Read Hmong Njua Phoo Ntawv Nkauj 45 Bible Online

Phoo Ntawv Nkauj 45 - Hmong Njua bible

Phoo Ntawv Nkauj 45

¹Kuv lub sab puv nkaus tej lug zoo thaus kuv sau zaaj nkauj nuav rua tug vaajntxwv. Kuv tug nplaig npaaj rawv has tej lug sis dlhos ib yaam le tug kws sau ntawv tug cwjmem.

²Koj yog tug kws zoo nraug tshaaj plawg tej txivneej huv tuabsi, hab koj has lug nplag lag xwb. Vaajtswv yeej foom koob moov rua koj moog ibtxhis le.

³Tug vaajntxwv kws muaj fwjchim, ca le ris koj raab ntaaj rua ntawm dluav; koj yog tug muaj tshwjchim hab muaj koob meej.

⁴Ca le caij neeg moog le tug muaj fwjchim hab muaj yeej, txhaj yuav tiv thaiv tau txujkev tseeb hab kev ncaaj nceeg. Koj tug zug nchaav yuav ua rua koj muaj yeej luj kawg nkaus!

⁵Koj tej xub vug ntse zuag plag, tej xub vug ntawd yuav chob koj cov yeebncuab lub plawv; Ntau tsaav tuabneeg yuav qaug pawg lug ntawm koj kutaw.

⁶Lub tebchaws kws Vaajtswv muab rua koj yuav nyob moog ibtxhis tsi kawg le. Koj yuav kaav koj tsaav tuabneeg moog rua txujkev ncaaj nceeg.

⁷Koj nyam kev ncaaj nceeg hab ntxub kev ua phem ua qas. Vim le nuav, tug TSWV kws yog koj tug Vaajtswv txhaj xaiv koj hab pub kev zoo sab rua koj ntau tshaaj lwm tug vaajntxwv huv tuabsi.

⁸Muab tej tshuaj tsw qaab mules hab alu-es pleev koj tej rig tsho tsw qaab ntxag, huv koj lub loog kws muaj kaug ntxhw teeb kuas zoo nkauj, muaj cov ntaus nkauj nogncaas ua rua koj zoo sab.

⁹Cov quaspuj kws nyob huv koj lub tsev, muaj ibtxha yog tej vaajntxwv cov ntxhais, hab nam vaajntxwv coj tej saw kub kws zoo kawg nkaus sawv ntawm koj lub zwmtxwv saab xis.

¹⁰Vaajntxwv tug nkauj nyaab, ca le noog tej lug kws kuv has, tso plhuav koj tsaav tuabneeg hab koj cov neejtsaa tseg tsi xob ncu;

¹¹Koj kev zoo nkauj yuav ua rua vaajntxwv txaus sab heev, nwg yog koj tug tswv, koj yuavtsum fwm nwg.

¹²Cov tuabneeg kws nyob peg lub nroog Tiles yuav nqaa khoom tuaj pub rua koj, cov tuabneeg npluanuj yuav tuaj nrug koj sis raug zoo.

¹³Vaajntxwv tug ntxhais kws nyob huv lub loog zoo nkauj kawg nkaus le! Muab tej xuv kub kws tawg paaj nraug zeeg lug xaws nwg lub tsho.

¹⁴Nwg naav lub tsho txaij nraug zeeg ua ntej loo moog cuag vaajntxwv, cov nam txais ntsuab ua ke kaaj nab lawv nwg qaab, hab puab puavleej yog cov kws moog cuag vaajntxwv.

¹⁵Puab muaj kev lomzem zoo sab kawg moog rua huv vaajntxwv lub loog.

¹⁶Kuv tug vaajntxwv, koj yuav muaj tub coob, sawv lug ua vaajntxwv hloov koj cov yawmkoob chaw, hab koj yuav tsaa puab lug kaav taagnrho lub nplajteb nuav.

¹⁷Kuv zaaj nkauj yuav ua rua koj lub koob meej nto moo lug moog ibtxhis, hab txhua tug yuav qhuas koj moog taag koj tam neej.