Read Hmong Njua Phoo Ntawv Nkauj 55 Bible Online

Phoo Ntawv Nkauj 55 - Hmong Njua bible

Phoo Ntawv Nkauj 55

¹Vaajtswv, thov koj nov kuv tej lug, thov tsi xob tsi quavntsej kuv tej lug thov.

²Thov noog kuv tej lug hab teb tej kws kuv thov koj, kuv nyuaj sab heev, ua rua kuv ib ce tuag taag.

³Kuv cov yeebncuab hem kuv, ua rua kuv ntshai kawg le, cov tuabneeg sab phem tsimtxom kuv, ua rua kuv raug kev puamtsuaj. Puab ua rua kuv raug kev ntxhuv sab; puab chim rua kuv hab ntxub kuv kawg le.

⁴Kuv ntshai kawg nkaus hab txujkev tuag tsuam rawv kuv.

⁵Kuv ntshai ua ib ce tshee nyo hab txhaav taag, txujkev txhawj ntshai ua rua kuv taag kev ca sab lawm.

⁶Kuv xaav kuas kuv muaj tis ib yaam le tug nquab. Kuv yuav yaa moog nrhav chaw su.

⁷Kuv yuav yaa moog dleb dleb hab moog nyob tom roob mojsaab qhua.

⁸Kuv yuav maaj nrooj moog nrhav tsev rua kuv nyob nkaum tej khaub zeeg cua, hab tej tuamtsaam naag.

⁹Tug TSWV, thov koj ua kuas kuv cov yeebncuab has lug tsi sis hum! Kuv pum tej kev limham hab tsi sis humxeeb nyob puv nkaus huv lub nroog,

¹⁰tej ntawd nyob puagncig lub nroog nruab nub hab mo ntuj, kev ua phem hab kev kub ntxhuv nyob puv nkaus huv lub nroog.

¹¹Muaj kev puamtsuaj nyob txhua thaaj chaw, kev tsimtxom hab kev limham nyob puv nkaus tom tej kev.

¹²Yog ib tug yeebncuab luag kuv plig, kuv yeej ua taug sab ntev, yog ib tug yeebncuab saib tsi taug kuv, kuv yuav tsiv nkaum nwg.

¹³Tabsis tub yog koj kws yog kuv tug phoojywg, kuv tug kwvluag hab tug kws txheeb ze kuv.

¹⁴Peb ib leeg yeej qha sab hlo rua ib leeg, hab ua ke pehawm Vaajtswv huv lub Tuamtsev.

¹⁵Thov kuas kuv cov yeebncuab tuag ua ntej puab lub noobnyoog kws teem tseg, thov kuas puab ca le moog caj rua huv tubtuag teb! Kev phem nyob puv nkaus huv puab tej tsev hab huv puab lub sab.

¹⁶Tabsis kuv thov tug TSWV kws yog Vaajtswv paab kuv hab nwg yuav cawm kuas kuv dlim.

¹⁷Tej lug kws kuv ywg hab quaj thaus sawv ntxuv, thaus taav su, hab thaus tsaus ntuj yuav nrov moog txug nwg hab nwg yuav nov kuv lub suab.

¹⁸Nwg yuav coj kuv huv lub tshaav rog kws tawmtsaam yeebncuab rov qaab lug tsi raug mob le caag.

¹⁹Vaajtswv tug kws kaav moog ibtxhis, yuav nov kuv tej lug thov hab kuv tej yeebncuab yuav swb, rua qhov puab tsi kaam hloov sab hab tsi paub ntshai Vaajtswv.

²⁰Kuv tug qub phoojywg thaus u ntxeev sab tawmtsaam nwg cov phoojywg; nwg rhuav nwg tej lug cog tseg.

²¹Nwg tej lug mog lug muas kawg le, tabsis nwg lub sab puv nkaus tej kev ntxub ntxaug; nwg tej lug nplag ib yaam le roj, tabsis tej lug ntawd ntse ib yaam le nav ntaaj.

²²Ca le muab mej tej kev nyuaj sab tso rua tug TSWV, nwg yuav tsomkwm mej, nwg yeej ibtxwm tsi tso cov tuabneeg ncaaj nceeg tseg le.

²³Tabsis Vaajtswv, koj yuav coj cov tuabneeg tua tuabneeg hab cov tuabneeg dlaag moog rua huv puab tej qhov ntxaa thaus puab tseem yog ib nraab neej. Tabsis kuv yuav tso sab plhuav rua koj.