Read Hmong Njua Phoo Ntawv Nkauj 28 Bible Online

Phoo Ntawv Nkauj 28 - Hmong Njua bible

Phoo Ntawv Nkauj 28

¹Tug TSWV, koj yog tug kws tiv thaiv kuv, kuv hu koj paab kuv. Thov noog kuv lub suab thov! Yog koj tsi teb kuv, ces kuv yuav zoo ib yaam le cov tuabneeg kws taug kev kaaj nab moog rua huv tubtuag teb.

²Thov tig qhovntsej noog kuv lub suab thaus kuv quaj thov koj paab, hab thaus kuv tsaa teg thov tuaj rua ntawm koj lub Tuamsev kws dlawbhuv.

³Thov tsi xob coj kuv moog rau txim nrug cov tuabneeg muaj txhum, cov tuabneeg ua phem ua qas, hab cov tuabneeg kws has lug zoo, tabsis kev ntxub ntxaug puv nkaus huv puab lub sab.

⁴Rau txim rua puab lawv le tej kws puab tub ua taag lug lawm, rau txim rua puab tej kev txhum kws puab ua. Rau Txim rua txhua teg num kws puab ua taag lug, muab rua puab kuas tsimnyog qhov kws puab ua.

⁵Rua qhov puab txhobtxwm tsi leeg tej kws tug TSWV tub ua taag lug lawm, lossis tej kws nwg tau tsim, yog le ntawd nwg txhaj yuav rau txim rua puab hab ua kuas puab puamtsuaj moog ibtxhis.

⁶Ca le qhuas tug TSWV, nwg yeej nov kuv lub suab quaj qw thov kuas nwg paab.

⁷Tug TSWV tsomkwm hab tiv thaiv kuv, kuv ca sab rua nwg xwb. Nwg paab kuv hab ua rua kuv zoo sab kawg nkaus le, kuv txhaj zoo sab hu nkauj qhuas nwg.

⁸Tug TSWV tsomkwm nwg tsaav tuabneeg, nwg tiv thaiv hab cawm tug vaajntxwv kws nwg xaiv tseg lawm,

⁹Tug TSWV, thov cawm koj tsaav tuabneeg kuas dlim, hab foom koob moov rua cov tuabneeg kws yog koj tug. Koj ua puab tug tswv yug yaaj hab tsomkwm puab moog ibtxhis le.