Read Hmong Njua Phoo Ntawv Nkauj 50 Bible Online

Phoo Ntawv Nkauj 50 - Hmong Njua bible

Phoo Ntawv Nkauj 50

¹Tug TSWV, Vaajtswv tug kws muaj Fwjchim luj kawg nkaus has, nwg hu thoob plawg nplajteb, nubtuaj ti nkaus nubpoob.

²Vaajtswv ci ntsaa ab sau Xi-oos kws yog lub nroog zoo nkauj kawg nkaus.

³Peb tug Vaajtswv yuav lug, tabsis nwg yuav tsi lug ntsag tu, muaj nplaim tawg cig ntswj pis yog ntawm nwg hauv ntej, muaj khaub zeeg cua ntsawj puagncig nwg.

⁴Nwg hu ntuj hab nplajteb nrug ua timkhawv saib nwg txav txim rua nwg tsaav tuabneeg.

⁵Nwg has tas, “Sau kuv tsaav tuabneeg kws ncaaj nceeg lug cuag kuv, puab yog cov tuabneeg kws muab tsaj tua ua khoom fij hab nrug kuv coglug tseg lawm.”

⁶Lub ntuj qha has tas, Vaajtswv yog tug ncaaj nceeg, hab nwg yog tug txav txim ntaag.

⁷“Kuv tsaav tuabneeg ca le noog, kuv yuav qha mej, cov Yixalayees, kuv yuav ua timkhawv kom mej ntaag. Kuv yog Vaajtswv kws yog mej tug Vaajtswv.

⁸Kuv tshev mej tsi yog vim tej tsaj kws mej coj tuaj tua theej txhoj, hab tej tsaj kws mej pheej coj tuaj tua hlawv fij rua kuv.

⁹Kuv yeej tsi yuav tej txiv nyuj kws mej yug tom tshaav zaub lossis tsi yuav mej tej tshis,

¹⁰txhua yaam tsaj kws nyob tom haav zoov hab tej nyuj kws nyob puv nkaus ntau txheeb lub roob los puavleej yog kuv tug.

¹¹Taagnrho tej noog hab txhua yaam kws muaj sa nyob tom tej nraag puavleej yog kuv le.

¹²“Yog kuv tshaib plaab, kuv yuav tsi thov ntawm mej noj, rua qhov lub nplajteb hab txhua tsaav yaam puavleej yog kuv le.

¹³Kuv noj nqaj nyuj lossis haus ntshaav tshis hab los?

¹⁴Ca le muab tej khoom kws mej ua Vaajtswv tsaug fij rua Vaajtswv hab muab rua Vaajtswv tug kws muaj Fwjchim Luj kawg nkaus lawv le mej tau coglug tseg lawm.

¹⁵Thaus mej raug kev txomnyem, ca le hu thov kuv, kuv yuav paab kuas mej dlim, hab mej yuav qhuas kuv.”

¹⁶Tabsis Vaajtswv has rua cov tuabneeg sab phem tas, “Vim le caag mej laam muab kuv tej lug saamfwm coj moog has? Vim le caag mej laam pav txug kuv tej lug cog tseg?

¹⁷Mej tub tsi kaam ca kuv ntuag mej; mej tsi leeg yuav kuv tej lug saamfwm.

¹⁸Thaus mej pum cov tuabneeg ua tubsaab, mej txawm nrug puab sis raug zoo hab moog koom nrug cov tuabneeg ntxag luas tej quaspuj luas tej quasyawg ua ib paab.

¹⁹“Mej pheej naj nub has lug phem lug qas, mej pheej tsi tswj mej lub qhovncauj kws has lug dlaag.

²⁰Mej yeej npaaj rawv nrhav lug ab lam mej tej kwvtij hab nrhav txim rua puab.

²¹Mej tub ua tej nuav taag lug lawm, kuv yeej tsi has mej ib lus le, yog le ntawd, mej txhaj xaav has tas kuv zoo ib yaam le mej hab. Tabsis nwgnuav kuv tshev mej hab muab tej nuav nthuav qha rua mej.

²²“Mej cov kws tsi quavntsej kuv, mej ca le noog kuv has, lossis yuav ca kuv ua kuas mej puamtsuaj hab tsi muaj leejtwg cawm tau kuas mej dlim le.

²³Tug kws muab nwg tej khoom fij ua kuv tsaug txhaj yog tug kws fwm kuv, hab kuv yuav cawm txhua tug kws noog kuv lug kuas dlim.”