Read Hmong Njua Phoo Ntawv Nkauj 144 Bible Online

Phoo Ntawv Nkauj 144 - Hmong Njua bible

Phoo Ntawv Nkauj 144

¹Ca le qhuas tug TSWV kws yog tug tiv thaiv kuv! Nwg yog tug kws qha kuv sis tua hab npaaj kuv moog ntaus rog.

²Nwg yog tug tiv thaiv kuv hab tuaj kuv tog, nwg yog kuv lub chaw cawm sav hab yog kuv tug Cawmseej, kuv tso sab plhuav rua nwg. Nwg tsaa kuv ua tug kaav taagnrho txhua tsaav tuabneeg.

³Tug TSWV, tuabneeg yog dlaabtsi, koj txhaj yuav xaam txug nwg; tuabneeg yog leejtwg, koj txhaj le ua zoo rua nwg ua luaj?

⁴Tuabneeg zoo ib yaam le ib nthwv cua xwb; nwg txujsa zoo ib yaam le tug dluab ntxoov ntxoo kws nyob ib vuag xwb.

⁵Tug TSWV, thov koj ca le qheb hlo rooj ntug nqeg lug; koj ca le kov tej hauv roob kuas muaj paa nchu tawm tuaj.

⁶Ca le tso tsaglig xub laim ua kuas koj cov yeebncuab tsiv ri sua; ca le tua koj cov xub neevnti kuas puab tsiv taag.

⁷Koj cev teg sau ntuj tuaj nqug kuv tawm huv cov dlej kws tub tub hab cawm kuas kuv dlim; thov koj cawm kuv dlim ntawm cov tuabneeg txawv tebchaws

⁸kws has lug tsi tseeb hab dlaag tsi ua lawv le puab tau coglug tseg.

⁹Vaajtswv, kuv yuav hu ib zaaj nkauj tshab qhuas koj; kuv yuav ntaus nkauj nogncaas hab hu nkauj qhuas koj.

¹⁰Koj pub cov vaajntxwv moog ntaus yeej rog hab koj tau cawm koj tug tubkhai Daviv dlim.

¹¹Thov koj cawm kuv dlim ntawm kuv cov yeebncuab kws tsiv tsaim heev; thov koj cawm kuas kuv dlim ntawm cov tuabneeg txawv tebchaws kws has lug tsi tseeb hab dlaag tsi ua lawv le puab tau coglug tseg.

¹²Thov kuas peb cov tub hluas luj hlub zoo le tej ntsuag ntoo; hab thov kuas peb cov ntxhais zoo ib yaam le tej ncej kaum kws txheem lub loog.

¹³Thov kuas peb tej txhaab muaj txhua yaam qoobloo puv nkaus; thov pub kuas peb tej yaaj kws nyob tom taj nraag yug mivnyuas coob txug ntau txheeb ntau vaam tug.

¹⁴Thov kuas peb tej nyuj fuamvaam coob ua npoj ntwg, hab tsi xob muaj ib tug mooj lossis pluj le; thov kuas tsi xob muaj tej suab quaj ntxhuv sab rua txhua txujkev.

¹⁵Cov tuabneeg kws tau txais koob moov yog cov kws muaj kev kaaj sab! Cov tuabneeg kws muaj Vaajtswv ua puab tug TSWV yog cov kws tau koob moov!