Read Hmong Njua Phoo Ntawv Nkauj 56 Bible Online

Phoo Ntawv Nkauj 56 - Hmong Njua bible

Phoo Ntawv Nkauj 56

¹Vaajtswv, thov koj taabncuab kuv, rua qhov kuv raug luas tawmtsaam, kuv cov yeebncuab tsimtxom kuv txhua lub sijhawm.

²Tug TSWV kws muaj fwjchim, kuv cov yeebncuab tawmtsaam kuv ib nub tsaus ntuj ndlais. Cov kws tuaj tawmtsaam kuv ntawd coob kawg le.

³Thaus kuv muaj kev txhawj ntshai, kuv ca sab rua koj xwb.

⁴Kuv ca sab rua Vaajtswv kuv tsi ntshai le, kuv qhuas nwg vim nwg tej lug cog tseg. Noobneej puas muaj peevxwm ua tau le caag rua kuv?

⁵Kuv cov yeebncuab tsimtxom kuv ib nub tsaus ntuj, puab tuavhuv nrhav kev ua kuas kuv raug mob.

⁶Puab sis sau tuaj nkaum rua huv tej chaw kws nraim nkoog, soj txhua yaam kws kuv ua hab nrhav kev tua kuv povtseg.

⁷Vaajtswv, thov koj ca le rau txim rua puab tej kev ua phem nuav hab ca koj txujkev chim ua kuas puab raug kev puamtsuaj!

⁸Koj yeej paub kuv raug kev txomnyem npaum le caag; koj yeej teev kuv tej kua muag tseg huv tuabsi. Kuv tej kua muag koj puas tau muab sau tseg rua huv koj phoo ntawv?

⁹Nub kws kuv hu koj paab, kuv cov yeebncuab yuav thim rov qaab. Kuv paub has tas Vaajtswv tuaj kuv tog,

¹⁰kuv qhuas tug TSWV, vim nwg tej lug cog tseg.

¹¹Kuv ca sab rua nwg, hab kuv yuav tsi ntshai. Tej tuabneeg nplajteb puas muaj peevxwm ua tau le caag rua kuv?

¹²Vaajtswv, kuv yuav muab khoom tuaj fij rua koj lawv le kuv tau coglug tseg lawm; kuv yuav muab tej khoom kws kuv ua tsaug pub rua koj,

¹³rua qhov koj tau cawm kuv dlim ntawm txujkev tuag hab tsi pub kuv qaug. Kuv txhaj moog tau rua ntawm Vaajtswv xubndlag kws yog tug dluab ci rua cov tuabneeg kws muaj sa nyob.