Read Hmong Njua Phoo Ntawv Nkauj 48 Bible Online

Phoo Ntawv Nkauj 48 - Hmong Njua bible

Phoo Ntawv Nkauj 48

¹Tug TSWV yog tug muaj fwjchim hab tsimnyog qhuas, nyob huv peb tug Vaajtswv lub nroog sau nwg lub roob dlawbhuv.

²Xi-oos yog Vaajtswv lub roob kws sab hab zoo nkauj kawg nkaus le, tug vaajntxwv kws muaj fwjchim luj lub nroog, yog qhov chaw zoo sab rua lub nplajteb nuav.

³Vaajtswv qha has tas muaj kev cawm dlim huv lub nroog ntawd, nwg yog lub chaw faajxwm kws ruaj khov.

⁴Tej vaajntxwv txhaj sis sau ua ke tuaj ntaus lub roob Xi-oos.

⁵Tabsis thaus puab pum lub nroog ntawd, puab xaav tsi thoob le, puab ntshai hab tsiv rov qaab.

⁶Puab ntshai ua ib ce tshee nyo ib yaam le tug quaspuj kws mob plaab yuav yug mivnyuas,

⁷hab ib yaam le khaub zeeg cua ntsawj tej nkoj ntxeev.

⁸Peb tub nov tej txujci tseemceeb kws Vaajtswv tau ua taag lug lawm, hab taamsim nuav peb qhovmuag tub pum tej txujci ntawd nyob huv peb tug Vaajtswv kws muaj fwjchim luj kawg nkaus lub nroog; nwg yuav tsomkwm lub nroog ntawd kuas nyob kaaj sab lug moog ibtxhis.

⁹Vaajtswv, peb lub sab xaav ntsoov txug koj txujkev hlub kws nrug nraim peb huv koj lub Tuamtsev xwb.

¹⁰Tej tuabneeg nyob txhua qhov chaw puavleej qhuas koj nkaus xwb, hab koj lub koob meej nrov nchaa moo lug moog thoob plawg huv qaab ntuj nuav. Koj tswjfwm ncaaj nceeg;

¹¹thov pub rua cov tuabneeg sau roob Xi-oos muaj kev zoo sab! Koj yeej txav txim ncaaj nceeg, thov kuas Yudas tej nroog tau nyob kaaj sab lug!

¹²Vaajtswv tsaav tuabneeg moog ncig lub roob Xi-oos hab suav tej chaw tsomfaaj,

¹³moog saib tug ntsaa yeej hab tshuaj saib tej chaw faajxwm kuas tseeb, mej txhaj yuav pav tau qha rua tam tom ntej paub has tas,

¹⁴“Tug Vaajtswv nuav yog peb tug Vaajtswv moog ibtxhis tsi kawg le, nwg yuav coj peb ib tam dhau rua ib tam moog ibtxhis le.”