Read Hmong Njua Phoo Ntawv Nkauj 5 Bible Online

Phoo Ntawv Nkauj 5 - Hmong Njua bible

Phoo Ntawv Nkauj 5

¹Tug TSWV, thov koj noog kuv tej lug hab nov kuv lub suab hu.

²Kuv tug Vaajtswv hab Vaajntxwv, thov noog kuv lub suab quaj hu thov koj paab kuv! Tug TSWV, kuv thov koj;

³koj yeej nov kuv lub suab thov thaus sawv ntxuv; thaus lub nub tawm tuaj kuv thov koj hab tog rawv koj teb kuv.

⁴Koj tsi yog tug Vaajtswv kws txaus sab rua txujkev ua phem ua qas; koj yeej tsi pub muaj tej kev phem nyob taabmeeg koj le.

⁵Cov tuabneeg khaavtheeb tsi muaj peevxwm sawv taabmeeg ntawm koj lub xubndlag; koj ntxub cov tuabneeg sab phem.

⁶Koj rhuav tshem cov tuabneeg dlaag, ntxub cov tuabneeg limham hab cov tuabneeg ntxeev sab.

⁷Tabsis vim koj muaj kev hlub kuv txhaj muaj peevxwm lug tau rua huv koj tsev. Kuv txhaj muaj peevxwm moog pehawm koj huv koj lub Tuamtsev kws dlawbhuv hab txhus caug pehawm lug ntawm kuv lub sab kws fwm koj.

⁸Tug TSWV, kuv muaj yeebncuab coob heev, thov coj kuv ua lawv le koj lub sab nyam! Thov ua koj txujkev kuas taj rua kuv taug.

⁹Tej lug kws kuv cov yeebncuab has yeej tsi muaj ib lus tseeb le, puab tsuas yog xaav ua kuas muaj kev puamtsuaj xwb. Puab has lug mog lug muas hab ncauj lug zoo, tabsis puab lub sab puv nkaus kev dlaag ntxag kws yog kev tuag.

¹⁰Vaajtswv, thov txav txim hab rau txim rua puab, thov kuas puab tej kev ntxeev sab ua rua puab raug kev puamtsuaj. Ca le muab puab ntab tawm ntawm koj moog, rua qhov puab ua txhum ntau heev hab puab ntxeev sab rua koj.

¹¹Tabsis ca txhua tug kws lug cuag koj tau kev kaaj sab lug, ca puab hu nkauj zoo sab txhua lub sijhawm. Thov koj tsomkwm cov kws hlub koj. Vim muaj koj puab txhaj muaj kev zoo sab.

¹²Tug TSWV, koj yeej foom koob moov rua cov tuabneeg kws fwm koj, koj txujkev hlub tiv thaiv puab ib yaam le dlaim thaiv nav ntaaj.