Read Hmong Njua Phoo Ntawv Nkauj 148 Bible Online

Phoo Ntawv Nkauj 148 - Hmong Njua bible

Phoo Ntawv Nkauj 148

¹Ca le qhuas tug TSWV! mej cov kws nyob sau ntuj, ca le qhuas tug TSWV,

²Taagnrho nwg cov timtswv, ca le qhuas nwg, taagnrho nwg cov tubrog sau ntuj ca le qhuas nwg.

³Lub nub hab lub hli, ca le qhuas nwg; tej nubqub kws ci ntsaa ab, ca le qhuas nwg.

⁴Ntuj hab tej dlej kws nyob sau nruab ntug ca le qhuas nwg.

⁵Ib puas tsaav yaam ca le qhuas tug TSWV lub npe! Nwg has kuas muaj, ces tej nuav txawm tshwmsim tuaj;

⁶tub yog nwg has tej nuav txhaj nyob ruaj khov qhov qub chaw moog ibtxhis; hab tej ntawd yeej tsi hlaa tug TSWV tej lug le.

⁷Dlej havtxwv hab ib puas tsaav yaam kws nyob huv havtxwv, ca le tuaj huv nplajteb nuav qhuas tug TSWV,

⁸tsaglig xub hab lawg, dlau hab fuab, hab cua dlaaj cua dlub ca le noog tug TSWV tej lug.

⁹Tej pov roob hab tej hauv roob hab tej ntoo kws txi txiv, hab tej haav zoov, ca le qhuas tug TSWV;

¹⁰txhua yaam tsaj, tsaj nyeg hab tsaj qus, naab qaa hab tej noog, ca le qhuas tug TSWV.

¹¹Tej vaajntxwv hab txhua tsaav tuabneeg, vaajntxwv cov tub hab tej numtswv, ca le qhuas tug TSWV;

¹²tej tub ntxhais hluas, tej laug hab tej mivnyuas yau, ca le qhuas tug TSWV ib yaam nkaus.

¹³Ib puas tsaav yaam nuav ca le qhuas tug TSWV lub npe! Nwg lub npe muaj koob meej dlua txhua lub npe huv tuabsi; nwg tug tshwjchim nyob puv nkaus huv lub nplajteb hab sau ntuj.

¹⁴Tug TSWV ua rua nwg tsaav tuabneeg muaj zug heev; nwg tsaav tuabneeg txhua tug puavleej qhuas nwg, tsaav tuabneeg ntawd yog cov Yixalayees kws nwg hlub kawg nkaus. Ca le qhuas tug TSWV!