Read Hmong Njua Phoo Ntawv Nkauj 116 Bible Online

Phoo Ntawv Nkauj 116 - Hmong Njua bible

Phoo Ntawv Nkauj 116

¹Kuv hlub tug TSWV, vim nwg nov kuv tej lug; nwg noog kuv tej lug thov.

²Txhua zag kws kuv thov nwg, nwg noog kuv tej lug thov.

³Kev pluj kev tuag nyob puagncig kuv; lub qhov tuag nyob rawv tog kuv; ua rua kuv ntshai hab lwj sab ntsuav xwb.

⁴Ces kuv thov tug TSWV has tas, “Tug TSWV, kuv thov koj cawm kuv txujsa lauj!”

⁵Tug TSWV yog tug muaj lub sab dlawb sab zoo hab ncaaj nceeg; peb tug Vaajtswv yog tug muaj txujkev taabncuab.

⁶Tug TSWV tiv thaiv tug kws taag kev ca sab; thaus kuv raug kev txomnyem nwg cawm kuv dlim.

⁷Kuv lub sab, ca le tso sab plhuav, rua qhov tug TSWV ua zoo rua kuv.

⁸Tug TSWV cawm kuv dlim txujkev tuag; nwg so kuv lub kua muag hab tsi pub kuv swb le.

⁹Yog le ntawd, kuv txhaj ua kuv lub neej huv nplajteb nuav, nrug cov tuabneeg kws muaj sa nyob taabmeeg tug TSWV.

¹⁰Txawm yog muaj qee zag kuv ywg has tas “Kuv raug txomnyem heev lawm,”

¹¹hab thaus kuv ntshai, kuv has tas “Kuv tsi ca sab rua leejtwg le” los kuv tseem ca sab rua tug TSWV.

¹²Tug TSWV ua txhua yaam zoo rua kuv, kuv yuav muab dlaabtsi pauj nwg txaj ntsig?

¹³Kuv yuav coj cawv txiv maab tuaj fij rua tug TSWV, ua nwg tsaug rua qhov nwg cawm kuv dlim.

¹⁴Nub kws Vaajtswv tsaav tuabneeg tuaj txoos ua ke, kuv yuav coj tej kws kuv tau coglug tseg lawm tuaj fij rua nwg.

¹⁵Thaus tug TSWV cov tuabneeg ib tug kws muab sab npuab nwg tuag, tug TSWV mob sab heev.

¹⁶Tug TSWV, kuv yog koj tug tubkhai; kuv ua koj teg num ib yaam le kuv nam kws yog koj tug ntxhais qhev ua ntaag. koj tub dlaws txuj saw hlau kws khi kuv lawm.

¹⁷Kuv yuav muab khoom fij ua koj tsaug hab thov koj,

¹⁸thaus koj tsaav tuabneeg tuaj txoos ua ke rua huv koj lub Tuamtsev huv lub nroog Yeluxalees, kuv yuav muab tej kws kuv tau coglug tseg lawm fij rua koj. Ca le qhuas tug TSWV!