Read Hmong Njua Phoo Ntawv Nkauj 32 Bible Online

Phoo Ntawv Nkauj 32 - Hmong Njua bible

Phoo Ntawv Nkauj 32

¹Cov tuabneeg kws tau nyob kaaj sab lug yog cov kws tug TSWV tsi suav has tas muaj txim, rua qhov nwg tub zaam puab lub txim lawm.

²Tug tuabneeg kws tau nyob kaaj sab lug, yog tug kws tug TSWV tsi suav has tas, nwg tau ua txhum, hab nwg tsi ua tuabneeg dlaag ntxag.

³Thaus kuv tsi leeg kuv tej kev txhum, kuv tsi muaj zug, rua qhov kuv quaj taag nub.

⁴Tug TSWV, koj rau txim rua kuv nruab nub hab mo ntuj, kuv tug zug yaaj ntshis ib yaam le tej fws lub caij ntuj qhua kws tshaav ntuj zab qhuav lawm.

⁵Thaus ntawd kuv leeg kuv tej kev txhum rua koj, kuv tsi zais tej kws kuv ua txhum ib qho le, kuv txhaj leeg kuv tej kev txhum huv tuabsi rua koj, hab koj zaam taagnrho kuv tej txhum txhum huv tuabsi moog.

⁶Yog le ntawd, thov ca cov tuabneeg kws fwm koj thov koj thaus puab xaav kuas koj paab, thaus muaj kev txomnyem fuam tuaj, tej ntawd yuav lug tsi txug puab.

⁷Koj yog kuv lub chaw nkaum, koj yuav cawm kuas kuv dlim ntawm txujkev puamtsuaj. Kuv txhaj hu nkauj nrov nrov qhuas koj txujkev cawm dlim, rua qhov koj yog tug tsomkwm kuv.

⁸Tug TSWV has tas, “Kuv yuav qha txujkev kws koj yuav taug rua koj, kuv yuav qha koj hab yuav paab ua koj tug tuavxaam.

⁹Tsi xob ruag le tug neeg lossis tug neeg zaag kws yuavtsum muab looj thawb lug looj hab saam xauv txhaj cob tau.”

¹⁰Cov tuabneeg sab phem yuav raug kev txomnyem, tabsis tug TSWV txujkev hlub yuav tsomkwm cov tuabneeg kws ca sab rua nwg moog le.

¹¹Mej cov kws yog tuabneeg ncaaj nceeg, ca le txaus sab hab zoo sab, rua qhov tug TSWV tau paab mej lawm. Mej cov kws noog nwg lug, ca le qw zoo sab.