Read Hmong Njua Phoo Ntawv Nkauj 24 Bible Online

Phoo Ntawv Nkauj 24 - Hmong Njua bible

Phoo Ntawv Nkauj 24

¹Lub nplajteb hab txhua tsaav yaam kws nyob huv lub qaab ntuj nuav puavleej yog tug TSWV le, lub nplajteb hab txhua tug kws nyob huv lub nplajteb puavleej yog nwg tug huv tuabsi.

²Nwg tsim lub nplajteb rua sau dlej havtxwv, nwg pua thoob plawg huv qaab thu dlej.

³Leejtwg txhaj moog tau rua sau tug TSWV lub roob? Leejtwg txhaj moog tau rua huv nwg lub Tuamtsev kws dlawbhuv?

⁴Cov tuabneeg kws tau moog rua huv, yog cov ua ncaaj hab ua zoo, yog cov kws tsi pe dlaab tsi pe mlom lossis tsi coglug tsi tseeb.

⁵Tug TSWV yuav foom koob moov rua puab cov ntawd, hab yuav cawm kuas puab dlim, Vaajtswv yuav has tas puab yog cov tuabneeg tsi muaj txim.

⁶Cov tuabneeg nuav yog cov kws lug cuag Vaajtswv lawm, puab yog cov kws lug sawv taabmeeg ntawm Yakhauj tug Vaajtswv.

⁷Muab tej roojvaag qheb kuas dlaav fo, muab tej qhovrooj qub thaus u qheb ca, tug vaajntxwv kws muaj fwjchim yuav tuaj rua huv.

⁸Leejtwg yog tug vaajntxwv kws muaj fwjchim? Nwg yog tug TSWV kws muaj zug hab muaj fwjchim, yog tug TSWV kws ntaus yeej rog.

⁹Muab tej roojvaag qheb kuas dlaav fo, muab tej qub qhovrooj thaus u qheb ca, tug vaajntxwv kws muaj fwjchim luj yuav tuaj rua huv.

¹⁰Leejtwg yog tug vaajntxwv kws muaj fwjchim? Tug TSWV kws muaj yeej yog tug Vaajntxwv kws muaj fwjchim ntawd.