Read Hmong Njua Phoo Ntawv Nkauj 25 Bible Online

Phoo Ntawv Nkauj 25 - Hmong Njua bible

Phoo Ntawv Nkauj 25

¹Tug TSWV, kuv tsaa ncauj thov koj,

²kuv tug Vaajtswv, kuv ca sab ntsoov rua koj. Thov cawm kuas kuv dlim tsi xob pub kuv raug kev txaajmuag rua cov tuabneeg kws yeej kuv, thov tsi xob ca kuv cov yeebncuab saib tsi taug kuv.

³Cov kws ca sab rua koj yeej tsi muaj ib tug swb hlo le, tabsis cov kws tawmtsaam koj, yog cov yuav swb ntaag.

⁴Tug TSWV, thov qha kuas kuv paub koj txujkev, qha kuas kuv paub tej kev nuav tseeb.

⁵Qha kuas kuv ua neej lawv le koj txujkev tseeb, rua qhov koj yog kuv tug Vaajtswv kws cawm kuv dlim. Kuv yeej ibtxwm ca sab rua koj.

⁶Tug TSWV, thov ncu ntsoov koj txujkev sab dlawb sab zoo hab txujkev hlub ruaj khov kws koj tau qha rua peb thaus u lug lawm.

⁷Thov zaam txim rua kuv tej kev txhum hab tej kws kuv tau ua yuam kev thaus kuv tseem hluas. Tug TSWV, koj yog tug muaj kev hlub hab sab dlawb kws tsi hloov le, thov koj ncu ntsoov kuv.

⁸Rua qhov tug tuabneeg ncaaj nceeg txhaj yog tug muaj lub sab zoo, nwg qha cov tuabneeg txhum kuas puab paub txug txujkev kws tsimnyog puab taug.

⁹Nwg coj cov tuabneeg txu fwjchim taug txujkev tseeb, hab qha kuas puab ua hum nwg sab.

¹⁰Vim tug TSWV txujkev ncaaj nceeg hab txujkev hlub, nwg txhaj coj txhua tug kws ua lawv le nwg txujlug cog tseg, hab noog nwg tej lug saamfwm.

¹¹Tug TSWV, thov koj ncu ntsoov koj tej lug cog tseg, hab thov koj zaam kuv tej kev txhum, rua qhov kuv tej kev txhum ntawd ntau kawg le.

¹²Cov tuabneeg kws fwm tug TSWV, nwg yuav qha kuas puab paub taug txujkev tseeb kws tsimnyog puab taug.

¹³Puab yuav vaammeej hab puab tej mivnyuas yuav tau lub tebchaws nuav nyob ua puab tug moog le.

¹⁴Tug TSWV nrug cov kws fwm nwg ua phoojywg, hab nwg qha kuas puab paub nwg tej lug cog tseg.

¹⁵Txhua lub sijhawm kws kuv tsaa qhovmuag saib tug TSWV, nwg yeej cawm kuv dlim ntawm txujkev puamtsuaj.

¹⁶Tug TSWV, thov tig lug rua ntawm kuv hab hlub kuv, rua qhov kuv nyuaj sab hab qaug zug kawg le.

¹⁷Thov tshem kuv tej kev nyuaj sab hab cawm kuas kuv dlim ntawm kuv tej kev ntxhuv sab.

¹⁸Thov koj nrug saib kuv tej kev ntxhuv sab hab kev txomnyem, hab thov zaam kuv tej kev txhum huv tuabsi.

¹⁹Thov koj tsaa qhovmuag saib kuv cov yeebncuab saib coob npaum le caag, hab saib puab ntxub kuv npaum le caag?

²⁰Thov koj tsomkwm kuv hab cawm kuas kuv dlim, hab paab kuas kuv tsi xob swb luas hlo le. Kuv lug cuag koj hab vaamkhom koj paab kuv.

²¹Thov kuas kuv teg num zoo hab kuv tej kev ncaaj nceeg tsomkwm kuv, rua qhov kuv ca sab rua koj xwb.

²²Vaajtswv, thov cawm koj tsaav tuabneeg Yixalayees kuas dlim ntawm tej kev txomnyem kws puab raug!