Read Hmong Njua Phoo Ntawv Nkauj 104 Bible Online

Phoo Ntawv Nkauj 104 - Hmong Njua bible

Phoo Ntawv Nkauj 104

¹Kuv lub sab ca le qhuas tug TSWV! Tug TSWV kws yog kuv tug Vaajtswv, koj yog tug muaj fwjchim luj! Koj lub koob meej hab tug tshwjchim ci ntsaa ab puagncig koj;

²koj muab qhov kaaj qhwv koj. Koj muab lub ntuj nthuav ib yaam le nthuav lub tsevntaub,

³koj tsim koj lub tsev rua sau cov nplaim dlej kws nyob sau qaum ntuj. Koj siv cov fuab ua koj lub tsheb hab koj caij sau tej cua.

⁴Koj siv tej cua ua koj cov tub xaa xuv hab tej tsaglig xub kws cig lab vog ua koj cov tubkhai.

⁵Koj muab lub nplajteb txawb khov rua ntawm tej ncej kws txheem, lub nplajteb yuav nyob qhov ntawd tsi txaav chaw le.

⁶Koj kuas dlej havtxwv laum nkaus lub nplajteb; ib yaam le tej tsoog tsho qhwv nkaus tuabneeg lub cev, hab dlej nyaab puv nkaus sau tej hauv roob.

⁷Thaus koj nthe nqho, dlej txawm ndlwg; thaus dlej nov koj lub suab has, dlej ca le ndlwg laub lug lawm.

⁸Tej dlej ntawd ndlwg sau tej roob hab huv tej haav txhua nrho lug rua ntawm qhov chaw kws koj tsim ca rua tej dlej ntawd.

⁹Koj kem nrim tseg kuas dlej tsi muaj peevxwm ndlwg dlhau tug nrim ntawd, kuas tej dlej ntawd txhaj tsi ndlwg lug nyaab lub nplajteb nuav dlua.

¹⁰Koj tsim tej dlej cag ndlwg lawv tej kwj haa hab tej dlej kws ndlwg lawv tej kwj dleg.

¹¹Tej dlej ntawd txhawv lug rua tej tsaj qus haus; hab tej neeg luav qus haus thaus tshaib nqhes.

¹²Tej naag noog lug ua zeg rua sau tej ntoo kws nyob ze rua ntawm ntug dlej hab quaj seev yeeg.

¹³Koj tso naag sau ntuj lug ywg tej roob, koj foom koob moov rua txhua qhov thoob plawg lub nplajteb.

¹⁴Koj tsim kuas muaj tej nroj tsuag hlaav mog nyoos rua tej tsaj txhu noj hab muaj qoobloo rua tuabneeg cog kuas tuabneeg txhaj muaj noj muaj haus,

¹⁵hab muaj cawv txiv maab lug haus ua rua tuabneeg zoo sab, kuas muaj tej roj txiv ntoo ua rua tuabneeg luag ntxhi hab muaj mov ua rua tuabneeg muaj zug tuaj.

¹⁶Tej ntoo cab peg Lenpanoos puavleej tau dlej naag txaus, tej ntoo ntawd yeej yog tug TSWV le, nwg yog tug cog ca.

¹⁷Tej noog lug ua zeg rua sau tej ntoo ntawd hab us dlej lug ua zeg rua ntawm tej ntoo thuv.

¹⁸Tej sai nyob sau tej roob sab hab tej Ntximtsua nyob huv tej qhov tsua.

¹⁹Koj tsim muaj lub hli lug quas hli hab quas xyoo; lub nub nwg paub nwg lub caij kws poob qho.

²⁰Koj tsim kuas muaj mo ntuj hab thaus tsaus ntuj tej tsaj nruab nraag tawm tuaj nrhav noj.

²¹Tej thaav tsuv ntxhuav nyooj lawg tawm moog nrhav tej tsaj kws Vaajtswv pub rua puab noj.

²²Thaus nub tawm tuaj tej tsaj ntawd txawm rov moog nkaum rua huv tej qhov kws puab txeev pw;

²³ces tej tuabneeg maam le tawm moog ua puab tej num, hab ua num tsi su moog txug thaus tsaus ntuj.

²⁴Tug TSWV, koj tsim ib puas tsaav yaam! Thaus peb saib tej kws koj tsim ntawd ua rua peb pum has tas koj yog tug muaj tswvyim! Lub nplajteb puv nkaus ib puas tsaav yaam kws koj tsim tseg.

²⁵Muaj havtxwv luj hab dlaav heev, muaj tsaj luj hab tsaj miv suav tsi txheeb nyob huv.

²⁶Muaj tej nkoj kws tuabneeg tsaav moog lug huv havtxwv, muaj Levi-athas kws yog tug zaaj kws koj tsim tseg nyob ua si khuav huv havtxwv.

²⁷Tej zaaj ntawd tog ntsoov koj pub rua puab noj puab haus thaus tshaib nqhes.

²⁸Thaus koj pub rua puab noj, puab txhaj tau noj; koj pub rua puab muaj noj muaj haus, puab txhaj tau noj tau haus tsau.

²⁹Thaus koj fee plhu tsi quavntsej, puab ntshai kawg le; thaus koj rhu koj txuj paa ntawm puab moog lawm, ces puab txawm tuag hab puab moog ua aav luaj le qub.

³⁰Tabsis thaus koj rau sav rau paa rua puab puab caj sa tuaj, koj pub txujsa tshab rua lub nplajteb.

³¹Thov kuas tug TSWV tug tshwjchim kws ci ntsaa ab nyob moog ibtxhis! Thov kuas tug TSWV tsuas muaj zoo sab rua tej kws nwg tsim lawm!

³²Tug TSWV tsaa muag saib lub nplajteb lub nplajteb ua zug koog; tug TSWV kov tej hauv roob, tej hauv roob txawm nchu paa auv nab tawm tuaj.

³³Kuv yuav hu nkauj qhuas tug TSWV taag kuv simneej; kuv yuav hu nkauj ua kuv tug Vaajtswv tsaug moog txug nub kuv tuag.

³⁴Thov kuas kuv tej nkauj hum nwg sab, rua qhov nwg yog tug kws ua rua kuv zoo sab luag ntxhi.

³⁵Thov kuas cov tuabneeg ua txhum raug puamtsuaj tu noob nrho huv nplajteb nuav moog; thov tsi xob tseg ib tug tuabneeg sab phem nyob hlo le. kuv lub sab, ca le qhuas tug TSWV! Ca le qhuas tug TSWV!