Read Hmong Njua Phoo Ntawv Nkauj 105 Bible Online

Phoo Ntawv Nkauj 105 - Hmong Njua bible

Phoo Ntawv Nkauj 105

¹Ca le ua tug TSWV tsaug, ca le pav nwg lub koob lub npe kws zoo kawg nkaus; ca le qha kuas txhua tsaav tuabneeg paub tug TSWV tej num kws nwg tau ua.

²Ca le hu nkauj qhuas tug TSWV; ca le qha kuas txhua tug paub tug TSWV tej txujci tseemceeb kws nwg tau ua.

³Ca le zoo sab rua qhov peb yog Vaajtswv tug; txhua tug kws pehawm nwg ca le zoo sab.

⁴Ca le moog cuag tug TSWV hab thov nwg paab, hab naj nub pehawm nwg.

⁵Mej cov kws yog Anplahaas kws yog tug TSWV tug tubkhai cov xeebntxwv, mej cov kws yog Yakhauj tug kws tug TSWV xaiv tseg cov xeebntxwv: mej yuavtsum ncu ntsoov tej txujci tseemceeb kws tug TSWV ua hab nwg txujkev txav txim.

⁷Tug TSWV yog peb tug Vaajtswv; nwg yog tug kws txav txim rua tuabneeg nplajteb txhua tug.

⁸Nwg yuav ceev nwg tej lug cog tseg moog ibtxhis, nwg tej lug cog tseg kaav txug ib txheeb tam tuabneeg.

⁹Tug TSWV yuav ceev tej lug kws nwg tau cog tseg rua Anplahaas, hab tej lug kws nwg tau cog tseg rua Ixaj lawm.

¹⁰Tug TSWV coglug rua Yakhauj tuab zag xwb kaav moog ibtxhis.

¹¹Nwg has tas “Kuv yuav muab lub tebchaws Kana-aas rua koj ua koj tug moog le.”

¹²Thaus Vaajtswv tsaav tuabneeg tsi tau fuamvaam coob mas puab tsiv ib qho rua ib qho huv lub tebchaws Kana-aas.

¹³Puab tsiv ib tsaav tuabneeg moog rua ib tsaav tuabneeg, hab puab tsiv ib lub tebchaws moog rua ib lub tebchaws.

¹⁴Tabsis Vaajtswv tsi pub leejtwg tsimtxom puab le; nwg tsomkwm puab hab txwv tej vaajntxwv has tas:

¹⁵“Mej tsi xob ua le caag rua kuv cov tubkhai kws kuv xaiv lawm; mej tsi xob kov kuv cov cevlug.”

¹⁶Tug TSWV rhu puab tej zaub mov lawm, hab tso kev tshaib nqhes rua puab lub tebchaws.

¹⁷Tabsis nwg tso ib tug txivneej ua puab ntej moog, tug ntawd yog Yauxej tug kws raug muab muag moog ua luas qhev.

¹⁸Luas muab saw hlau khi nwg ob txhais kutaw, hab muab khawb khawm nwg cejdlaab,

¹⁹moog txug thaus Yauxej tej lug tshwm muaj tseeb. Tug TSWV tej lug ua timkhawv qha has tas Yauxej yog tug ncaaj.

²⁰Ces tug vaajntxwv kws kaav tebchaws Iziv txhaj saamfwm kuas cov numtswv kws saib pejxeem muab Yauxej tso.

²¹Vaajntxwv tsaa Yauxej ua ib tug nom luj hab ua tug tswj thoob plawg lub tebchaws;

²²Yauxej muaj fwjchim luj tshaaj vaajntxwv tsoom numtswv txhua tug hab muaj fwjchim saamfwm rua vaajntxwv cov tuavxaam txhua tug.

²³Ces Yakhauj txhaj tsiv moog rua nraag tebchaws Iziv, hab moog nyob huv lub tebchaws ntawd lawm.

²⁴Tug TSWV pub nwg tsaav tuabneeg muaj tubki fuamvaam coob, hab ua rua puab muaj zug tshaaj puab cov yeebncuab.

²⁵Nwg ua kuas cov tuabneeg Iziv ntxub nwg tsaav tuabneeg, hab dlaag ntxag nwg cov tubkhai.

²⁶Ces nwg khaiv Mauxes kws yog nwg tug tubkhai, hab Aloos tug kws nwg xaiv tseg lawm moog.

²⁷Mauxes hab Aloos tau ua Vaajtswv teg num luj hab ua tej txujci tseemceeb huv tebchaws Iziv.

²⁸Vaajtswv tso kev tsaus ntuj lug rua huv tebchaws Iziv, tabsis cov tuabneeg Iziv tsi noog nwg tej lug saamfwm.

²⁹Tug Tswv muab puab tej dlej hloov ua ntshaav hab ua rua puab tej ntseg tuag taag huv tuabsi.

³⁰Muaj qaav lug puv nkaus huv puab lub tebchaws; hab lug puv nkaus rua huv vaajntxwv lub loog.

³¹Vaajtswv has, ces txawm muaj yoov qab hab yoov nyuj yaa lug puv nkaus huv lub tebchaws.

³²Vaajtswv tso lawg lug hloov naag hab tsaglig xub cig lab vog lug rua huv puab lub tebchaws.

³³Vaajtswv ua rua puab tej txiv maab, txiv ncuav pas hab tej ntoo luv tuag taag.

³⁴Vaajtswv has, ces txawm muaj kooj yaa lug, muaj ntau vaam tug kooj suav tsi txheeb le;

³⁵Cov kooj ntawd noj tej ntoo hab tej qoobloo thoob plawg lub tebchaws taag dlu lug.

³⁶Vaajtswv tua cov tuabneeg Iziv txhua yim tug tub hlub tuag taag.

³⁷Ces tug TSWV txhaj coj cov Yixalayees tsiv tawm; puab coj nyaj coj kub ntau heev nrug puab moog, puab txhua tug puavleej noj qaab nyob zoo hab muaj zug quas npho.

³⁸Cov Iziv ntshai cov Yixalayees kawg le hab zoo sab kws cov Yixalayees tsiv moog lawm.

³⁹Vaajtswv ua ib tauv fuab lug roog nwg tsaav tuabneeg, hab ua tug nplaim tawg rua puab pum kev mo ntuj.

⁴⁰Puab thov hab nwg tso noog ncuab lug; nwg tso manas sau ntuj lug rua puab noj nplua mag.

⁴¹Nwg rua pobzeb ces dlej txawm txhawv tawm lug, hab ndlwg moog rua huv taj suabpuam cuag le ib tug dlej.

⁴²Nwg ncu ntsoov nwg tej lug tseemceeb kws nwg tau cog tseg rua nwg tug tubkhai Anplahaas lawm.

⁴³Yog le ntawd, nwg txhaj coj tsaav tuabneeg kws nwg xaiv tseg tawm moog, ces puab hu nkauj zoo sab kawg le.

⁴⁴Nwg muab lwm tsaav tuabneeg tej tebchaws lug ua nwg tsaav tuabneeg tug, hab ca nwg tsaav tuabneeg tau kaav luas tej tebchaws.

⁴⁵Yog le ntawd nwg tsaav tuabneeg txhaj le ceev nwg tej kevcai hab ua lawv le nwg tej lug saamfwm. Ca le qhuas tug TSWV!