Read Hmong Njua Phoo Ntawv Nkauj 22 Bible Online

Phoo Ntawv Nkauj 22 - Hmong Njua bible

Phoo Ntawv Nkauj 22

¹Kuv tug Vaajtswv, kuv tug Vaajtswv, vim le caag koj tso kuv tseg lawm? Kuv tsaa suab quaj thov koj paab, tabsis koj tsi teb kuv tej lug thov.

²Kuv tug Vaajtswv, kuv thov koj taag los koj tsi teb, thaus tsaus ntuj kuv thov koj ib mos tsi tu le.

³Txawm yog le ntawd los koj tseem yog tug dlawbhuv kws nyob sau koj lub zwmtxwv hab yog tug kws cov Yixalayees suavdlawg qhuas.

⁴Peb cov yawmkoob puavleej ca sab rua koj tuab leeg xwb, puab yeej ibtxwm ca sab rua koj, hab koj yeej ibtxwm paab puab dlim.

⁵Puab thov koj paab, hab koj cawm puab dlim ntawm tej kev puamtsuaj, puab ca sab rua koj hab tsi raug txaajmuag.

⁶Tabsis kuv tsi yog tuabneeg lawm, kuv yog kaas xwb, txhua tug ntxub hab ntu quavncaug rua kuv.

⁷Txhua tug kws pum kuv puavleej luag kuv nplig, puab hlauv nplaig hab cu hau nto rua kuv.

⁸Puab has tas, “Koj tub ca sab rua tug TSWV lawm ne, ua caag nwg tseem tsi paab koj hab? Yog tug TSWV yeej nyam koj tag, vim le caag nwg tsi paab koj?”

⁹Koj yog tug coj kuv tawm huv kuv nam plaab lug tsi raug xwm dlaabtsi, thaus kuv tseem mog lab, koj tsomkwm kuv ntawm kuv nam lub xubndlag.

¹⁰Kuv yeej ibtxwm ca sab rua koj txij nub kws yug tau kuv lug, hab koj yeej ibtxwm yog kuv tug Vaajtswv.

¹¹Thov koj tsi xob nyob nrug dleb ntawm kuv! Tej kev txomnyem tub lug ze kuv lawm, hab tsi muaj leejtwg paab kuv le.

¹²Yeebncuab nyob puagncig kuv ib yaam le paab txiv nyuj, taagnrho puab puavleej nyob vij vog kuv, ib yaam le paab txiv nyuj tom tebchaws Npasaas.

¹³Puab rua puab tej qhovncauj luj heev rua kuv, ib yaam le tsuv ntxhuav nyooj yuav tum hab dlua kuv.

¹⁴Kuv tug zug ntaug taag, ib yaam le cov dlej kws nchuav ntxaum rua huv aav lawm. Kuv tej pob qej txhaa pluam taag huv tuabsi lawm, kuv lub sab yaaj ua kua taag ib yaam le tej cab ntaab.

¹⁵Kuv lub qaa qhuav qhawv ib yaam le tej moov aav, hab kuv tug nplaig lu nkaus rua sau qaab yag lawm. Koj tso kuv tuag xyaab leeg rua huv cov moov aav.

¹⁶Muaj ib paab tuabneeg ua phem nyob puagncig kuv, zoo ib yaam le paab dlev kws taabtom dlha cuag tug tsi tuaj ze kuv lawm, puab dlua kuv tej teg taw.

¹⁷Kuv yeej pum taagnrho kuv tej pobtxhaa, kuv cov yeebncuab saib ntsoov kuv hab ua qhovmuag nruj nreeg rua kuv.

¹⁸Puab muab kuv tej rig tsho coj moog twv hab coj moog sis faib.

¹⁹Tug TSWV, thov tsi xob nyob nrug dleb kuv! Ca le maaj nroog lug paab kuas kuv dlim!

²⁰Cawm kuas kuv dlim ntawm raab nav ntaaj, cawm kuas kuv txujsa dlim ntawm cov dlev nuav.

²¹Paab kuas kuv dlim ntawm cov tsuv ntxhuav nuav, hab cawm kuas kuv dlim ntawm cov nyuj qus tej kub.

²²Kuv yuav qha tej txujci kws koj tau ua lawm rua kuv cov pejxeem paub, thaus puab tuaj sis sau ua ke, kuv yuav ua koj tsaug le nuav:

²³“Mej cov kws yog tug TSWV cov tubkhai, ca le ua nwg tsaug! Mej cov kws yog cov Yixalayees tej xeebntxwv, ca le fwm nwg! Mej cov kws yog tuabneeg Yixalayees, mej ca le pehawm nwg!

²⁴Nwg tsi tau muab cov tuabneeg pluag tso povtseg lossis tsi quavntsej tej kev txomnyem kws puab raug, nwg tsi tau tig tsiv tso puab povtseg, tabsis nwg yeej teb puab tej lug thov thaus puab thov nwg.”

²⁵Thaus suavdlawg tuaj txoos ua ke txhij lawm, kuv yuav ua koj tsaug rua tej txujci kws koj tau ua taag lug. Kuv yuav muab tej khoom theej txhoj kws kuv coglug tseg lawm lug fij rua koj taabmeeg ib tsoom suavdlawg kws tuaj pehawm koj.

²⁶Cov tuabneeg pluag yuav tau noj tsau npo lawv le puab xaav noj, txhua tug kws lug cuag tug TSWV yuav ua nwg tsaug. Thov kuas puab muaj kev vaammeej moog ibtxhis.

²⁷Txhua tsaav tuabneeg yuav ncu ntsoov tug TSWV. Tej tuabneeg kws nyob txhua qhov huv qaab ntuj nuav yuav lug cuag nwg, mas txhua tsaav tuabneeg yuav pehawm nwg.

²⁸Tug TSWV yog Vaajntxwv, nwg kaav txhua tsaav tuabneeg.

²⁹Txhua tug tuabneeg kws khaavtheeb yuav qhau cev hlo pe nwg, txhua tug tuabneeg kws txawj tuag yuav qhau cev hlo ntawm nwg xubndlag pe nwg.

³⁰Yaav tom ntej nuav txhua tam tuabneeg yuav txhawb nqaa nwg, tej tuabneeg suavdlawg yuav qha tug TSWV zaaj rua tam tuabneeg kws yuav lug tom ntej.

³¹Yuavtsum qha rua cov kws tseem tsi tau yug lug kuas paub has tas, “Tug TSWV yog tug cawm nwg tsaav tuabneeg.”