Read Hmong Njua Phoo Ntawv Nkauj 111 Bible Online

Phoo Ntawv Nkauj 111 - Hmong Njua bible

Phoo Ntawv Nkauj 111

¹Ca le qhuas tug TSWV! Kuv yuav ua tug TSWV tsaug kawg sab kawg ntsws taabmeeg Vaajtswv tsaav tuabneeg kws tuaj sis sau ua ke.

²Tej txujci tseemceeb kws tug TSWV ua luj kawg le! Txhua tug kws txaus sab rua tej txujci ntawd, mas puab xaav paub tej txujci ntawd kawg le.

³Txhua yaam kws tug TSWV ua, tseemceeb hab muaj koob meej kawg le; nwg txujkev ncaaj nceeg nyob moog ibtxhis.

⁴Tug TSWV yeej ua kuas peb ncu ntsoov nwg tej txujci tseemceeb moog le; nwg yog tug muaj lub sab zoo hab taabncuab suavdlawg.

⁵Nwg pub rua cov tuabneeg kws fwm nwg muaj noj muaj haus tsi tu pluag; nwg yeej ncu ntsoov nwg tej lug cog tseg moog le.

⁶Nwg qha nwg lub fwjchim luj rua nwg tsaav tuabneeg kws yog nwg muab lwm tsaav tuabneeg tej tebchaws rua puab.

⁷Ib puas tsaav yaam kws nwg ua, puavleej tseeb hab ncaaj nceeg; nwg tej lug qha yog tej kws ca sab tau.

⁸Nwg tej lug qha kaav moog ibtxhis; tej lug ntawd qha qhov tseeb qhov ncaaj.

⁹Nwg tso nwg tsaav tuabneeg dlim, hab coglug rua puab moog ibtxhis. Nwg yog tug dlawbhuv hab muaj fwjchim luj kawg le!

¹⁰Tug kws fwm tug TSWV; tug ntawd txhaj yog tug muaj tswvyim, nwg pub kev totaub rua cov kws fwm nwg hab noog nwg tej lug saamfwm. Tsimnyog qhuas nwg lub npe moog ibtxhis.