Read Hmong Njua Phoo Ntawv Nkauj 18 Bible Online

Phoo Ntawv Nkauj 18 - Hmong Njua bible

Phoo Ntawv Nkauj 18

¹Tug TSWV, kuv hlub koj kawg le! Koj yog tug tiv thaiv kuv.

²Tug TSWV yog tug tiv thaiv kuv; nwg yog kuv lub chaw faajxwm kws ruaj khov. Kuv tug Vaajtswv yog tug tiv thaiv kuv, kuv nrug nwg nyob kuv tso sab plhuav. Nwg tiv thaiv kuv ib yaam le dlaim thaiv nav ntaaj, nwg tiv thaiv kuv hab paab kuv dlim.

³Kuv hu txug tug TSWV, nwg paab kuv dlim ntawm kuv cov yeebncuab. Ca le ua tug TSWV tsaug!

⁴Kev tuag nyob puagncig kuv, kev puamtsuaj nphau nphwv tuaj tsuam kuv.

⁵Kev tuag nyob puagncig kuv hab lub qhov ntxaa cuab lug tog kuv lawm.

⁶Thaus kuv raug kev txomnyem kuv hu tug TSWV; kuv thov kuv tug Vaajtswv paab kuv. Nwg nyob huv nwg lub Tuamtsev nov kuv lub suab, nwg noog kuv lub suab quaj kws thov nwg paab.

⁷Lub nplajteb txawm qeeg hab ua zug koog, tej taw roob cu ua zug koog, rua qhov Vaajtswv chim heev.

⁸Paa tawg nchu auv nab huv nwg lub qhovntswg tuaj, nplaim tawg hab ncaig tawg cig laam lug huv nwg lub qhovncauj tuaj.

⁹Tug TSWV qheb hlo lub ntuj hab nqeg nrug tauv fuab dlub tsaus nti ntawm nwg kutaw lug.

¹⁰Nwg caij rawv sau tug qhelus phob tis hab yaa, nwg nyob sau nwg tug qhelus phob tis yaa nrug cua ceev heev.

¹¹Nwg muab kev tsaus ntuj thaiv nwg lub cev, muaj fuab ntum nti hab muaj dlej puagncig nwg.

¹²Lawg hab nplaim tawg tawm huv cov tsaglig xub lug tsoo fuab dlub tshaab plawg moog ua tug TSWV ntej.

¹³Ces tug TSWV txhaj ua kuas xub nroo sau ntuj tuaj, hab nov tug kws muaj Fwjchim Luj kawg nkaus lub suab.

¹⁴Nwg tua nwg xibxub tuaj hab ua rua nwg cov yeebncuab faib tawg ri sua, nwg ua xub laim ci ntsaa ab lawv puab tsiv.

¹⁵Tug TSWV, thaus koj tshev koj cov yeebcuab, hab nyooj rua puab ntawm koj txujkev chim, txhaj ua rua qaab thu dlej havtxwv khoob lug, hab lub nplajteb nyob dlo dlus tsi muaj dlaabtsi thaiv.

¹⁶Tug TSWV cev teg sau nruab ntug tuaj tuav kuv huv qaab thu nuav, nwg nqug kuv tawm huv qaab thu dlej qhov kws tub tshaaj plawg lug.

¹⁷Nwg cawm kuv dlim ntawm kuv cov yeebncuab lub fwjchim, hab dlim ntawm cov tuabneeg kws ntxub kuv, rua qhov puab muaj zug dlua kuv.

¹⁸Thaus kuv raug kev nyuaj sab, puab txawm tuaj ntaus kuv ntaag, tabsis tug TSWV tsomkwm kuv.

¹⁹Nwg paab kuv tawm huv txujkev puamtsuaj, nwg cawm kuv, rua qhov nwg txaus sab rua kuv.

²⁰Tug TSWV muab nqe zug rua kuv, rua qhov kuv yeej ua ncaaj ua nceeg xwb, nwg foom koob moov rua kuv, rua qhov kuv tsi tau ua txhum dlaabtsi.

²¹Kuv yeej fwm tug TSWV txuj kevcai, kuv tsi tsiv tawm ntawm kuv tug Vaajtswv hlo le.

²²Kuv yeej ua lawv le nwg tej kevcai qha, tsi muaj ib zag kws kuv yuav tsi noog nwg tej lug saamfwm le.

²³Nwg yeej paub kuv tsi tau ua txhum, kuv tswj nreeg kuv tsi ua ib qho txhum le.

²⁴Yog le ntawd, nwg txhaj muab nqe zug rua kuv, rua qhov kuv ua dlaabtsi los yeej ua ncaaj ua nceeg xwb.

²⁵Tug TSWV, koj yeej ua ncaaj nceeg rua cov tuabneeg kws ua ncaaj nceeg rua koj, koj ua zoo kawg nkaus rua cov tuabneeg kws tsi tau ua txhum.

²⁶Koj ua zoo rua cov tuabneeg kws ua zoo, tabsis koj ua yeebncuab rua cov tuabneeg kws ua phem.

²⁷Koj cawm cov tuabneeg kws txu fwjchim, tabsis koj txu cov tuabneeg khaavtheeb lub fwjchim.

²⁸Tug TSWV, koj ua lub teeb rua kuv pum kev, koj tshem qhov kws ua rua kuv tsaus ntuj nti.

²⁹Koj ua rua kuv muaj zug ntaus yeej kuv cov yeebncuab, hab koj lub fwjchim muaj peevxwm ntaus yeej cov cov kws tiv thaiv puab.

³⁰Tug Vaajtswv nuav teg num yeej zoo tshaaj plawg le. Nwg tej lug txhaj yog lug tseeb. Nwg yog dlaim thaiv nav ntaaj rua txhua tug kws moog cuag nwg.

³¹Tug TSWV tuab leeg xwb txhaj yog Vaajtswv, Vaajtswv tuab leeg xwb txhaj yog tug tsomkwm peb.

³²Nwg yog tug Vaajtswv kws ua kuas kuv muaj zug, nwg yog tug ua kuas txujkev kws kuv taug muaj kev kaaj sab lug.

³³Nwg ua rua kuv ob txhais kutaw tsuj aav ntsa nkaus ib yaam le tug muaslwj, nwg tso kuv nyob kaaj sab lug sau tej roob.

³⁴Nwg qha kuas kuv txawj ntaus rog, yog le ntawd kuv txhaj muaj peevxwm tua tau raab neevnti kws muaj zug tshaaj plawg.

³⁵Tug TSWV, koj tau muab koj dlaim thaiv nav ntaaj kws yog kev cawm dlim rua kuv, hab koj saab teg xis tau cawm kuv dlim, hab koj paab kuv, kuv txhaj vaammeej.

³⁶Koj rhawv kev dlaav rua kuv taug, luas txhaj nteg tsi tau kuv; hab kuv tsi qaug ib zag le.

³⁷Kuv caum kuv cov yeebncuab hab nteg tau puab, kuv yeej tsi tso puab tseg moog txug thaus kuv muab puab tua puamtsuaj taag.

³⁸Kuv ntaus puab qaug taag huv tuabsi, hab puab tsi muaj peevxwm sawv tau lug le, puab swb hab qaug pawg lug ntawm kuv xubndlag.

³⁹Koj ua rua kuv muaj zug sis tua huv tshaav rog, pub kuv yeej taagnrho kuv cov yeebncuab.

⁴⁰Koj ua rua kuv cov yeebncuab tawg tsiv ri sua ntawm kuv moog, cov kws ntxub kuv, kuv yuav ua kuas puab puamtsuaj taag.

⁴¹Puab quaj qw thov paab, tabsis tsi muaj leejtwg cawm puab le, puab thov tug TSWV, tabsis nwg tsi teb puab tej lug thov.

⁴²Kuv muab puab tswm ntsoog mog nyoos ib yaam le tej moov aav rua cua ntsawj moog povtseg, kuv tsuj puab ib yaam le tsuj tej aav nkus huv plawv kev.

⁴³Koj cawm kuv dlim ntawm tug tuabneeg kws ntxeev sab rua kuv hab tsaa kuv ua tug kaav txhua tsaav tuabneeg, tej tuabneeg kws kuv yeej ib txwm tsi tau paub dlua le, nwgnuav tau lug ua kuv qhev.

⁴⁴Cov tuabneeg txawv tebchaws los puavleej tau tuaj qhau hau hawm kuv, thaus puab nov kuv lub moo, puab puavleej fwm kuv.

⁴⁵Puab taag kev ca sab, hab tawm ua ib ce tshee nyo huv puab tej chaw faajxwm lug.

⁴⁶Tug TSWV yog tug muaj sa nyob! Ua tsaug kws nwg yog tug tiv thaiv kuv! Thov kuas Vaajtswv kws yog kuv tug cawmseej tau koob meej luj tshaaj plawg.

⁴⁷Nwg paab kuv yeej taagnrho kuv cov yeebncuab, nwg ua kuas txhua tsaav tuabneeg fwm kuv

⁴⁸hab nwg cawm kuv dlim ntawm kuv cov yeebncuab. Tug TSWV, koj tau paab kuv tua yeej kuv cov yeebncuab, koj cawm kuv dlim ntawm cov tuabneeg limham.

⁴⁹Yog le ntawd, kuv txhaj ua koj tsaug tim ntsej tim muag ntawm txhua tsaav tuabneeg, kuv zoo sab hlo hu nkauj ua koj tsaug.

⁵⁰Vaajtswv pub rua nwg tug vaajntxwv tau txais kev muaj yeej luj kawg nkaus, nwg ua zoo rua Daviv tug kws nwg tau xaiv tseg lawm, hab nwg cov xeebntxwv moog ibtxhis tsi hloov le.