Read Hmong Njua Phoo Ntawv Nkauj 17 Bible Online

Phoo Ntawv Nkauj 17 - Hmong Njua bible

Phoo Ntawv Nkauj 17

¹Tug TSWV, thov koj noog tej lug kws kuv thov yuav kev ncaaj nceeg, thov koj tig qhovntsej noog kuv lub suab quaj kws thov koj paab! thov koj noog kuv tej lug thov kws yog lug tseeb.

²Koj yuav txav txim ncaaj rua kuv, rua qhov koj yog tug paub qhov tseeb.

³Koj yog tug paub kuv lub sab, thaus tsaus ntuj koj lug cuag kuv, koj tsi pum ib qhov phem kws kuv ua nyob huv kuv lub sab. Kuv tsi has lug phem

⁴le luas tej; kuv fwm koj tej lug saamfwm, hab tsi taug txujkev kws cov tuabneeg yuam cai taug.

⁵Kuv ibtxwm taug koj txujkev xwb, hab kuv yeej tsi yuam kev le.

⁶Tug TSWV, kuv thov koj, rua qhov koj yeej yuav teb kuv tej lug thov; yog le ntawd, thov koj tig lug hab noog kuv tej lug thov.

⁷Thov qha koj txujkev hlub kws luj kawg nkaus rua kuv hab cawm kuv; koj saab teg xis cawm cov tuabneeg kws tsiv puab cov yeebncuab.

⁸Thov koj tiv thaiv kuv ib yaam le koj txuag koj ob lub qhovmuag, thov muab kuv zais rua huv qaab koj phob tis tug dluab ntxoov ntxoo,

⁹kuas kuv tsi xob raug cov tuabneeg sab phem tua. Kuv cov yeebncuab kws xaav muab kuv tua kuas tuag nyob puagncig kuv;

¹⁰puab has tej lug khaavtheeb hab tsi paub hlub leejtwg le.

¹¹Taamsim nuav puab nyob puag ncig kuv taag le lawm, puab saib ntsoov kuv hab yuav muab kuv thawb kuas qaug.

¹²Puab zoo le cov tsuv ntxhuav kws zuv rawv tog tum kuv, puab xaav dlua kuv kuas ndluag ua tej dlaim.

¹³Tug TSWV, thov koj ca le lug tawmtsaam kuv cov yeeb ncuab hab ua kuas puab swb! Thov siv koj raab ntaaj cawm kuv dlim ntawm cov tuabneeg sab phem txhais teg,

¹⁴cawm kuas kuv dlim ntawm cov tuabneeg ntshaw khoom nplajteb. Thov siv tej kev txomnyem kws koj npaaj tseg lawm rau txim rua puab; thov tseg kuas txaus rua puab tej mivnyuas tseg ibtxha rua puab cov xeebntxwv!

¹⁵Tabsis kuv yuav pum koj, rua qhov kuv tsi tau ua txhum; thaus kuv tsim lug, kuv yuav txaus sab heev, rua qhov kuv pum koj tim ntsej tim muag.