Read Hmong Njua Phoo Ntawv Nkauj 35 Bible Online

Phoo Ntawv Nkauj 35 - Hmong Njua bible

Phoo Ntawv Nkauj 35

¹Tug TSWV, thov koj tawmtsaam tug kws tawmtsaam kuv, hab ua rog rua cov tuabneeg kws ua rog rua kuv!

²Nqaa koj dlaim thaiv nav ntaaj hab koj cev rig tsho hlau lug cawm kuas kuv dlim.

³Tsaa koj raab muv hab raab taus ua rog rua cov tuabneeg kws caum kuv tua. Thov coglug has tas, “koj yuav cawm kuv.”

⁴Thov kuas cov tuabneeg kws nrhav kuv tua povtseg ca le swb hab poob ntsejmuag. Thov kuas cov tuabneeg tuav tswvyim ntxeev sab ua phem rua kuv tig tsiv rov qaab hab tsi xob sis hum.

⁵Thov kuas puab zoo ib yaam le tej quavnyaab kws cua muab ntsawj yaa taag, hab thov tug TSWV cov timtswv muab puab lawv kuas tawg tsiv ri sua moog.

⁶Thov kuas puab txuj hauv kev tsaus ntuj nti hab nplua heev thaus kws tug TSWV tug timtswv caum puab.

⁷Yeej tsi muaj ib qho txhum kws tsimnyog puab cuab hlua tog kuv kev, khawb qhov tog kuas kuv poob hab nteg tau kuv.

⁸Tabsis kev puamtsuaj yuav nteg tau puab ua ntej puab paub, puab yuav rov maag puab lub vuj hlua hab poob rua huv txujkev puamtsuaj.

⁹Ces kuv yuav zoo sab rua qhov muaj tug TSWV paab kuv, kuv yuav kaaj sab lug rua qhov nwg cawm kuv dlim.

¹⁰Taagnrho kuv lub sab yuav has rua tug TSWV has tas, “Yeej tsi muaj leejtwg zoo npaum le koj lawm. Koj tiv thaiv tug tuabneeg tsi muaj zug kuas dlim ntawm tug kws muaj zug, hab paab tug pluag kuas dlim ntawm tug tuabneeg limham.”

¹¹Cov tuabneeg sab phem ua timkhawv tsi tseeb tawmtsaam kuv, hab puab lam has tas kuv ua tej kev txhum kws kuv tsi paub le.

¹²Puab ua tej kev phem pauj kuv tej kev ua zoo, hab ua rua kuv sab ntsws puag taag.

¹³Tabsis thaus puab muaj mob, kuv naav cev rig tsho quaj ntsuag, kuv yoo mov tsi noj, kuv nyo hau thov Vaajtswv,

¹⁴ib yaam le kuv thov Vaajtswv rua kuv tug phoojywg lossis kuv tug kwvtij ntaag; kuv quaj ncig moog ncig lug ib yaam le tug kws quaj nyav nwg nam ntaag.

¹⁵Tabsis thaus kuv dlawm qaug, puab txhua tug puavleej zoo sab hab tuaj nyob vij vog luag kuv plig, tej tuabneeg dlog dlig los ca le tuaj ntaus kuv hab nplawm kuv.

¹⁶Puab thuam kuv ib yaam le tej tuabneeg sab phem, puab zawm nav hab zig ncauj rua kuv.

¹⁷Tug TSWV, tseem tshuav ntev le caag koj maam le tsaa qhovmuag saib zaaj nuav? Thov cawm kuas kuv dlim ntawm puab tej nplawm, thov cawm kuv txujsa ntawm cov tsuv ntxhuav nuav!

¹⁸Kuv yuav ua koj tsaug taabmeeg ntawm koj tsaav tuabneeg kws tuaj sis sau ua ke, hab kuv yuav qhuas koj taabmeeg puab.

¹⁹Thov tsi xob pub kuas kuv cov yeebncuab kws yog tuabneeg dlaag muaj kev zoo sab rua thaus kuv swb luas lawm. Tsi xob ca tej tuabneeg kws laam tau laam ntxub kuv ntawd zig ncaug ntxi muag rua kuv, thaus kuv tau kev nyuaj sab.

²⁰Puab tsi has tej lug zoo hum kuv sab hlo le, tabsis puab pheej has tej lug dlaag ntxag cov tuabneeg kws muaj kev hlub hab kev thaajyeeb huv lub tebchaws.

²¹Puab luag kuv hab qw has tas, “Peb tub pum tej kws koj ua lawm!”

²²Tabsis tug TSWV, koj tub pum tej nuav taag lawm. Yog le ntawd tug TSWV, thov koj tsi xob nyob ntsag tu, hab thov tsi xob nyob nrug dleb kuv.

²³Tug TSWV, koj ca le sawv tseeg lug hab tiv thaiv kuv, kuv tug Vaajtswv, koj ca le sawv lug hab paab kuv has plaub.

²⁴Tug TSWV, koj yog tug ncaaj nceeg, thov koj ca le txav txim rua kuv lawv le kuv yog tug tuabneeg kws tsi muaj txim; thov tsi xob pub kuv cov yeebncuab tau zoo luag kuv plig.

²⁵Thov tsi xob pub kuas puab muaj lub sab xaav has tas, “Peb tub muab nwg nqog lawm! Peb xaav ua lawv le peb lub sab nyam los yeej tau!”

²⁶Cov tuabneeg kws thaus kuv raug kev txomnyem, pheej rau sab ntso luag kuv plig hab zoo sab, thov kuas puab tsi xob sis hum, hab cov tuabneeg kws puab qhuas has tas, puab zoo dlua kuv, thov kuas puab raug kev txaajmuag hab poob ntsejmuag.

²⁷Cov tuabneeg kws txaus sab rua kuv txujkev ua zoo hab ncaaj nceeg, ca le qw zoo sab hab has tsi tseg has tas, “Tug TSWV yog tug muaj fwjchim luj kawg nkaus! Nwg txaus sab rua nwg tug tubkhai kawg nkaus le!”

²⁸Ces kuv yuav qha koj txujkev ncaaj nceeg rua suavdlawg, hab kuv yuav qhuas koj ib nub tsaus ntuj ndlais.