Read Hmong Njua Phoo Ntawv Nkauj 40 Bible Online

Phoo Ntawv Nkauj 40 - Hmong Njua bible

Phoo Ntawv Nkauj 40

¹Kuv ua sab ntev tog tug TSWV lug paab kuv; ces tug TSWV noog kuv tej lug thov hab nov kuv lub suab quaj.

²Nwg nqug kuv tawm huv lub qhov kws yog txujkev puamtsuaj, hab nqug kuv tawm huv lub qhov tuag kws yog cov xuabzeb lug. Nwg tsaws kuv moog tso rua sau lub pobzeb kws nyob kaaj sab lug, hab ua rua kuv muaj chaw nyob ruaj khov.

³Nwg qha kuv hu ib zaaj nkauj tshab, yog zaaj nkauj kws hu qhuas peb tug Vaajtswv. Txhua tug kws pum zaaj nuav yuav ntshai hab puab yuav ca sab rua tug TSWV.

⁴Txhua tug kws ca sab rua tug TSWV muaj kev kaaj sab, puab yog cov kws tsi moog pe mlom lossis yog cov kws tsi koom nrug cov kws pe tej vaajtswv cuav.

⁵Tug TSWV, peb tug Vaajtswv, koj tau ua ntau yaam txujci paab peb lug lawm; yeej tsi muaj ib tug zoo cuag koj! Koj npaaj tau ntau yaam rua peb. Kuv yeej pav tsi tau tej ntawd, rua qhov tej ntawd muaj ntau heev!

⁶Koj tsi xaav tau tej khoom theej txhoj hab tej khoom fij; koj tsi tau has kuas muab tsaj lug tua hlawv fij taagnrho rua sau lub thaaj lossis muab khoom fij dlaws kev txhum. Tabsis, koj qheb kuv qhovntsej kuas noog koj tej lug,

⁷yog le ntawd, kuv txhaj teb has tas, “Kuv nyob ntawm nuav, koj tej lug qha kuv nyob rua huv phoo ntawv kevcai.

⁸Kuv tug Vaajtswv, kuv yeej txaus sab ua zoo kuas hum koj sab nyam. Kuv yuav khaws koj tej lug qha rua huv kuv lub sab moog le.”

⁹Tug TSWV, thaus koj tsaav tuabneeg tuaj sis sau ua ke, kuv yuav qha Txujmoo Zoo kws yog koj txujkev cawm peb rua puab noog. Koj paub has tas, kuv qha zaaj nuav tsi tseg le.

¹⁰Kuv tsi tau muab txujmoo zoo kws yog txujkev cawm dlim npog ca hab ca kuv tuab leeg paub xwb. Kuv qha koj txujkev ncaaj nceeg hab koj txujkev cawm dlim tsi tseg le. Kuv tsi tau muab koj tej lug zoo hab kev hlub kws nyob moog ibtxhis npog ca tsi qha rua koj tsaav tuabneeg kws tuaj txoos ua ke nuav le.

¹¹Tug TSWV, kuv paub has tas koj yeej hlub kuv tsi tso kuv tseg le. Koj txujkev hlub hab kev ncaaj nceeg yuav cawm kuas kuv dlim.

¹²Muaj kev txomnyem nyob puagncig kuv suav tsi txheeb le! Kuv tej kev txhum rov raug kuv hab ua rua kuv qhovmuag tsi pum kev le lawm, tej kev txhum ntawd tseem ntau tshaaj cov plaubhau sau kuv taubhau, hab ua rua kuv taag kev ca sab lawm.

¹³Tug TSWV, thov cawm kuv, ca le paab kuv taamsim nuav.

¹⁴Thov kuas cov tuabneeg kws nrhav kuv tua ca le swb hab tsi sis hum, thov kuas cov tuabneeg kws taabtom zoo sab thaus kuv raug kev txomnyem raug txaajmuag hab tsiv rov qaab.

¹⁵Thov kuas cov tuabneeg kws luag kuv plig ca le swb hab ntshai tshee nyo.

¹⁶Thov kuas txhua tug kws lug cuag koj muaj kev zoo sab hab kaaj sab lug. Thov kuas txhua tug kws taabtom ua tsaug rua koj txujkev cawm dlim ca le has tas, “Tug TSWV yog tug kws muaj fwjchim luj kawg nkaus.”

¹⁷Tug TSWV, kuv qaug zug hab txomnyem kawg le, tabsis koj tseem ncu ntsoov kuv hab. Koj yog kuv tug cawmseej hab yog kuv tug Vaajtswv, thov koj kawgkag lug paab kuv!