Read Hmong Njua Phoo Ntawv Nkauj 41 Bible Online

Phoo Ntawv Nkauj 41 - Hmong Njua bible

Phoo Ntawv Nkauj 41

¹Cov kws mob sab cov tuabneeg pluag yog cov kws tau kev kaaj sab lug, tug TSWV yuav paab puab thaus puab raug kev txomnyem.

²Tug TSWV yuav tiv thaiv puab hab tsomkwm kuas puab muaj sa nyob, nwg yuav pub kuas puab tau nyob kaaj sab lug huv puab lub tebchaws, nwg yuav tsi muab puab tso rua puab cov yeebncuab.

³Tug TSWV yuav paab puab thaus puab raug mob raug nkeeg, hab yuav khu puab tej mob kuas puab muaj zug khov kho rov tuaj.

⁴Kuv has tas, “Tug TSWV, kuv ua txhum luj kawg nkaus rua koj, thov koj hlub hab paab khu kuas kuv zoo!”

⁵Kuv cov yeebncuab has tej lug phem kawg le rua kuv. Puab xaav kuas kuv tuag hab xaav kuas kuv pluj ndlais moog.

⁶Cov tuabneeg kws tuaj pum kuv yog cov kws sab tsi ncaaj, thaus puab tawm moog, puab coj kuv lub moo moog xyaav tsi zoo, puab coj kuv lub moo moog xyaav rua txhua qhov.

⁷Taagnrho cov tuabneeg kws ntxub kuv, ib leeg ntxhi rua ib leeg has txug kuv, puab xaav ua tej yaam kws phem rua kuv.

⁸Puab has tas, “Nwg taabtom raug mob nyaav kawg nkaus, nwg yuav tsi sawv sau nwg lub txaaj lug ib zag ntxiv le lawm.”

⁹Txawm yog kuv tug phoojywg zoo kws kuv ntseeg sab tshaaj plawg hab tug kws nrug kuv noj mov ua ke los tseem ntxeev sab tawmtsaam kuv lawm hab.

¹⁰Tug TSWV, thov taabncuab kuv hab rov txhawb kuas kuv muaj zug tuaj, hab kuv yuav rov ua pauj rua kuv cov yeebncuab.

¹¹Puab yuav tsi yeej kuv ib zag le lawm. hab kuv yuav paub has tas koj yeej txaus sab rua kuv tag.

¹²Koj yuav paab kuv, rua qhov kuv yeej ua ncaaj ua nceeg hab koj yuav puag rawv kuv rua huv koj lub xubndlag moog ibtxhis le.

¹³Ca le qhuas tug TSWV kws yog cov Yixalayees tug Vaajtswv! Nwgnuav, ca le qhuas nwg hab qhuas moog ibtxhis tsi kawg le! Amees! Amees!