Read Hmong Njua Phoo Ntawv Nkauj 142 Bible Online

Phoo Ntawv Nkauj 142 - Hmong Njua bible

Phoo Ntawv Nkauj 142

¹Kuv tsaa suab hlo thov tug TSWV paab; kuv thov nwg paab kuv.

²Kuv ywg txhua yaam rua nwg noog, kuv qha kuv tej kev nyuaj sab rua nwg huv tuabsi.

³Thaus kuv kawg tswvyim lawm, nwg paub has tas kuv yuav ua le caag, kuv cov yeebncuab cuab muv rua ntawm txujkev kws kuv moog.

⁴Thaus kuv tsaa qhovmuag saib puagncig kuv, tsi muaj leejtwg paab kuv, tsi muaj leejtwg tiv thaiv kuv, hab tsi muaj leejtwg mob sab kuv.

⁵Tug TSWV, kuv quaj thov koj paab kuv; tug TSWV, koj txhaj yog tug kws tiv thaiv kuv; koj yog txhua yaam kws kuv xaav yuav nyob huv kuv lub neej.

⁶Thov koj noog kuv lub suab quaj hu paab, rua qhov kuv taag kev ca sab lawm! Thov cawm kuas kuv dlim ntawm kuv cov yeebncuab, vim puab muaj zug heev, ua rua kuv kov tsi yeej.

⁷Thov koj tso kuas kuv dlim ntawm txujkev nyuaj sab; kuv yuav qhuas koj taabmeeg koj tsaav tuabneeg, thaus suavdlawg tuaj sis sau ua ke, rua qhov koj ua sab dlawb sab zoo rua kuv.