Read Hmong Njua Phoo Ntawv Nkauj 119 Bible Online

Phoo Ntawv Nkauj 119 - Hmong Njua bible

Phoo Ntawv Nkauj 119

¹Cov tuabneeg kws ua lub neej tsi muaj leejtwg thuam tau hab ua lub neej lawv le tug TSWV txuj kevcai; yog cov kws tau koob moov.

²Cov tuabneeg kws ua lub neej lawv le Vaajtswv tej lug saamfwm hab fwm nwg kawg sab kawg ntsws, yog cov kws tau koob moov.

³Puab tsi ua kev phem kev qas; tabsis puab ua lub neej lawv le tug TSWV tej lug qha.

⁴Tug TSWV, koj tau muab koj tej kevcai cob rua peb, hab qha kuas peb naj nub coj lawv le tej kevcai ntawd.

⁵Thov paab kuas kuv muaj lub sab npuab hab ua lawv le koj tej kevcai!

⁶Yog kuv ua lawv le koj tej lug saamfwm, ces kuv yuav tsi poob ntsejmuag le.

⁷Thaus kuv paub koj tej kevcai ncaaj nceeg lawm, kuv yuav qhuas koj ntawm lub sab dlawb paug.

⁸Kuv yuav fwm koj tej kevcai; thov koj tsi xob tso kuv tseg!

⁹Yuav ua le caag ib tug tub hluas txhaj ua tau nwg lub neej kuas dlawbhuv? Yog nwg yuavtsum coj lawv le koj tej lug saamfwm.

¹⁰Kuv yuav ua koj teg num kuas kawg kuv lub sab lub ntsws; thov paab kuas kuv tsi xob tawv dlhau koj tej lug saamfwm!

¹¹Kuv khaws koj tej lug rua huv kuv lub sab, kuv txhaj tsi ua txhum rua koj.

¹²Tug TSWV, kuv ua koj tsaug; thov qha koj tej kevcai rua kuv.

¹³Kuv yuav muab tej kevcai kws koj muab cob rua kuv lawm cim rua nruab sab.

¹⁴Kuv txaus sab ua lawv le koj tej lug saamfwm heev dlua kev muaj txag npluanuj.

¹⁵Kuv yuav naj nub kawm koj tej kevcai hab cim ntsoov koj tej lug.

¹⁶Kuv txaus sab heev rua koj tej kevcai; hab kuv yuav ncu ntsoov koj tej lug saamfwm.

¹⁷Thov koj ua zoo rua kuv kws yog koj tug tubkhai, kuas kuv txhaj muaj txujsa nyob noog koj tej lug.

¹⁸Thov koj qheb kuv ob lub qhovmuag, kuas kuv paub koj txuj kevcai hab pum koj tej txujci tseemceeb.

¹⁹Kuv ua neej nyob huv nplajteb nuav ib vuag xwb; thov tsi xob muab koj tej lug saamfwm zais tsi qha kuv paub.

²⁰Kuv lub sab xaav paub koj tej kevcai txhua lub sijhawm lug ntev lawm.

²¹Koj tshev cov tuabneeg khaavtheeb; hab foom tsi zoo rua cov tuabneeg kws tsi noog koj tej lug saamfwm.

²²Thov koj paab kuas kuv dlim ntawm cov tuabneeg kws saib tsi taug kuv hab thuam kuv, rua qhov kuv naj nub ua lawv le koj tej kevcai.

²³Txawm yog tej numtswv tuav huv ntxeev sab rua kuv; los kuv yuav kawm koj tej lug qha tsi tso tseg le.

²⁴Koj tej lug ua rua kuv muaj kev kaaj sab; tej lug ntawd yog tej kws qhuab ntuag kuv.

²⁵Kuv tub yuav tuag, kuv pw rua huv aav lawm xwb; thov koj tsaa kuv sawv rov lug lawv le koj tau coglug tseg lawm.

²⁶Thaus kuv qha txhua yaam kws kuv tau ua taag lug, hab koj tau teb kuv tej lug lawm, thov koj qha koj tej kevcai rua kuv.

²⁷Thov paab kuas kuv totaub koj tej kevcai, hab kuv yuav xaav ntsoov koj tej lug qhuab qha kws zoo kawg nkaus rua nruab sab.

²⁸Tej kev nyuaj sab ua rua kuv lwj sab quas ntsuav; thov koj txhawb kuv tug zug lawv le koj tau coglug tseg lawm.

²⁹Thov koj ua zoo rua kuv hab qha koj tej kevcai rua kuv, kuas kuv txhaj tsi yuam kev moog ua txhum.

³⁰Kuv xaiv txujkev kws muab lub sab npuab koj; kuv ua lub neej lawv le koj tej kevcai.

³¹Tug TSWV, kuv yeej ua lawv le koj tej kevcai; thov tsi xob ca kuv poob ntsejmuag.

³²Kuv yuav maaj nrooj ua lawv le koj tej lug saamfwm; rua qhov koj yuav ua rua kuv totaub tej lug ntawd.

³³Tug TSWV, thov qha koj tej kevcai lub ntsab rua kuv, kuv yuav naj nub ua lawv le tej kevcai ntawd.

³⁴Thov qha kuas kuv totaub koj tej kevcai, kuv yuav coj tej kevcai ntawd kawg sab kawg ntsws.

³⁵Thov koj coj kuv txuj hauv kev kuas moog lawv le koj tej lug saamfwm, rua qhov txuj kevcai ntawd ua rua kuv muaj kev kaaj sab.

³⁶Thov koj pub kuas kuv muaj lub sab txawj ntshaw koj tej kevcai heev dlua kev muaj txag npluanuj.

³⁷Thov koj paab kuas kuv tswj tau kuv ob lub qhovmuag tsi xob saib tej yaam tsi zoo; thov koj ua zoo rua kuv lawv le koj tau coglug tseg lawm.

³⁸Thov koj ua lawv le tej lug kws koj cog tseg rua kuv kws yog koj tug tubkhai, yog tej lug kws koj cog tseg rua cov tuabneeg kws fwm koj.

³⁹Thov tshem txujkev poob ntsejmuag kws kuv ntshai, kuas dleb ntawm kuv; rua qhov koj txuj kevcai ncaaj nceeg!

⁴⁰Kuv xaav ua lawv le koj tej lug saamfwm; kuv lub sab xaav ntsoov rua koj tej kevcai; thov pub txujsa tshab rua kuv, rua qhov koj yog tug ncaaj nceeg.

⁴¹Tug TSWV, thov qha rua kuv paub has tas, koj yeej hlub kuv tag, hab cawm kuv lawv le koj tau coglug tseg lawm.

⁴²Kuas kuv txhaj muaj lug teb cov tuabneeg kws thuam kuv, rua qhov kuv ca sab rua koj tej lug.

⁴³Thov paab kuas kuv naj nub has koj tej lug tseeb, rua qhov kuv ca sab ntsoov rua koj tej kevcai.

⁴⁴Kuv yuav naj nub ua lawv le koj tej kevcai moog ibtxhis le.

⁴⁵Kuv yuav ua neej nyob tso sab plhuav, rua qhov kuv ua lub neej lawv le koj tej kevcai.

⁴⁶Kuv yuav pav koj tej kevcai rua cov vaajntxwv noog, kuv yuav tsi txaajmuag le.

⁴⁷Kuv ua neej lawv le koj tej lug saamfwm, ua rua kuv muaj kev kaaj sab; rua qhov kuv nyam tej lug saamfwm ntawd heev.

⁴⁸Kuv nyam hab fwm koj tej lug saamfwm; kuv lub sab yuav xaav ntsoov txug koj tej kevcai.

⁴⁹Thov koj ncu ntsoov tej lug kws koj tau cog tseg rua kuv kws yog koj tug tubkhai lawm; tej lug cog tseg ntawd ua rua kuv muaj kev ca sab.

⁵⁰Txawm yog kuv raug kev txomnyem los tseem muaj koj txujlug nplig kuv sab, rua qhov koj tej lug cog tseg ua rua kuv muaj sa nyob.

⁵¹Cov tuabneeg kws khaavtheeb pheej thuam kuv; tabsis kuv yeej tsi tso koj tej kevcai tseg le.

⁵²Tug TSWV, thaus kuv xaav txug koj tej kevcai kws muaj nyob thaus u lug lawm, tej ntawd txhawb kuv zug kawg le.

⁵³Thaus kuv pum cov tuabneeg sab phem tsi coj lawv le koj tej kevcai, mas mob kuv sab kawg le.

⁵⁴Thaus kuv tseem ua neej nyob huv lub nplajteb nuav, kuv muab koj tej kevcai sau ua nkauj hu qhuas koj.

⁵⁵Tug TSWV, thaus tsaus ntuj los kuv yeej ncu ntsoov koj lub npe, hab kuv ua lawv le koj txuj kevcai.

⁵⁶Thaus kuv ua lawv le koj tej lug saamfwm, mas kuv muaj kev kaaj sab kawg le.

⁵⁷Tug TSWV, koj yog ib puas tsaav yaam kws kuv xaav yuav; kuv coglug tseg has tas kuv yuav ua lawv le koj txuj kevcai.

⁵⁸Kuv thov koj kawg sab kawg ntsws, kuas koj taabncuab kuv lawv le koj tau coglug tseg lawm!

⁵⁹Kuv tub tshuaj kuv lub neej taag lawm, kuv coglug has tas, kuv yuav ua lawv le koj tej lug qha.

⁶⁰Kuv tsi tog le lawm, kuv yuav rawm ua lawv le koj tej lug saamfwm.

⁶¹Cov tuabneeg sab phem cuab muv tog kuv kev, tabsis kuv yeej ncu ntsoov koj txuj kevcai.

⁶²Ntuj teb taag mo, kuv sawv lug qhuas koj, vim koj tej kevcai kws ncaaj nceeg.

⁶³Kuv ua phoojywg rua txhua tug kws fwm koj, hab rua txhua tug kws ua lawv le koj tej kevcai.

⁶⁴Tug TSWV, lub nplajteb puv nkaus koj txujkev hlub kws tsi paub kawg, thov qha koj tej kevcai rua kuv.

⁶⁵Tug TSWV, koj yeej ua lawv le koj tej lug cog tseg hab ua zoo rua kuv kws yog koj tug tubkhai.

⁶⁶Thov pub tswvyim hab kev txawj ntse rua kuv, rua qhov kuv ca sab rua koj tej lug saamfwm heev.

⁶⁷Thaus koj tsi tau ca kuv raug kev txomnyem, kuv yuam kev ua txhum, tabsis nwgnuav kuv coj lawv le koj tej lug qha.

⁶⁸Koj yog tug ua zoo hab muaj lub sab dlawb; thov qha koj tej kevcai rua kuv!

⁶⁹Cov tuabneeg kws khaavtheeb has lug dlaag kom kuv, tabsis kuv ua lawv le koj tej kevcai kawg sab kawg ntsws.

⁷⁰Cov tuabneeg ntawd tsi paub qaabhau dlaabtsi, tabsis koj txuj kevcai ua rua kuv zoo sab heev.

⁷¹Qhov kws koj ca kuv raug kev txomnyem muaj nqes rua kuv, rua qhov tej ntawd ua rua kuv paub koj tej kevcai.

⁷²Txuj kevcai kws koj muab rua kuv ntawd, muaj nqes tshaaj tej nyaj tej kub huv nplajteb nuav.

⁷³Koj yog tug tsim kuv hab cawm kuv dlim; thov pub kuas kuv totaub, kuv txhaj kawm tau koj tej kevcai.

⁷⁴Thaus cov tuabneeg kws fwm koj pum kuv, mas puab yuav zoo sab heev, rua qhov kuv ca sab rua koj tej lug cog tseg.

⁷⁵Tug TSWV, kuv paub has tas koj txujkev txav txim yeej ncaaj nceeg, qhov kws koj rau txim rua kuv, koj yeej ua ncaaj lawm.

⁷⁶Thov ca koj txujkev hlub kws tsi paub kawg nplig kuv lub sab, lawv le koj tau coglug rua kuv kws yog koj tug tubkhai lawm.

⁷⁷Thov koj taabncuab kuv, kuv txhaj muaj sa nyob, rua qhov koj tej kevcai ua rua kuv zoo sab heev.

⁷⁸Thov kuas cov tuabneeg kws khaavtheeb raug kev txaajmuag, rua qhov puab laam tau laam kom kuv; tabsis kuv yuav cim kuas tau koj tej kevcai rua nruab sab.

⁷⁹Thov ca cov tuabneeg kws fwm koj tuaj cuag kuv, kuas puab txhaj yuav paub koj tej kevcai.

⁸⁰Thov kuas kuv txawj fwm koj tej kevcai kawg sab kawg ntsws, kuv txhaj tsi raug kev txaajmuag.

⁸¹Tug TSWV, kuv tub yuav tuag, kuv tog ntsoov koj txujkev cawm dlim; kuv ca sab ntsoov rua koj tej lug.

⁸²Kuv tog koj tej lug cog tseg tau ntev heev ua rua kuv ob lub qhovmuag qheb tsi taug le lawm, thaus ntawd kuv has tas, “Taav twg koj maam le lug paab kuv?”

⁸³Kuv tsi muaj nqes ib yaam le lub naab tawv ntim cawv txiv maab kws luas tsi siv lawm; tabsis kuv yeej ncu ntsoov koj tej kevcai.

⁸⁴Kuv kws yog koj tug tubkhai tseem yuav ua sab ntev tog txug taav twg? Thaus twg koj maam le rau txim rua cov tuabneeg kws tsimtxom kuv?

⁸⁵Cov tuabneeg khaavtheeb kws tsi fwm koj txuj kevcai, khawb qhov tog kuv kev.

⁸⁶Koj tej kevcai yog tej kws tso sab tau rua; muaj tuabneeg tsimtxom kuv, thov koj paab kuv!

⁸⁷Puab txuv yuav laug tau kuv txujsa kuas pluj huv nplajteb nuav moog, tabsis kuv yeej tsi tso koj tej kevcai tseg le.

⁸⁸Rua qhov koj txujkev hlub kws tsi paub kawg ua zoo rua kuv, kuv txhaj ua tau lawv le koj tej kevcai.

⁸⁹Tug TSWV, koj txujlug yuav nyob moog ibtxhis; hab nyob ruaj nreeg sau qaum ntuj moog le.

⁹⁰Koj txujkev ncaaj nceeg nyob ib tam dlhau ib tam; koj teeb lub nplajteb nuav tseg le caag, nwg yeej nyob le ntawd moog le.

⁹¹Ib puas tsaav yaam nyob ruaj khov kho lug txug naj nub nua, tub yog vim tej lug kws koj tau has tseg, rua qhov ib puas tsaav yaam ntawd yog koj tej tubkhai.

⁹²Yog koj txuj kevcai tsi ua lub hauvpaug kws ua rua kuv zoo sab, ces kuv yuav ris tej kev txomnyem ntawd tuag le.

⁹³Kuv yuav ncu ntsoov koj tej lug qha moog ibtxhis; vim muaj tej lug ntawd, koj txhaj tseg kuv txujsa nyob.

⁹⁴Kuv yog koj tug, thov koj cawm kuv dlim! Kuv yeej ibtxwm xyum ua lawv le koj tej kevcai.

⁹⁵Cov tuabneeg sab phem tog rawv tua kuv povtseg, tabsis kuv yuav ua tuab zoo saib koj tej kevcai saib has le caag.

⁹⁶Kuv paub has tas tsi muaj ib yaam dlaabtsi kws yuav zoo taag huv tuabsi, tabsis koj tej kevcai yeej zoo kawg nkaus le.

⁹⁷Kuv nyam koj txuj kevcai kawg nkaus le! Kuv xaav ntsoov koj txuj kevcai ntawd taag nub taag mo.

⁹⁸Kuv coj rawv koj txuj kevcai txhua lub sijhawm, txuj kevcai ntawd ua rua kuv ntse dlua kuv cov yeebncuab.

⁹⁹Kuv paub dlua kuv cov xwbfwb, rua qhov kuv ua tuab zoo saib koj tej lug qha saib has le caag.

¹⁰⁰Kuv txawj ntse dlua cov tuabneeg laug, rua qhov kuv ua lawv le koj tej kevcai.

¹⁰¹Kuv yeej tsi nyam ua kev phem kev qas, rua qhov kuv xaav ua lawv le koj txujlug.

¹⁰²Kuv ncu ntsoov koj tej lug qha, rua qhov koj yog tug xwbfwb kws qha kuv ntaag.

¹⁰³Koj tej lug qha qaab zib tshaaj zib ntaab lawm hab!

¹⁰⁴Koj tej kevcai ua rua kuv muaj tswvyim, yog le ntawd, kuv txhaj ntxub txhua yaam kev phem.

¹⁰⁵Koj txujlug zoo ib yaam le lub teeb kws taws ua kuv ntej hab ci rua kuv txuj hauv kev.

¹⁰⁶Kuv yuav noog tej lug tseeb kws koj qha lawv le kuv tau coglug tseg rua koj lawm.

¹⁰⁷Tug TSWV, kuv raug kev txomnyem heev kawg nkaus, thov koj pub kuv muaj sa ua neej nyob lawv le tej lug kws koj cog tseg!

¹⁰⁸Tug TSWV, thov koj leeg tej lug kws kuv ua koj tsaug, hab thov qha koj tej kevcai rua kuv.

¹⁰⁹Kuv yeej txaus sab tuag txhua lub sijhawm; kuv yeej ncu ntsoov koj txuj kevcai rua nruab sab.

¹¹⁰Cov tuabneeg sab phem cuab muv tog kuv kev, tabsis kuv tsi hlaa koj tej kevcai le.

¹¹¹Koj tej kevcai yog kuv peev nyaj moog ibtxhis; hab ua rua kuv zoo sab tuabywv rua nruab sab.

¹¹²Kuv txav txim sab ua lawv le koj tej kevcai moog txug nub kawg.

¹¹³Kuv ntxub cov tuabneeg kws tsi muab sab npuab koj, tabsis kuv nyam koj txuj kevcai kawg le.

¹¹⁴Koj yog tug kws tuaj kuv tog hab tiv thaiv kuv; kuv ca sab rua koj tej lug cog tseg.

¹¹⁵Mej cov kws ua phem ua qas, ca le tsiv ntawm kuv moog. Kuv yuav ua lawv le kuv tug TSWV tej lug saamfwm.

¹¹⁶Thov txhawb kuv tug zug lawv le koj coglug tseg lawm, kuv txhaj muaj sa nyob; thov tsi xob ca kuv txujkev ca sab ua rua kuv poob ntsejmuag!

¹¹⁷Thov tuav kuv teg, kuv txhaj kaaj sab lug, kuv yuav naj nub ua lawv le koj tej kevcai moog ibtxhis.

¹¹⁸Koj tsi leeg paub cov kws tsi ua lawv le koj tej kevcai; puab tej kev dlaag ntxag tsi muaj qaabhau dlaabtsi le.

¹¹⁹Koj saib cov tuabneeg sab phem tsi muaj nqes le tej quav tooj quav hlau, tabsis kuv nyam koj tej lug qha kawg le.

¹²⁰Kuv ib ce tshee nyo, vim kuv ntshai heev, kuv ntshai koj txujkev txav txim kawg nkaus le.

¹²¹Kuv ua qhov tseeb hab qhov zoo xwb; thov tsi xob tso kuv rua kuv cov yeebncuab!

¹²²Thov koj coglug has tas, koj yuav paab koj tug tubkhai; thov si xob ca cov tuabneeg khaavtheeb tsimtxom kuv!

¹²³Kuv ob lub qhovmuag qheb tsi taug, vim kuv tog koj tuaj cawm kuv, rua qhov koj tau coglug tseg rua kuv lawm.

¹²⁴Thov ua zoo rua kuv lawv le koj txujkev hlub kws tsi paub kawg, hab qha koj tej kevcai rua kuv.

¹²⁵Kuv yog koj tug tubkhai, thov koj paab kuas kuv totaub, kuv txhaj yuav paub koj tej lug qha ntawd.

¹²⁶Tug TSWV, tub yog lub sijhawm kws koj rau txim lawm, vim tuabneeg tsi fwm koj txuj kevcai.

¹²⁷Kuv nyam koj tej kevcai tshaaj kub, hab nyam tshaaj tej kws tseem kub.

¹²⁸Yog le ntawd, kuv txhaj ua lawv le koj tej kevcai; kuv ntxub txhua yaam kev txhum.

¹²⁹Koj tej lug qha ua rua tuabneeg xaav tsi thoob le; kuv yuav coj lawv le koj tej lug ntawd kuas kawg sab kawg ntsws.

¹³⁰Koj tej lug qha ua qhov kaaj ci pum kev rua kuv; hab ua rua cov tuabneeg ruag kuas txawj ntse tuaj.

¹³¹Kuv tshaib nqhes koj tej lug qhuav sab qhawv.

¹³²Thov koj tig lug rua ntawm kuv hab taabncuab kuv, ib yaam le koj ua rua cov tuabneeg kws hlub koj.

¹³³Thov koj tuav kuv kuas nyob ruaj khov rua ntawm koj, lawv le koj tau coglug tseg lawm; hab tsi xob ca tej kev phem kev qas kovyeej kuv.

¹³⁴Thov cawm kuas kuv dlim ntawm cov tuabneeg kws tsimtxom kuv, kuv txhaj ua tau lawv le koj tej lug saamfwm.

¹³⁵Thov koj nrug nraim kuv nyob, hab qha kuas kuv paub koj tej kevcai.

¹³⁶Kuv tej kua muag ndlwg quas lawg ib yaam le dlej ndlwg; vim tej tej tuabneeg tsi ua lawv le koj tej kevcai.

¹³⁷Tug TSWV, koj yog tug ncaaj nceeg, hab koj txuj kevcai yog tej kws tseeb kawg nkaus.

¹³⁸Tej kevcai kws koj muab rua peb coj ncaaj hab tseeb kawg le.

¹³⁹Kuv npautawg ua rua kuv lub sab kub cuag suavtawg hlawv, vim kuv cov yeebncuab tsi ua lawv le koj tej lug qha.

¹⁴⁰Koj tej lug cog tseg yuav nyob ruaj nreeg! Kuv nyam koj tej lug cog tseg heev!

¹⁴¹Kuv yog tuabneeg tsi tseemceeb hab luas saib tsi taug kuv, tabsis kuv ncu ntsoov koj tej lug qha.

¹⁴²Koj txujkev ncaaj nceeg yuav nyob moog ibtxhis, hab koj txuj kevcai ibtxwm yog txuj tseeb.

¹⁴³Kuv raug kev nyuaj sab ntxhuv plawv, tabsis koj tej kevcai ua rua kuv muaj kev kaaj sab.

¹⁴⁴Koj tej lug qha yeej ibtxwm yog lug tseeb; thov koj pub kuas kuv totaub, kuv txhaj muaj sa nyob.

¹⁴⁵Tug TSWV, kuv quaj thov koj kawg sab kawg ntsws; thov koj teb kuv, kuv yuav ua lawv le koj tej lug saamfwm!

¹⁴⁶Kuv quaj hu koj; thov koj cawm kuv, kuv yuav ua lawv le koj txuj kevcai.

¹⁴⁷Ua ntej lub nub tawm, kuv tub thov koj paab kuv lawm; kuv ca sab rua koj tej lug cog tseg.

¹⁴⁸Kuv pw tsi tsaug zug ib mos kaaj ntug, rua qhov kuv xaav ntsoov txug koj tej lug cog tseg.

¹⁴⁹Tug TSWV, thov koj noog kuv tej lug thov, rua qhov koj yog tug kws muaj txujkev hlub tsi paub kawg, thov koj hlub hab tseg kuv txujsa!

¹⁵⁰Cov tuabneeg sab phem kws tsimtxom kuv tuaj ze kuv heev lawm; puab yog cov tuabneeg kws tsi ua lawv le koj txuj kevcai.

¹⁵¹Tabsis tug TSWV, koj nyob nrug nraim kuv, hab koj tej lug saamfwm puavleej yog lug tseeb.

¹⁵²Kuv tub paub koj tej kevcai thaus u lug lawm; koj rhawv tej kevcai ntawd nyob moog ibtxhis le.

¹⁵³Thov koj tsaa qhovmuag saib kuv tej kev txomnyem hab paab kuas kuv dlim, rua qhov kuv yeej ncu ntsoov koj tej kevcai.

¹⁵⁴Thov koj paab has kuv rooj plaub hab tso kuv dlim; thov cawm kuv dlim lawv le koj tej lug cog tseg.

¹⁵⁵Cov tuabneeg sab phem yuav tsi dlim, vim puab tsi ua lawv le koj tej kevcai.

¹⁵⁶Tabsis tug TSWV, koj txujkev hlub luj kawg nkaus le; thov koj hlub hab cawm kuas kuv dlim!

¹⁵⁷Kuv muaj yeebncuab hab muaj tuabneeg tsimtxom kuv coob heev; tabsis kuv tsi tau tso koj tej kevcai tseg le.

¹⁵⁸Thaus kuv tsaa qhovmuag saib cov tuabneeg ntxeev sab, kuv dlhuav kawg nkaus le, vim puab tsi ua lawv le koj tej lug qha.

¹⁵⁹Tug TSWV, koj yeej paub has tas kuv nyam koj tej lug qhuab qha npaum le caag; koj yeej tsi hloov koj txujkev hlub le, yog le ntawd thov koj cawm kuv lauj!

¹⁶⁰Koj txuj kevcai lub ntsab yeej yog lug tseeb, koj txujkev txav txim ncaaj nceeg nyob moog ibtxhis.

¹⁶¹Kuv tsi tau ua txhum los cov tuabneeg kws muaj fwjchim laam tau laam tsimtxom kuv, tabsis kuv yeej fwm koj tej kevcai kawg sab le.

¹⁶²Koj tej lug cog tseg ua rua kuv zoo sab npaum le tug tuabneeg kws moog nrhav tau ib lub qhov nyaj.

¹⁶³Kuv ntxub hab dlhuav cov tuabneeg kws has lug dlaag, tabsis kuv nyam koj txuj kevcai heev.

¹⁶⁴Ib nub twg kuv ua koj tsaug xyaa zag, vim koj txuj kevcai kws ncaaj nceeg.

¹⁶⁵Cov tuabneeg kws nyam koj txuj kevcai nyob tso sab plhuav, hab tsi muaj ib yaam dlaabtsi ua rua puab dlawm qaug le.

¹⁶⁶Tug TSWV, kuv tog ntsoov koj cawm kuv; hab kuv ua lawv le koj tej lug saamfwm.

¹⁶⁷Kuv ua lawv le koj tej lug qha, kuv nyam koj tej lug kawg sab kawg ntsws.

¹⁶⁸Kuv ua lawv le koj tej kevcai hab koj tej lug saamfwm; koj yeej pum ntsoov txhua yaam kws kuv ua taag lug.

¹⁶⁹Tug TSWV, thov kuas kuv tej lug thov tuaj txug koj; thov pub kuv totaub lawv le koj tau coglug tseg.

¹⁷⁰Thov noog kuv tej lug thov, hab paab kuas kuv dlim lawv le koj tau coglug tseg!

¹⁷¹Kuv yuav naj nub ua koj tsaug, rua qhov koj qha koj txuj kevcai rua kuv.

¹⁷²Thov kuas kuv tug nplaig hu nkauj qhuas koj txuj kevcai, rua qhov koj tej lug saamfwm yog lug tseeb.

¹⁷³Thov koj npaaj rawv paab kuv, rua qhov kuv ua lawv le koj tej lug qha.

¹⁷⁴Tug TSWV, kuv tog koj ntev loo lug cawm kuas kuv dlim, hab koj tej kevcai ua rua kuv nyob kaaj sab lug.

¹⁷⁵Thov koj pub kuas kuv muaj sa nyob kuv txhaj tau qhuas koj; hab thov ca koj tej lug qha paab kuv.

¹⁷⁶Kuv ncig moog ncig lug ib yaam le tug yaaj kws yuam kev lawm, thov koj tuaj nrhav kuv kws yog koj tug tubkhai, rua qhov kuv yeej ncu ntsoov koj tej kevcai rua nruab sab.