Read Hmong Njua Phoo Ntawv Nkauj 37 Bible Online

Phoo Ntawv Nkauj 37 - Hmong Njua bible

Phoo Ntawv Nkauj 37

¹Tsis xob nyuaj sab rua tej kws cov tuabneeg sab phem ua, tsi xob khib rua cov tuabneeg kws ua kev txhum.

²Puab yuav ntsws sai ib yaam le tej nyom, puab yuav tuag sai ib yaam le tej nroj tsuag.

³Ca sab rua tug TSWV hab ua zoo, yog mej ua le ntawd, mej yuav nyob huv lub tebchaws tso sab lug.

⁴Nrhav kev kaaj sab ntawm tug TSWV hab nwg yuav muab rua mej lawv le mej lub sab xaav yuav.

⁵Muab mej lub cev hab lub sab lub ntsws rua tug TSWV kaav, hab ca sab rua nwg, nwg txhaj yuav paab mej,

⁶nwg yuav ua kuas mej txujkev ncaaj nceeg ci ib yaam le lub nub ci thaus taav su.

⁷Ua sab ntev hab tog tug TSWV ua nwg teg num, tsi xob nyuaj sab rua tej tuabneeg kws vaammeej, lossis cov tuabneeg kws ua tej kev phem kws puab xaav tseg lawm tav.

⁸Tsis xob nyuaj sab lossis chim; tej ntawd tsuas ua rua muaj kev ntxhuv sab xwb.

⁹Cov tuabneeg kws ca sab rua tug TSWV yuav muaj teb muaj chaw nyob, tabsis cov tuabneeg sab phem yuav raug muab ntab tawm moog.

¹⁰Cov tuabneeg sab phem nyob ib ntus xwb puab yuav puamtsuaj moog, mej xaav nrhav puab, tabsis yuav tsi pum puab,

¹¹tabsis cov tuabneeg txu fwjchim yuav muaj teb muaj chaw, muaj kev thaajyeeb hab kev tau zoo nyob kaaj sab lug.

¹²Tug tuabneeg sab phem tuavhuv tawmtsaam tug tuabneeg ncaaj nceeg, zawm nav zog rua nwg hab ntxub nwg.

¹³Tabsis tug TSWV luag cov tuabneeg sab phem plig, rua qhov nwg paub has tas tshuav tsi ntev puab yuav raug kev puamtsuaj.

¹⁴Cov tuabneeg sab phem rhu puab tej ntaaj hab ntaa puab tej neevnti tua cov tuabneeg pluag hab txomnyem, hlais cov tuabneeg ncaaj nceeg kuas tuag taag,

¹⁵tabsis puab tej ntaaj yuav rov tua puab tuag, hab puab tej qhaub neevnti yuav luv taag.

¹⁶Tej yaam miv miv kws tug tuabneeg sab zoo muaj, tseem muaj nqes dlua cov tuabneeg sab phem tej nyaj txag qhov txhua chaw.

¹⁷Rua qhov tug TSWV yuav ua rua cov tuabneeg sab phem tug zug kuas pluj moog, tabsis nwg yuav tsomkwm cov tuabneeg ncaaj nceeg.

¹⁸Tug TSWV tsomkwm cov tuabneeg kws fwm nwg, hab lub tebchaws yuav yog puab tug moog ibtxhis le.

¹⁹Puab yuav tsi tau tiv kev txomnyem thaus kws muaj kev phem tuaj, puab yuav muaj txaus noj lub sijhawm kws muaj kev tshaib plaab.

²⁰Tabsis cov tuabneeg sab phem yuav tuag moog, tug TSWV cov yeebncuab yuav qhuav taag ib yaam le tej paaj nroj, puab yuav yaaj ntshis taag moog ib yaam le tej paa tawg.

²¹Tug tuabneeg sab phem qev txais hab tsi them rov qaab le, tabsis tug tuabneeg sab zoo yeej muaj lub sab dlawb paug pub tau rua luas.

²²Cov tuabneeg kws tug TSWV foom koob moov rua yuav tau lub tebchaws lug ua puab tug, tabsis cov tuabneeg kws tug TSWV foom tsi zoo yuav raug ntab tawm moog.

²³Tug TSWV yeej yog tug kws coj tuabneeg txuj hauv kev, hab yog tug tsomkwm cov tuabneeg kws ua hum nwg sab.

²⁴Txawm yog puab qaug los puab yeej tsi pw tuabywv, rua qhov tug TSWV yuav tsaa puab sawv.

²⁵Nwgnuav kuv yog ib tug tuabneeg laug, kuv yeej ua neej nyob lug ntev lawm, tabsis kuv tsi pum tug TSWV muab ib tug tuabneeg zoo povtseg rua qhov twg lossis ca nwg tej mivnyuas moog thov khawv noj.

²⁶Nwg yeej muaj pub hab qev tau rua rua lwm tug txhua lub sijhawm, hab nwg tej mivnyuas puavleej yog koob moov.

²⁷Tso plhuav txujkev phem tseg hab tig lug ua txuj zoo, hab mej tej xeebntxwv txhaj yuav tau nyob huv lub tebchaws nuav moog le,

²⁸tug TSWV yeej nyam txujkev ncaaj nceeg hab tsi tau muab nwg tsaav tuabneeg kws muaj kev ncaaj nceeg tso tseg le. Nwg tsomkwm puab moog ibtxhis tsi kawg, tabsis cov tuabneeg sab phem tej xeebntxwv yuav raug ntab tawm moog.

²⁹Cov tuabneeg ncaaj nceeg yuav ua cov kaav lub tebchaws, hab nyob huv lub tebchaws ntawd moog ibtxhis le.

³⁰Tug tuabneeg ncaaj nceeg yeej has lug txawj lug ntse, hab nwg yeej has tej lug tseeb xwb.

³¹Nwg khaws nkaus nwg tug Vaajtswv txuj kevcai rua nruab sab hab tsi muab t so tseg.

³²Tug tuabneeg sab phem soj nraim tug tuabneeg ncaaj nceeg, hab nrhav kev yuav muab nwg tua povtseg.

³³Tabsis tug TSWV yuav tsi muab nwg tso rua nwg tug yeebncuab lub fwjchim lossis ca nwg raug txim thaus luas rau txim rua nwg.

³⁴Mej ca sab rua tug TSWV hab ua lawv le nwg tej lug saamfwm; nwg yuav muab lub tebchaws rua mej nyob ua mej tug, kuas mej tau ntsejmuag, hab mej yuav saib ntsoov nwg muab cov tuabneeg sab phem ntab tawm moog.

³⁵Kuv paub has tas muaj ib tug tuabneeg sab phem kws pheej ua limham kawg le, nwg tsaav nwg lub fwjchim luj tshaaj suavdlawg huv tuabsi, ib yaam le tug ntoo thuv peg roob Lenpanoos,

³⁶tabsis tom qaab nuav kuv dlua kev tuaj, kuv tsi pum nwg nyob qhov chaw ntawd lawm, kuv nrhav nwg, tabsis tsi pum nwg le.

³⁷Ua tuab zoo saib tug tuabneeg sab zoo hab tshuaj tug tuabneeg ncaaj nceeg, tug tuabneeg kws tsi nyam ua plaub ua ntug yuav muaj xeebntxwv coob,

³⁸tabsis cov tuabneeg txhum puab raug kev puamtsuaj taag, hab puab tej xeebntxwv los tu noob taag tsi seem ib tug le.

³⁹Tug TSWV cawm cov tuabneeg ncaaj nceeg hab nwg tsomkwm puab thaus puab raug kev txomnyem.

⁴⁰Nwg paab puab hab cawm puab dlim, nwg cawm puab dlim ntawm cov tuabneeg sab phem, rua qhov puab vaamkhom nwg ua tug tsomkwm puab.