Read Hmong Njua Phoo Ntawv Nkauj 31 Bible Online

Phoo Ntawv Nkauj 31 - Hmong Njua bible

Phoo Ntawv Nkauj 31

¹Tug TSWV, kuv lug cuag koj, thov koj tsomkwm kuv, thov tsi xob ca kuv swb luas hlo le. Kuv tsaa ncauj thov koj, koj yog tug Vaajtswv kws ncaaj nceeg, thov koj paab kuas kuv dlim!

²Thov noog kuv lub suab thov! Paab kuas kuv dlim taamsim nuav lauj! Thov koj ua kuv lub chaw cawm sav hab tsomkwm kuv, koj yog tug tiv thaiv kuv hab paab kuv dlim.

³Koj yog kuv qhov chaw cawm sav hab yog tug tiv thaiv kuv, thov qha kuv hab coj kuv txuj hauv kev lawv le koj tau coglug tseg lawm.

⁴Thov paab kuas kuv tsi xob moog poob lub qhov kws luas khawb tog kuv kev, thov koj tsomkwm kuv tsi xob pub kuv raug tej kev puamtsuaj.

⁵Kuv thov muab taagnrho kuv lub cev rua koj ua tug tsomkwm. Tug TSWV, koj yeej yuav paab kuas kuv dlim, koj yog tug Vaajtswv kws ncaaj nceeg.

⁶Koj ntxub cov tuabneeg kws pe tej vaajtswv cuav, tabsis kuv ca sab rua koj xwb.

⁷Kuv yuav txaus sab hab zoo sab rua koj txujkev hlub kws ruaj khov. Koj pum kuv tej kev txomnyem, koj paub kuv tej kev ntxhuv sab huv tuabsi.

⁸Koj tsi pub kuv cov yeebncuab nteg tau kuv, koj pub kuv moog tau txhua qhov lawv le kuv xaav moog.

⁹Tug TSWV, thov koj taabncuab kuv, rua qhov kuv muaj kev ntxhuv sab; kuv qhovmuag qheb tsi taug vim kuv quaj heev, kuv qaug zuj zig tsi muaj ib qho zug le.

¹⁰Tej kev tu sab ua rua kuv twg kev lawm, hab kev quaj ntsuag ua rua kuv txujsa tuab lu kawg nkaus. Muaj tej kev nyuaj sab ntawd txhaj ua rua kuv tsaug muas ua luaj, txawm yog kuv tej pobtxhaa los tsi muaj zug taag le lawm.

¹¹Kuv tej yeebncuab txhua tug saib tsi taug kuv, kuv tej phoojywg zej zog yimfuab thuam hab luag kuv plig, cov tuabneeg kws ibtxwm paub kuv los ntshai kuv, thaus puab pum kuv nyob ntawm tej kev, puab tshuv kev tsiv.

¹²Suavdlawg xaam tsi muaj kuv ib yaam le kuv tub tuag lawm, kuv zoo ib yaam le tej khoom kws luas muab povtseg lawm.

¹³Kuv nov tej yeebncuab sis ntxhi zum zawg; tej kev txhawj ntshai nyob puagncig kuv. Puab tuav tswvyim tawmtsaam kuv hab ntxeev sab yuav muab kuv tua.

¹⁴Tug TSWV, koj yog kuv tug Vaajtswv, kuv yeej ca sab ntsoov rua koj xwb,

¹⁵koj naj nub tsomkwm kuv; thov cawm kuas kuv dlim ntawm kuv cov yeebncuab, hab dlim ntawm cov tuabneeg kws tsimtxom kuv.

¹⁶Kuv yog koj tug tubkhai, thov ua zoo rua kuv, thov koj txujkev hlub kws tsi hloov le cawm kuas kuv dlim.

¹⁷Tug TSWV, kuv tsaa ncauj hu koj, thov tsi xob pub kuv poob ntsejmuag. Thov kuas cov tuabneeg sab phem poob ntsejmuag, thov kuas puab ca le moog ntsag tu rua huv tubtuag teb.

¹⁸Thov muab cov tuabneeg khaavtheeb kws pheej thuam hab tsi quavntsej tej tuabneeg ncaaj nceeg lub qhovncauj pus kuas nyob ntsag tu!

¹⁹Tej kws koj npaaj tseg rua cov tuabneeg fwm koj mas zoo kawg nkaus, txhua tug paub has tas koj yog tug zoo kawg nkaus le, koj tsomkwm cov tuabneeg kws ca sab rua koj tsi pub ib tug pluj le.

²⁰Koj muab puab zais rua ntawm koj lub xubndlag kws yog qhov chaw kaaj sab lug, kuas puab dlim ntawm cov tuabneeg tuavhuv ua phem; koj muab puab zais rua ntawm qhov chaw kws nyob tso sab plhuav tsi raug puab cov yeebncuab thuam.

²¹Ua tug TSWV tsaug! Nwg ua rua kuv pum nwg txujkev hlub kws luj kawg nkaus, thaus kws cov yeebncuab tuaj vij kuv hab puav nteg kuv.

²²Kuv ntshai hab xaav has tas, nwg ntab kuv tawm ntawm nwg lub xubndlag moog lawm. Tabsis nwg tseem nov kuv lub suab quaj, thaus kuv thov nwg paab.

²³Txhua tug kws muab sab npuab tug TSWV, ca le fwm nwg. Tug TSWV tsomkwm cov tuabneeg kws muab sab npuab nwg, tabsis nwg rau txim rua cov tuabneeg kws khaavtheeb lawv le puab tsimnyog raug.

²⁴Mej cov kws ca sab rua tug TSWV, mej ca le cuab zug khov kho hab ua sab tawv qhawv.