Read Hmong Njua Phoo Ntawv Nkauj 52 Bible Online

Phoo Ntawv Nkauj 52 - Hmong Njua bible

Phoo Ntawv Nkauj 52

¹Tug tuabneeg muaj fwjchim, vim le caag koj khaav ntxhas rua koj txujkev ua phem ua qas? Vaajtswv txujkev ncaaj nceeg yog txuj kws nyob moog ibtxhis.

²Koj npaaj tswvyim ua kuas lwm tug raug kev puamtsuaj, koj tug nplaig ntse ib yaam le nav chais, koj yeej ibtxwm has lug dlaag xwb.

³Koj nyam kev phem tshaaj kev zoo hab nyam kev dlaag tshaaj kev ncaaj nceeg.

⁴Koj yog tuabneeg dlaag, koj txhaj nyam has tej lug kws chob luas sab xwb.

⁵Yog le ntawd, Vaajtswv yuav ua kuas koj raug kev puamtsuaj moog ibtxhis, nwg yuav tuav koj ca hab muab koj ntab tawm huv koj lub tsev moog; nwg yuav muab koj tshem tawm huv lub nplajteb kws cov tuabneeg muaj sa nyob nuav moog.

⁶Cov tuabneeg ncaaj nceeg yuav pum zaaj nuav hab puab ntshai kawg le, ces puab yuav luag koj plig hab has tas,

⁷“Mej saib, tug tuabneeg kws tsi ca Vaajtswv ua tug paab nwg, tabsis nwg pheej ca sab rua nwg tej nyaj txag hab pheej nrhav kev ua phem nkaus xwb.”

⁸Tabsis kuv zoo ib yaam le tsob txiv ntoo roj kws hlub mog nyoos huv Vaajtswv lub tsev, kuv ca sab rua nwg txujkev hlub kws tsi paub kawg.

⁹Vaajtswv, kuv yuav ua koj tsaug tsi paub kawg rua tej kws koj tub ua pub rua kuv taag lug lawm; kuv yuav qha koj txujkev ua zoo taabmeeg koj tsaav tuabneeg.