Read Hmong Njua Phoo Ntawv Nkauj 39 Bible Online

Phoo Ntawv Nkauj 39 - Hmong Njua bible

Phoo Ntawv Nkauj 39

¹Kuv has tas, “Kuv yuav ceevfaaj rua tej kws kuv ua hab tsi pub kuv tug nplaig has tej lug kws txhum; kuv yuav tsi has ib yaam dlaabtsi thaus cov tuabneeg sab phem nyob ze kuv.”

²Kuv nyob tuabywv xwb, tsi has ib lu lug le, txawm yog tej lug zoo los kuv tsi has le. Tabsis kuv tej kev txomnyem nthuav luj heev tuaj lawm,

³hab ua rua kuv ntxhuv sab kawg le. Kuv yimfuab xaav ntau, mas kuv yimfuab ntxhuv sab, kuv txhaj nug has tas:

⁴“Tug TSWV, kuv yuav ua neej nyob ntev le caag? Thaus twg kuv maam le tuag? Thov qha rua kuv saib tshuav ntev le caag kuv txujsa maam le tu.”

⁵Koj pub txujsa rua kuv ua neej nyob tuab lu kawg le. Kuv txujsa tsi muaj nqes dlaabtsi rua koj: txhua tug tuabneeg txujsa zoo ib yaam le nthwv cua ntsawj ib vuag xwb,

⁶hab zoo ib yaam le tug dluab ntxoov ntxoo kws nyob ib plag xwb, txhua yaam kws nwg ua tsi tseemceeb dlaabtsi le, nwg khaws nyaj txag tseg, tabsis tsi paub has tas leejtwg yog tug yuav tau.

⁷Tug TSWV, nwgnuav kuv yuav ca sab rua dlaabtsi? Kuv ca sab rua koj nkaus xwb.

⁸Thov cawm kuas kuv dlim ntawm kuv tej kev txhum, thov tsi xob pub cov tuabneeg ruag luag kuv plig hab ua saib tsi taug kuv.

⁹Kuv yuav nyob tuabywv hab tsi has lug le, rua qhov koj yog tug kws ua rua kuv raug tej kev txomnyem nuav.

¹⁰Thov tsi xob nplawm kuv ntxiv lawm! Thaus koj nplawm kuv, kuv tub yuav laug tuag.

¹¹Qhov kws koj nplawm hab qhuab ntuag tuabneeg, yog koj rau txim rua puab tej kev txhum, hab koj rhuav puab tej nyaj txag qhov txhua chaw ib yaam le ntsaum kaabrwg noj. Txhua tug tuabneeg txujsa zoo ib yaam le nthwv cua ntsawj ib vuag xwb!

¹²Tug TSWV, thov noog kuv tej lug thov, hab nov kuv lub suab quaj hu koj, thov lug cawm kuv thaus kuv taabtom quaj lug kua muag nuav. Kuv tsuas zoo ib yaam le tug qhua kws nrug koj nyob ib plag le thaus kuv cov yawmkoob hab xwb.

¹³Thov koj tso kuv tseg kuas kuv muaj kev kaaj sab mivntsiv ua ntej kuv tuag moog hab tsi muaj kuv lawm.