Read Hmong Njua Phoo Ntawv Nkauj 135 Bible Online

Phoo Ntawv Nkauj 135 - Hmong Njua bible

Phoo Ntawv Nkauj 135

¹Ca le qhuas tug TSWV! mej txhua tug kws yog tug TSWV cov tubkhai, ca le qhuas tug TSWV.

²Mej cov kws sawv ntawm tug TSWV lub tsev hab huv peb tug Vaajtswv lub Tuamtsev, mej ca le qhuas tug TSWV lub npe.

³Ca le qhuas tug TSWV, rua qhov nwg yog tug zoo; ca le hu nkauj qhuas nwg lub npe, rua qhov nwg nwg sab dlawb sab zoo.

⁴Tug TSWV xaiv Yakhauj rua nwg, hab xaiv tsaav tuavbneeg Yixalayees ua nwg tug.

⁵Kuv paub has tas, peb tug TSWV yog tug muaj fwjchim luj, nwg muaj fwjchim dlua tej vaajtswv huv tuabsi.

⁶Nwg ua tau txhua yaam lawv le nwg lub sab nyam, tsi has sau ntuj hab huv nplajteb nuav, huv havtxwv lossis huv nruab tivtxwv qhov kws tub heev.

⁷Nwg yog tug ua kuas fuab sawv saab npoo ntuj nuav moog ti nkaus saab npoo ntuj tim u; nwg ua kuas muaj tsaglig xub laim rua naag lug hab nwg ua kuas muaj cua ntsawj.

⁸Nyob huv tebchaws Iziv, nwg tua cov Iziv tej tub hlub hab tej tsaj thawj tug mivnyuas ib yaam nkaus.

⁹Nyob nraag, nwg ua ntau yaam txujci tseemceeb kws xaav tsi thoob le, nwg rau txim rua Falaus hab Falaus cov numtswv huv tuabsi.

¹⁰Nwg ua rua ntau tsaav tuabneeg raug puamtsuaj, hab tua cov vaajntxwv kws muaj fwjchim xws le:

¹¹Xihoos kws ua vaajntxwv kaav cov Amaules, Aunkas kws ua vaajntxwv kaav tebchaws Npasaas, hab taagnrho cov vaajntxwv kws kaav tebchaws Kana-aas.

¹²Nwg muab puab tej tebchaws rua nwg tsaav tuabneeg, nwg muab rua cov Yixalayees.

¹³Tug TSWV, koj lub npe yuav nyob moog ibtxhis; hab txhua tam tuabneeg yuav caav txug koj lub npe.

¹⁴Tug TSWV yuav tiv thaiv nwg tsaav tuabneeg; nwg yuav taabncuab nwg cov tubkhai.

¹⁵Cov tuabneeg txawv tebchaws tej mlom yog nyaj yog kub, hab yog tuabneeg txhais teg nchuav xwb.

¹⁶Puab muaj qhovncauj, tabsis tsi txawj has lug, muaj qhovmuag, tabsis tsi pum kev.

¹⁷Puab muaj qhovntsej, tabsis tsi nov lug, hab puab tsi txawj ua paa.

¹⁸Cov tuabneeg kws txua mlom, hab ca sab rua tej mlom, puab zoo ib yaam le tej mlom ntawd.

¹⁹Cov Yixalayees, mej ca le qhuas tug TSWV; Vaajtswv cov povthawj, mej ca le qhuas tug TSWV!

²⁰Cov Levis, mej ca le qhuas tug TSWV; cov kws pehawm tug TSWV, mej ca le qhuas nwg!

²¹Ca le qhuas tug TSWV kws nyob huv lub nroog Xi-oos, hab nyob huv nwg lub tsev huv lub nroog Yeluxalees. Ca le qhuas tug TSWV!