj, mej yog tug TSWV cov tubkhai kws ua lawv le nwg sab nyam, ca le qhuas tug TSWV!

²²Txhua yaam kws tug TSWV tsim lug nyob txhua qhov kws tug TSWV kaav, ca le qhuas tug TSWV. Kuv lub sab ca le qhuas tug TSWV!