Read Hmong Njua Phoo Ntawv Nkauj 34 Bible Online

Phoo Ntawv Nkauj 34 - Hmong Njua bible

Phoo Ntawv Nkauj 34

¹Kuv yuav naj nub ua tug TSWV tsaug, kuv yuav qhuas nwg tsi tseg tsi tu.

²Kuv yuav qhuas nwg tej num kws nwg tau ua taag lug lawm, thov kuas txhua tug kws raug kev tsimtxom ca le noog hab zoo sab!

³Ca le nrug kuv pav tug TSWV lub fwjchim kws luj kawg nkaus, peb suavdlawg ca le thooj txhij qhuas nwg lub npe.

⁴Kuv thov tug TSWV, hab nwg teb kuv tej lug thov, nwg tso kuv dlim ntawm tej kev txhawj ntshai huv tuabsi lawm.

⁵Cov tuabneeg raug tsimtxom tsaa qhovmuag saib nwg hab puab zoo sab kawg le, puab yuav tsi nplaam tej kws puab ca sab rua.

⁶Thaus cov tuabneeg txomnyem hu thov nwg paab, nwg teb puab tej lug thov; nwg cawm puab dlim ntawm puab tej kev ntxhuv sab kws raug puab huv tuabsi.

⁷Tug TSWV tug timtswv zuv rawv cov tuabneeg kws fwm tug TSWV, hab nwg cawm puab dlim kev puamtsuaj.

⁸Mej sim xaav saib tug TSWV ua zoo npaum le caag rua mej lawm? Cov tuabneeg kws lug nrhav chaw nkaum ntawm tug TSWV, puab tau nyob kaaj sab lug.

⁹Tug TSWV tsaav tuabneeg txhua tug ca le fwm nwg; cov tuabneeg kws noog tug TSWV lug yeej tsi tu ncua ib yaam dlaabtsi le.

¹⁰Txawm yog tsuv ntxhuav los tseem tshaib plaab hab tu pluag tsi muaj noj, tabsis cov tuabneeg kws fwm tug TSWV yuav muaj txhua yaam zoo kws puab xaav tau.

¹¹Kuv tej tubki, mej ca le lug ntawm nuav hab noog kuv has, kuv yuav qha kuas mej paub ua lub neej fwm tug TSWV.

¹²Mej puas xaav tau lub neej lomzem kaaj sab lug? Mej puas ntshaw txujsa ntev hab lub neej kaaj sab lug?

¹³Mej ca le tseg tsi xob has tej lug phem hab tsi xob has lug dlaag le.

¹⁴Tso plhuav tej kev ua phem tseg hab tig lug ua txuj zoo, Ca le nrhav kev nrug luas sis humxeeb kuas kawg koj lub sab.

¹⁵Tug TSWV saib ntsoov cov tuabneeg ncaaj nceeg hab noog rawv puab tej suab quaj,

¹⁶tabsis nwg tawmtsaam cov tuabneeg ua phem, yog le ntawd, thaus puab tuag lawm, txhaj tsi muaj tuabneeg ncu txug puab le.

¹⁷Thaus cov tuabneeg ncaaj nceeg thov tug TSWV, nwg noog puab tej lug thov, nwg cawm puab dlim ntawm tej kev ntxhuv sab.

¹⁸Tug TSWV nyob ze cov tuabneeg kws taag kev ca sab, nwg cawm cov tuabneeg kws tsi muaj chaw vaamkhom.

¹⁹Tug tuabneeg ncaaj nceeg tiv ntau yaam kev nyuaj sab, tabsis tug TSWV cawm nwg dlim tej kev ntxhuv sab huv tuabsi.

²⁰Tug TSWV tsomkwm nwg nraim tsi tso nwg tseg, nwg tej pobtxhaa yeej tsi muaj ib yaag yuav luv le.

²¹Tej kev phem yuav ua rua cov tuabneeg sab phem tuag moog, cov kws ntxub cov tuabneeg ncaaj nceeg yuav raug txim.

²²Tug TSWV yuav lug cawm nwg tsaav tuabneeg, cov kws lug cuag tug TSWV, hab thov nwg tsomkwm puab, yuav tsi raug kev puamtsuaj.