Read Hmong Njua Phoo Ntawv Nkauj 112 Bible Online

Phoo Ntawv Nkauj 112 - Hmong Njua bible

Phoo Ntawv Nkauj 112

¹Ca le qhuas tug TSWV! Tug kws fwm tug TSWV, yog tug kws tau koob moov, tug kws txaus sab noog tug TSWV tej lug, yog tug kws tau kev zoo sab.

²Tug tuabneeg sab zoo caajceg yuav muaj fwjchim huv lub tebchaws; nwg cov xeebntxwv yuav tau koob moov.

³Nwg caajceg yuav muaj txag npluanuj hab yuav vaammeej moog le.

⁴Txawm yog cov tuabneeg ncaaj nceeg nyob rua huv qhov tsaus ntuj los qhov kaaj yuav ci pum kev kaaj nrig rua puab, vim puab muaj lub sab ncaaj, puab hlub hab taabncuab lwm tug.

⁵Tug kws ua sab dlawb paug qev rua luas, hab ua num ncaaj nceeg, yog tug kws tau koob moov.

⁶Tug kws ua ncaaj nceeg lub koob meej yuav tsi poob, luas yuav ncu ntsoov nwg moog ibtxhis.

⁷Txawm yog nov tej xuv tsi zoo los nwg yeej tsi ntshai; nwg ntseeg ruaj hab tso sab rua tug TSWV.

⁸Nwg tsi txhawj hab tsi ntshai le; nwg paub has tas, nwg cov yeebncuab yuav swb.

⁹Nwg ua sab dlawb paug pub rua cov pluag, hab nwg hlub luas tsi tu le; nwg yuav tau koob meej hab suavdlawg yuav fwm nwg.

¹⁰Cov tuabneeg sab phem pum tej nuav mas puab chim heev; puab zawm nav zog hab ntxub nwg heev los puab kuj pluj taag; puab taag kev ca sab moog ibtxhis le.