Read Hmong Njua Phoo Ntawv Nkauj 36 Bible Online

Phoo Ntawv Nkauj 36 - Hmong Njua bible

Phoo Ntawv Nkauj 36

¹Kev txhum has rua tug tuabneeg ua phem lub sab; nwg txhaj tsi leeg yuav Vaajtswv hab tsi paub ntshai Vaajtswv le.

²Rua qhov nwg xaav le nwg lub qhovmuag pum xwb, nwg xaav has tas, Vaajtswv yuav tsi pum nwg tej kev txhum hab tsi txav txim rua nwg ib zag le.

³Nwg has tej lug phem lug qas hab lug dlaag xwb, nwg tsi nyam ua lawv le kev txawj ntse hab kev ua zoo.

⁴Thaus nwg pw sau txaaj nwg xaav ntsoov rua txujkev ua phem xwb, nwg tsi ua ib yaam zoo hab tsi tso tej kev phem kev qas tseg le.

⁵Tug TSWV, koj txujkev hlub sab moog txug sau ntuj, koj txujkev ncaaj nceeg sab moog nto sau nruab ntug.

⁶Koj txujkev ncaaj nceeg luj ib yaam le lub hauv roob, koj txujkev txav txim tub ib yaam le havtxwv. Koj yog tug cawm tej tuabneeg hab tsaj txhu.

⁷Vaajtswv, koj txujkev hlub zoo kawg nkaus! Peb nrhav tau qhov chaw nkaum hab tsomkwm peb nyob huv qaab koj ob phob tis tug dluab ntxoov ntxoo.

⁸Peb tau noj tej zaub mov kws koj pub rua peb tsau npo. Koj pub peb haus tug dlej kws yog txujkev tau nyob kaaj sab lug.

⁹Koj yog lub qhovdlej cawm txujsa, vim koj yog qhov kaaj peb txhaj pum kev.

¹⁰Thov koj tsi xob tso cov kws hlub koj tseg, hab ua zoo rua cov kws muaj lub sab ncaaj nceeg.

¹¹Thov tsi xob pub cov tuabneeg khaavtheeb tawmtsaam kuv, lossis cov tuabneeg sab phem tuaj lawv kuv tawm.

¹²Cov tuabneeg kws ua phem ua qas qaug rua qhov twg, puab pw qhov ntawd sawv tsi taug le lawm.