Read Hmong Njua Phoo Ntawv Nkauj 132 Bible Online

Phoo Ntawv Nkauj 132 - Hmong Njua bible

Phoo Ntawv Nkauj 132

¹Tug TSWV, thov koj ncu ntsoov Daviv hab nwg tej kev ntxhuv sab.

²Tug TSWV, thov koj ncu ntsoov nwg tej lug cog tseg, yog tej lug nwg yeem rua koj kws yog Yakhauj tug Vaajtswv kws muaj Fwjchim Luj kawg nkaus has tas:

³“Kuv yuav tsi moog tsev lossis moog pw;

⁴kuv yuav tsi su lossis pw tsaug zug,

⁵moog txug thaus kws kuv npaaj tau chaw rua kuv tug TSWV, yog lub chaw rua Yakhauj tug Vaajtswv kws muaj Fwjchim Luj kawg nkaus.”

⁶Thaus nyob huv Npelehees, peb nov has txug lub Phijxaab kws ntim Vaajtswv tej lug cog tseg, hab peb moog nrhav tau lub Phijxaab ntawm tej teb huv lub nroog Ye-alees.

⁷Peb has tas, “Peb ca le moog rua huv tug TSWV lub tsev; peb ca le moog pehawm nwg ntawm nwg lub zwmtxwv.”

⁸Tug TSWV, thov koj coj lub Phijxaab kws ntim Vaajtswv tej lug cog tseg, nrug koj lug rua huv lub Tuamtsev, lub Phijxaab ntawd yog yaam kws qha koj lub fwjchim, thov koj nyob huv lub Tuamtsev moog ibtxhis le.

⁹Thov kuas koj cov povthawj naj nub ua ncaaj ua nceeg xwb; thov kuas koj tsaav tuabneeg txhua tug qw zoo sab luag ntxhi!

¹⁰Tug TSWV, koj coglug tseg rua Daviv kws yog koj tug tubkhai; thov koj tsi xob tso tug vaajntxwv kws koj xaiv lawm tseg.

¹¹Koj coglug ruaj khov rua Daviv lawm, yog cov lug cog tseg kws koj yuav tsi thim le; koj has tas, “Kuv yuav tsaa koj cov tub ib tug ua vaajntxwv, hab nwg yuav nyob koj chaw tom qaab kws dlua koj lawm.

¹²Yog koj cov tub ua lawv le kuv tej lug cog tseg, hab tej kevcai kws kuv muab cob rua puab lawm, ces puab cov xeebntxwv yuav tau ua vaajntxwv hloov koj chaw moog ibtxhis.”

¹³Tug TSWV tau xaiv lub nroog Xi-oos; nwg xaav muab lub nroog ntawd ua nwg lub chaw nyob:

¹⁴Nwg has tas, “Kuv yuav nyob qhov chaw nuav moog ibtxhis; kuv xaav kaav qhov chaw nuav.

¹⁵Kuv yuav pub txhua yaam nplua mag rua lub nroog Xi-oos lawv le nwg xaav yuav; kuv yuav muab zaub mov rua cov tuabneeg txomnyem huv lub nroog ntawd kuas tau noj tsau npo.

¹⁶Kuv yuav foom koob moov rua txhua yaam num kws nwg cov povthawj ua, ces nwg cov pejxeem yuav hu nkauj zoo sab luag quas ntxhi.

¹⁷Kuv yuav tsaa Daviv cov xeebntxwv ib tug huv lub nroog nuav ua vaajntxwv kuas muaj fwjchim heev; hab kuv yuav ca tug vaajntxwv kws kuv xaiv kaav qhov chaw nuav moog ibtxhis.

¹⁸Kuv yuav ua kuas nwg cov yeebncuab txaajmuag; tabsis lub tebchaws kws nwg kaav yuav muaj kev vaammeej hab npluanuj.”