Read Hmong Njua Phoo Ntawv Nkauj 51 Bible Online

Phoo Ntawv Nkauj 51 - Hmong Njua bible

Phoo Ntawv Nkauj 51

¹Vaajtswv, thov taabncuab kuv, rua qhov koj muaj txujkev hlub kws tsi paub kawg. Rua qhov koj txujkev taabncuab kws luj kawg nkaus tub tshem kuv tej kev txhum huv tuabsi lawm.

²Thov ntxuav kuv tej kev phem kev qas huv tuabsi moog, hab ua kuas kuv dlawbhuv tsi muaj ib qho txhum le.

³Kuv leeg kuv tej kev txhum, kuv paub has tas kuv yeej tau ua txhum,

⁴kuv tau ua txhum rua koj, rua koj tuab leeg xwb, hab ua tej kws koj pum has tas yog kev phem kev qas. Yog le ntawd, qhov kws koj txav txim rua kuv yeej yog kev yog cai lawm, koj yeej muaj cai rau txim rua kuv lawm.

⁵Txij thaus kuv nam yug kuv lug, kuv yeej ua txhum lawm, thaus kuv nam suab kuv rua huv plaab kuv yeej muaj txim lawm.

⁶Tug kws muaj lub sab dlawb sab zoo hab has lug tseeb yog tug kws muaj kev kaaj sab, thov koj pub koj lub tswvyim rua kuv.

⁷Thov koj muab hixauv ntxuav kuv tej kev txhum moog, kuv txhaj yuav tsi muaj ib qho qho txhum le; thov ntxuav kuv tej kev txhum, kuv txhaj yuav dlawb dlua tej dlaus.

⁸Thov koj pub kuv tau nov tej suab lomzem zoo sab, txawm yog koj ua rua kuv mob hab ua rua kuv lub sab ndlais rhe lawm los kuv yuav rov zoo sab dlua ib zag ntxiv.

⁹Thov koj tsi xob saib kuv tej kev txhum, hab thov koj tshem kuv tej kev phem kev qas huv tuabsi moog.

¹⁰Vaajtswv, thov koj tsim kuas kuv muaj lub sab dlawb, hab thov koj muab lub sab tshab rua kuv kuas kuv noog koj lug.

¹¹Thov koj tsi xob ntab kuv tawm ntawm koj lub xubndlag moog, thov tsi xob rhu koj tug ntsujplig dlawbhuv tawm ntawm kuv moog.

¹²Thov koj cawm kuv, kuas kuv rov muaj kev zoo sab, thov koj paab kuas kuv txawj noog koj lug.

¹³Yog koj ua le ntawd, kuv yuav qha koj tej lug rua cov tuabneeg kws ua txhum, ces puab txhaj yuav rov lug cuag koj.

¹⁴Vaajtswv, thov koj tseg kuv txujsa hab cawm kuas kuv dlim, ces kuv yuav zoo sab hlo moog qha koj txujkev ncaaj nceeg.

¹⁵Tug TSWV, thov koj qheb kuv lub qhovncauj kuas kuv txawj qhuas koj.

¹⁶Koj yeej tsi yuav tej khoom kws luas coj tuaj fij, yog koj yuav tej ntawd kuv yeej yuav coj tuaj. Koj tsi txaus sab rua tej khoom fij kws luas coj tuaj hlawv fij rua koj.

¹⁷Vaajtswv, tej kws kuv coj tuaj fij rua koj ces yog kuv lub sab mog sab muas xwb, koj yuav tsi fee plhu rua tug kws txu fwjchim hab leeg nwg tej kev txhum ib zag le.

¹⁸Vaajtswv, thov koj ua sab dlawb sab zoo rua lub nroog Xi-oos hab paab nwg, thov koj khu tug ntsaa yeej kws thaiv lub nroog Yeluxalees dlua tshab.

¹⁹Ces koj txhaj yuav txaus sab rua tej khoom kws peb coj tuaj fij rua koj, hab tug txiv nyuj kws coj tuaj tua hlawv fij taagnrho rua koj sau lub thaaj.