Read Hmong Njua Phoo Ntawv Nkauj 107 Bible Online

Phoo Ntawv Nkauj 107 - Hmong Njua bible

Phoo Ntawv Nkauj 107

¹“Ca le ua tug TSWV tsaug, nwg yog tug kws muaj lub sab zoo; nwg txujkev hlub nyob moog ibtxhis!”

²Mej cov kws tug TSWV cawm dlim lawm, ca le rov has cov lug nuav txhua zag kws mej qhuas tug TSWV. Nwg tau cawm mej dlim ntawm mej cov yeebncuab,

³hab coj mej tawm huv lwm tsaav tuabneeg tej tebchaws, tsi has nubtuaj, nubpoob, qaumteb hab qaabteb rov qaab lug.

⁴Muaj ibtxha moog moog lug lug tom taj suabpuam, vim puab nrhav tsi tau kev moog rua huv lub nroog kws puab yuav moog nyob.

⁵Puab tshaib plaab hab nqhes dlej heev, puab tsi muaj chaw ca sab rua qhov twg le.

⁶Thaus puab raug kev nyuaj sab, puab hu txug tug TSWV, nwg kuj cawm puab dlim kev txomnyem.

⁷Nwg coj puab taug kev ncaaj nraim moog rua huv lub nroog kws puab nyob.

⁸Puab yuav ua tug TSWV tsaug, vim nwg txujkev hlub kws tsi paub kawg, hab vim tej txujci tseemceeb kws nwg tau ua paab puab lawm.

⁹Nwg pub dlej rua cov tuabneeg nqhes dlej haus kuas txaus sab, hab pub zaub mov rua cov tuabneeg tshaib plaab noj tsau npo.

¹⁰Muaj qee leej nyob huv txujkev kws tsaus ntuj nti hab nyuaj sab ntxhuv plawv kawg le, puab raug luas muab saw hlau khi rau txim txomnyem ntsuav;

¹¹vim puab tawv nyom tug Vaajtswv kws muaj Fwjchim Luj kawg nkaus tej lug saamfwm hab tsi noog nwg tej lug qha.

¹²Puab qaug zug vim ua num nyaav; puab qaug los tsi muaj leejtwg paab.

¹³Thaus puab raug kev nyuaj sab, puab hu tug TSWV, nwg cawm puab dlim txujkev txomnyem.

¹⁴Nwg coj puab tawm huv txujkev nyuaj sab ntxhuv plawv hab kev tsaus ntuj nti lug; hab nwg ua rua tej saw hlau kws khi puab tu pis nrho.

¹⁵Puab yuavtsum ua tug TSWV tsaug, vim nwg txujkev hlub kws tsi paub kawg hab vim nwg tej txujci tseemceeb kws nwg tau ua paab puab lawm.

¹⁶Nwg tsoo tej qhovrooj kws yog tooj povtseg, hab tsoo tej nqaaj hlau ntsoog mog nyoos.

¹⁷Muaj qee leej ruag hab raug txomnyem vim tej kev txhum hab kev phem kev qas kws puab ua;

¹⁸puab dlhuav zaub mov kawg le puab tub yuav tuag.

¹⁹Thaus puab raug kev nyuaj sab, puab hu tug TSWV, nwg kuj paab puab dlim kev txomnyem.

²⁰Tug TSWV has xwb, ces puab tej mob txawm zoo hab nwg cawm puab dlim txujkev tuag.

²¹Puab yuavtsum ua tug TSWV tsaug, vim nwg txujkev hlub kws tsi paub kawg, hab vim tej txujci tseemceeb kws nwg tau ua paab puab lawm.

²²Puab yuavtsum fij khoom ua nwg tsaug hab zoo sab luag ntxhi hu nkauj qha txhua yaam kws tug TSWV tau ua lawm rua suavdlawg noog.

²³Muaj qee leej tsaav nkoj moog lug sau havtxwv, ua laag ua luam nrhav noj.

²⁴Puab pum tej num kws tug TSWV muaj tswvyim ua tau, yog nwg tej txujci tseemceeb kws nyob huv havtxwv.

²⁵Vaajtswv has ces txawm muaj tej nthwv cua ntsawj tuaj ua rua dlej ndlaas nphau nphwv.

²⁶Tej nkoj tshoom pis plawg rua sau nruab cua hab poob rov lug. Tej xwm nuav ua rua tuabneeg poob sab hab ntshai kawg;

²⁷Puab qaug puj poog ib yaam le tej tuabneeg qaug cawv, puab tej kev txawj ntse paab tsi tau puab lawm.

²⁸Thaus puab raug kev nyuaj sab puab hu tug TSWV, nwg kuj cawm puab dlim kev txomnyem.

²⁹Nwg ua rua tej cua dlaaj cua dlub tu, hab ua rua dlej havtxwv nyob tug yeeg.

³⁰Puab zoo sab heev vim cua dlaaj cua dlub tu hab dlej havtxwv tug lawm, tug TSWV coj puab lug txug ndlua lub chaw nreg nkoj lawv le puab sab xaav tsi raug kev nyuaj sab le caag.

³¹Puab yuavtsum ua tug TSWV tsaug, vim nwg txujkev hlub kws tsi paub kawg hab vim tej txujci tseemceeb kws nwg tau ua paab puab lawm.

³²Puab yuavtsum pav tug TSWV lub fwjchim kws luj rua zeej tsoom suavdlawg paub, hab qhuas nwg rua ib tsoom thawjcoj kws tuaj ua ke saablaaj noog.

³³Tug TSWV ua rua tej dlej tu qhuav qhawv hab ua rua tej dlej cag tu nrho tsi ndlwg le lawm.

³⁴Nwg ua rua tej aav rog qaab ntsev tsi zoo cog dlaabtsi, vim cov tuabneeg kws nyob huv thaaj aav ntawd ua phem ua qas.

³⁵Nwg muab tej taj suabpuam hloov ua paag dlej hab ua kuas muaj qhovdlej txhawv huv tebchaws mojsaab qhua.

³⁶Nwg ca cov tuabneeg tshaib nqhes lug nyob rua huv; ces puab txawm rhawv nroog nyob rua qhov ntawd.

³⁷Puab cog qoob hab txiv maab rua huv tej teb hab sau tau qoobloo ntau nplua mag.

³⁸Tug TSWV foom koob moov rua nwg tsaav tuabneeg muaj tubki fuamvaam coob; nwg tsi pub puab tej tsaj txhu tu noob le.

³⁹Thaus Vaajtswv tsaav tuabneeg swb rog, vim raug luas tsimtxom hab raug kev txomnyem,

⁴⁰thaus ntawd Vaajtswv thuam hab saib tsi taug cov numtswv, hab ua kuas puab moog moog lug lug tom taj suabpuam kws tsi muaj kev ca sab.

⁴¹Tabsis nwg cawm cov tuabneeg pluag kuas dlim txujkev txomnyem hab pub kuas puab tej tubki fuamvaam coob ib yaam le tej paab yaaj.

⁴²Thaus cov tuabneeg ncaaj nceeg pum tej xwm nuav, mas puab zoo sab kawg le, tabsis cov tuabneeg ua phem nyob ntsag tu has tsi taug ib lu lug le.

⁴³Thov kuas cov tuabneeg muaj tswvyim raag txug tej nuav, thov kuas puab leeg paub has tas tug TSWV yog tug kws muaj txujkev hlub tsi paub kawg.