Read Hmong Njua Phoo Ntawv Nkauj 49 Bible Online

Phoo Ntawv Nkauj 49 - Hmong Njua bible

Phoo Ntawv Nkauj 49

¹Mej suavdlawg ca le noog zaaj nuav! Taagnrho tej tuabneeg kws nyob txhua qhov chaw ca le tig qhovntsej noog zaaj nuav,

²tsi has tug hlub tug yau zoo ib yaam nkaus, hab tug muaj tug pluag nyob ua ke.

³Tej kws kuv lub sab xaav yeej tseeb, kuv yuav has tej lug kws txawj ntse xwb.

⁴Kuv yuav tig qhovntsej ua tuab zoo noog tej paajlug, hab txhais kuas tau tej ntsab lug ib yaam le thaus kuv ntaus nkauj nogncaas.

⁵Kuv tsi ntshai thaus muaj kev txomnyem hab muaj yeebncuab tuaj vij kuv,

⁶cov tuabneeg phem ntawd ca sab rua puab tej kev npluanuj hab khaav ntxhas rua puab tej kev muaj nyaj txag xwb.

⁷Tsi muaj leejtwg yuav rov cawm tau nwg dlim, nwg tsi muaj peevxwm txhwv tau nwg txujsa ntawm Vaajtswv lug.

⁸Rua qhov tug nqe kws them tuabneeg txujsa kim heev. Tej kws nwg coj moog them yeej tsi txaus tug nqe kuas

⁹tso nwg dlim huv lub qhov ntxaa, kuas nwg tau txujsa nyob moog ibtxhis.

¹⁰Suavdlawg yeej paub has tas, txawm yog cov tuabneeg txawj ntse los puavleej tuag ib yaam le cov tuabneeg kws tsi muaj kev txawj ntse hab cov tuabneeg ruag. Puab tso puab tej nyaj txag hab txhua yaam rua puab tej xeebntxwv.

¹¹Puab lub qhov ntxaa yog puab lub tsev kws puab nyob moog ibtxhis ntaag; txawm yog puab muaj laj muaj teb ntau los puab tsuas tau lub qhov ntxaa kws yog qhov chaw kws puab yuav nyob moog le.

¹²Tuabneeg lub koob meej hab kev muaj txag npluanuj yeej paab tsi tau kuas nwg dlim txujkev tuag; nwg yeej yuav tuag ib yaam le tej tsaj.

¹³Saib yuav muaj dlaabtsi tshwmsim rua cov tuabneeg kws puab rov ca sab rua puab nkaus xwb, hab cov kws txaus sab rua puab lub neej zoo le caag?

¹⁴Puab raug kev puamtsuaj tuag ib yaam le tej yaaj, hab kev tuag yog puab tug tswv. Cov tuabneeg ncaaj nceeg yuav yeej puab taagnrho, rua qhov puab lub cev yuav lwj sai rua huv tubtuag teb qhov kws nyob dleb puab tej tsev.

¹⁵Tabsis Vaajtswv yuav cawm kuv, nwg yuav cawm kuas kuv dlim ntawm txujkev tuag lub fwjchim.

¹⁶Tsi xob nyuaj sab thaus ib tug tuabneeg twg npluanuj, txawm yog nwg muaj nyaj txag ntau npaum le caag los

¹⁷thaus nwg tuag lawm, nwg yeej coj tsi tau dlaabtsi nrug nwg moog le, nwg tej nyaj txag yuav tsi nrug nwg moog rua huv qhov ntxaa.

¹⁸Txawm yog tug tuabneeg kws nwg txaus sab rua nwg lub neej, hab luas qhuas nwg, vim nwg lub neej zoo heev

¹⁹los nwg yeej yuav tau moog nrug nwg cov yawmkoob nyob huv tubtuag teb qhov kws tsaus ntuj nti moog ibtxhis.

²⁰Tuabneeg lub koob meej hab kev muaj txag npluanuj yeej paab tsi tau nwg dlim txujkev tuag; nwg yeej yuav tuag ib yaam le tej tsaj.