Read Hmong Njua Phoo Ntawv Nkauj 139 Bible Online

Phoo Ntawv Nkauj 139 - Hmong Njua bible

Phoo Ntawv Nkauj 139

¹Tug TSWV, koj tshawb saib kuv lub sab hab lub neej, koj yeej paub zoo.

²Koj paub ib puas tsaav yaam kws kuv ua; txawm yog nyob dleb los koj yeej paub tej kws kuv lub sab xaav huv tuabsi.

³Koj yeej pum ntsoov kuv, tsi has thaus kuv ua num lossis kuv su, koj paub tej kws kuv ua huv tuabsi.

⁴Txawm yog thaus kuv tseem tsi tau has lug los koj tub xub paub ua ntej lawm has tas kuv yuav has dlaabtsi.

⁵Koj nyob puagncig kuv, koj tug tshwjchim tiv thaiv kuv.

⁶Koj yeej paub has tas kuv yog tuabneeg zoo le caag.

⁷Kuv yuav tsiv moog nkaum qhov twg txhaj tsiv dlim koj? Kuv yuav tsiv moog nkaum qhov twg koj txhaj tsi pum kuv?

⁸Txawm yog kuv nce moog txug sau ntuj los koj yeej nyob sau; yog kuv nqeg moog rua huv tubtuag teb los koj yeej nyob huv hab.

⁹Yog kuv yaa moog dlhau rua saab nubtuaj lossis saab nubpoob

¹⁰los koj yuav nyob qhov ntawd coj kuv kev, koj yuav nyob qhov ntawd paab kuv.

¹¹Txawm yog kuv hu kuas qhov tsaus ntuj lug roog kuv, lossis kuas qhov kaaj kws nyob puagncig kuv hloov ua qhov tsaus ntuj

¹²los qhov tsaus ntuj tub tsi tsaus rua koj le, mo ntuj los yeej pum kev kaaj nrigib yaam le nruab nub; koj saib qhov tsaus ntuj kaaj nrig ib yaam le qhov kaaj.

¹³Koj yog tug tsim kuv lub cev txhua yaam huv tuabsi; hab koj yog tug kws puab kuv rua huv kuv nam plaab.

¹⁴Kuv qhuas koj rua qhov koj txhaj yog tug kws tsimnyog suavdlawg fwm; tej kws koj ua, mas kuv xaav tsi thoob hab tsi txawj pav le, tabsis kuv paub has tas tej ntawd yeej yog koj ua.

¹⁵Thaus kuv tej pobtxhaa taabtom hlub tuaj sis dlhos ua ke huv kuv nam plaab, hab kuv hlub nraim nkoog huv nruab thab los koj yeej paub has tas kuv nyob huv.

¹⁶Thaus kuv tseem tsi tau yug lug, koj tub pum kuv lawm; kuv tej noobnyoog ua neej nyob, koj tub xub muab sau rua huv koj phoo ntawv ua ntej kws tsi tau muaj tej noobnyoog ntawd lawm.

¹⁷Vaajtswv, kuv ceeblaaj totaub tej kws koj xaav kawg le, koj xaav txhij xaav txhua ua rua kuv suav tsi txheeb le!

¹⁸Yog kuv suav txheeb tej kws koj xaav, ntshai muaj ntau dlua tej xuabzeb; thaus kuv tsim dlheev lug, kuv tseem nrug koj nyob.

¹⁹Vaajtswv, kuv xaav kuas koj muab cov tuabneeg ua phem ua qas tua povtseg; kuv xaav kuas cov tuabneeg limham txaav dleb ntawm kuv moog.

²⁰Puab has tej lug phem thuam koj, puab has saib tsi taug koj lub npe.

²¹Tug TSWV, kuv ntxub cov tuabneeg kws ntxub koj kawg le; hab kuv dlhuav cov tuabneeg ntxeev sab kws tawmtsaam koj.

²²Kuv ntxub ntxaug puab kawg nkaus le; kuv suav has tas puab yog kuv cov yeebncuab.

²³Vaajtswv, thov koj tshuaj kuv kuas paub kuv lub sab; thov koj sim kuv hab nthuav tej kws kuv lub sab xaav saib zoo le caag.

²⁴Thov koj saib kuv lub sab saib puas muaj ib qhov txhum le caag; hab thov koj coj kuv taug txujkev kws nyob moog ibtxhis.