Read Hmong Njua Phoo Ntawv Nkauj 42 Bible Online

Phoo Ntawv Nkauj 42 - Hmong Njua bible

Phoo Ntawv Nkauj 42

¹Vaajtswv, kuv lub sab kub lug nrhav koj ib yaam le tug muaslwj nrhav tug dlej ndlwg txag zag, vim nwg nqhes dlej heev.

²Vaajtswv tug kws muaj sa nyob, kuv lub sab nqhes xaav nyob ze koj. Thaus twg kuv txhaj le tau moog pehawm koj nyob tim ntsej tim muag?

³Kuv quaj taag nub taag mo, kuv tej kua muag yog kuv cov mov noj; kuv cov yeebncuab naj nub nug kuv has tas, “Koj tug Vaajtswv nyob qhov twg?”

⁴Thaus kuv xaav txug lub neej kws dlhau lug, kuv tu sab kawg, thaus kuv nrug cov tuabneeg coob coob moog rua huv Vaajtswv lub tsev, hab kuv coj puab moog tsheej paab hu nkauj zoo sab hab qw qhuas Vaajtswv.

⁵Vim le caag kuv nyuaj sab ua luaj? Vim le caag kuv raug kev txomnyem ua luaj le? Kuv yuav muab kuv txujkev ca sab tso plhuav rua Vaajtswv, hab kuv yuav rov qhuas nwg dlua ib zag ntxiv, nwg yog kuv tug Cawmseej hab yog kuv tug Vaajtswv.

⁶Kuv poob tebchaws tuaj nyob ntawm nuav ua lub neej lwj sab quas ntsuav, kuv txhaj ncu txug Vaajtswv. Nwg ca kev nyuaj sab lug raug kuv ib yaam le dlej havtxwv ndlaas tej nam twv tuaj nyaab kuv, hab ib yaam le tug dlej tsaws tsaag sau lub Roob Helemoos hab Mixales lug rua ntawm tug dlej Yauladees.

⁸Thaus nruab nub, thov tug TSWV qha nwg txujkev hlub kws nyob moog le rua kuv, thaus tsaus ntuj kuv txhaj tau hu nkauj ua nwg tsaug, kuv thov Vaajtswv kws yog tug tuav kuv txujsa.

⁹Kuv has rua Vaajtswv kws yog tug tiv thaiv kuv has tas, “Vim le caag koj tsi ncu qaab kuv lawm? Vim le caag kuv yuav tau tiv kuv cov yeebncuab txujkev tsimtxom ua luaj le?”

¹⁰Puab thuam kuv, ua rua kuv sab ntsws lwj taag, vim puab pheej nug kuv tsi tseg has tas, “Koj tug Vaajtswv nyob qhov twg?”

¹¹Vim le caag kuv nyuaj sab ua luaj? Vim le caag kuv yuav raug kev txomnyem ua luaj le? Kuv yuav tso sab plhuav rua Vaajtswv hab kuv yuav rov qhuas nwg dlua, nwg yog kuv tug cawmseej hab yog kuv tug Vaajtswv.