Read Hmong Njua Phoo Ntawv Nkauj 44 Bible Online

Phoo Ntawv Nkauj 44 - Hmong Njua bible

Phoo Ntawv Nkauj 44

¹Vaajtswv, peb tej qhovntsej yeej nov ntsoov zaaj nuav, peb cov yawmkoob yeej ibtxwm pav zaaj nuav qha rua peb has txug tej txujci tseemceeb kws koj tau ua rua puab tam ntawd tau ntau xyoo lug lawm le nuav:

²Koj muab cov tuabneeg nruj tsiv ntab tsiv tawm lawm, hab sau zog koj tsaav tuabneeg lug nyob huv puab lub tebchaws, koj rau txim rua luas lwm tsaav tuabneeg hab ca koj tsaav tuabneeg tau nyob kaaj sab lug.

³Koj tsaav tuabneeg tsi tau ntaus yeej lub tebchaws ntawd, vim puab tej ntaaj hab puab lub fwjchim, tabsis yog koj lub fwjchim hab koj tug zug ua rua puab yeej, hab koj txaus sab rua puab vim koj hlub puab.

⁴Koj yog kuv tug vaajntxwv hab yog kuv tug Vaajtswv, Koj pub rua koj tsaav tuabneeg muaj yeej,

⁵tub yog muaj koj lub fwjchim peb txhaj yeej peb cov yeebncuab.

⁶Kuv tsi ca sab rua kuv raab neev nti lossis kuv raab ntaaj has tas nwg yuav cawm tau kuv dlim;

⁷tabsis tub yog koj cawm peb dlim ntawm peb cov yeebncuab, peb txhaj yeej cov tuabneeg kws ntxub peb.

⁸Peb yuav naj nub qhuas koj hab ua koj tsaug moog ibtxhis le.

⁹Tabsis nwgnuav koj tso peb tseg, hab ca peb swb luas; koj tsi nrug peb cov tubrog moog ntaus rog le lawm.

¹⁰Koj ua rua peb tsiv ntawm peb cov yeebncuab rov qaab, hab txhua yaam kws yog peb tug, luas muab fuab moog lawm dlu lug.

¹¹Koj ca luas muab peb hlais ib yaam le hlais tej yaaj; Koj muab peb faib moog nyob thoob plawg rua txhua lub tebchaws.

¹²Koj muab koj tsaav tuabneeg muag ua nqe pheej yig heev, zoo le puab tsi muaj nqes le.

¹³Peb tej tuabneeg zej zog pum tej kws koj ua rua peb ntawd, ces puab saib tsi taug peb hab luag peb plig.

¹⁴Koj muab peb ua ib zaaj kwvfuam rua pejkum tebchaws has, puab txhaj cu hau nto hab saib tsi taug peb le.

¹⁵Kuv poob ntsejmuag kawg nkaus, kuv txaajmuag kawg le,

¹⁶thaus kuv nov kuv cov yeebncuab hab cov tuabneeg kws ntxub kuv tej lug tshev hab thuam kuv.

¹⁷Txawm yog tej ntawd lug raug peb los peb tseem ncu ntsoov koj, lossis tsi tso koj tej lug cog tseg kws koj muab cob rua peb.

¹⁸Peb tsi tau ua saib tsi taug koj; peb tsi tau tawv nyom koj tej lug saamfwm.

¹⁹Koj tsi paab peb hab muab peb tso rua paab tsaj qus, koj muab peb povtseg rua huv lub qhov kws tub tsaus ntuj nti.

²⁰Yog peb tso tseg tsi pehawm peb tug Vaajtswv; hab moog pe lwm tsaav tuabneeg tej vaajtswv

²¹los Vaajyswv yeej paub tej nuav, rua qhov Vaajtswv paub tej kws peb lub sab xaav huv tuabsi.

²²Tabsis vim peb ntseeg koj, luas txhaj naj nub yuav tua peb, luas ua rua peb ib yaam le tug yaaj kws luas yuav caab moog tua.

²³Tug TSWV, ca le sawv! Vim le caag koj tsaug zug? Koj ca le sawv! Thov tsi xob tso peb tseg moog ibtxhis le!

²⁴Vim le caag koj tsiv nkaum peb? Hab koj txawm tsi ncu txug peb tej kev txomnyem hab kev nyuaj sab le?

²⁵Peb qaug puamtsuaj taag rua huv aav; peb pw txaajmuag ntsuav rua sau cov moov aav,

²⁶Thov koj ca le lug paab peb! Rua qhov koj txujkev hlub kws tsi paub kawg yog qhov kws cawm tau peb dlim!