Read Hmong Njua Phoo Ntawv Nkauj 38 Bible Online

Phoo Ntawv Nkauj 38 - Hmong Njua bible

Phoo Ntawv Nkauj 38

¹Tug TSWV, thov tsi xob chim hab rau txim rua kuv!

²Koj tej xub vug raug kuv ib ce to taag, koj ntaus kuv qaug rua huv aav.

³Vim koj txujkev chim, kuv txhaj raug mob nyaav le nuav, muaj kaab mob nyob thoob plawg kuv lub cev, vim kuv tej kev txhum xwb.

⁴Kuv tej kev txhum nphau lug tsuam kuv, tej kev txhum ntawd ua lub nraa nyaav rua kuv ris tsi taug le lawm.

⁵Rua qhov kuv tau ua tej yaam kws ruag kawg le, kuv tej qhov txhaab tsw lwj ntxag hab qawj zuj zug lawm.

⁶Kuv ca le khoov dluav, hab zuav ua ib pawg lawm, kuv quaj ntsuag tu sab taag nub.

⁷Kuv ua npaws ib ce kub lug hab tub ze rua qhov kws kuv yuav tuag.

⁸Kuv ib ce qaug quas zig hab zuav ua ib pawg, kuv tau kev txomnyem sab hab kuv lub sab quaj quas ntsuag.

⁹Tug TSWV, koj yeej paub kuv tog koj ntev lug lawm, hab koj yeej nov kuv lub suab quaj.

¹⁰Kuv lub plawv tseem dlha, kuv tug zug ntaug taag lawm, hab kuv lub qhovmuag tsi pum kev le.

¹¹Kuv tej phoojywg hab tej tuabneeg zej zog tsi xaav tuaj ze kuv, vim kuv tej mob xwb, txawm yog kuv tsev tuabneeg los puab txaav dleb ntawm kuv kawg le.

¹²Cov tuabneeg kws xaav tua kuv povtseg cuab hlua tog kuv kev, hab cov tuabneeg kws xaav ua kuas kuv raug mob, pheej hem kuas kuv raug kev puamtsuaj, puab tuavhuv tawmtsaam kuv tsi tseg le.

¹³Kuv zoo ib yaam le tug tuabneeg laag ntseg kws tsi nov lug hab kuv zoo ib yaam le tug tuabneeg ruag kws tsi txawj has lug.

¹⁴Kuv zoo ib yaam le tug tuabneeg kws tsi paub leejtwg le, rua qhov kuv yeej tsi nov.

¹⁵Tabsis tug TSWV, kuv ca sab rua koj nkaus xwb, hab tug TSWV kws yog kuv tug Vaajtswv, koj yeej yuav teb kuv tej lug thov.

¹⁶Thov tsi xob pub kuv cov yeebncuab saib tsi taug kuv, thaus kuv raug kev txomnyem, thov tsi xob pub puab ua limham rua kuv thaus kuv qaug lawm.

¹⁷Kuv tub yuav qaug hab kuv npua mob rawv xwb.

¹⁸Kuv leeg kuv tej kev txhum, kuv tu sab kawg rua tej kws kuv ua txhum.

¹⁹Kuv cov yeebncuab khov kho hab muaj zug kawg le, muaj coob tug ca le laam ntxub kuv tsi muaj qaabhau dlaabtsi.

²⁰Cov tuabneeg kws ua phem pauj zoo tub yog puab txhobtxwm ua tawmtsaam kuv, rua qhov kuv yeej ua ncaaj ua zoo xwb.

²¹Tug TSWV, thov koj tsi xob tso kuv tseg, kuv tug Vaajtswv, thov koj tsi xob txaav dleb ntawm kuv moog le.

²²Tug TSWV kws yog kuv tug cawmseej, thov koj ca le paab kuv taamsim nuav!